6 ເດືອນຕົ້ນປີ ນວ ເກີດອຸບັດເຫດ 525 ກໍລະນີ ເສຍຊີວິດ 89 ລາຍ

0
42

ອີງຕາມການລາຍງານຂ່າວຂອງໜັງສືພິມວຽງຈັນໃໝ່ເມື່ອວັນທີ 3 ມິຖຸນາ 2019 ວ່າ ທ່ານ ພັນ​ໂທ ເພັງ​ສະ­ຫວັນ ທຳ​ມາ​ບູນ ຫົວ­ໜ້າ​ພະ​ແນກ​ຕຳ­ຫຼວດ​ຈະ­ລາ­ຈອນ ນະ­ຄອນ­ຫຼວງ​ວຽງ​ຈັນ ໃຫ້​ຮູ້​ວ່າ ໃນ 6 ເດືອນ​ຕົ້ນ​ປີ 2019 ທົ່ວນະຄອນຫຼວງວຽງຈັນມີ​ອຸ­ບັດເຫດ​ເກີດ​ຂຶ້ນ​ທັງ​ໝົດ 525 ກໍ­ລະ­ນີ ມີ​ຜູ້​ເສຍ​ຊີ­ວິດ 89 ລາຍ ທຽບ­ໃສ່​ປີ 2018 ຫຼຸດ​ລົງ 9 ກໍ­ລະ­ນີ ແລະ ຜູ້​ເສຍ​ຊີ­ວິດ​ຫຼຸດ​ລົງ 17 ລາຍ ເມືອງ​ທີ່​ເກີດ​ຫຼາຍ​ກວ່າ​ໝູ່​ເມືອງ​ໄຊ​ທາ­ນີ 148 ກໍ­ລະ­ນີ ລວມ​ມູນ​ຄ່າ​ເສຍ​ຫາຍປະ­ມານ 6,3 ຕື້​ກີບ.

ອຸ­ບັດ­ເຫດ​ທີ່​ເກີດ​ຂຶ້ນ​ໃນ​ແຕ່​ລະ​ຄັ້ງ​ເຮັດ​ໃຫ້​ມີ​ຜູ້​ບາດ­ເຈັບ​ເລັກ​ໜ້ອຍ 184 ຄົນ ບາດເຈັບສົມ­ຄວນ 439 ຄົນ ບາດເຈັບສາ­ຫັດ 128 ຄົນ ຜົນ​ເສຍ​ຫາຍ​ທາງ​ດ້ານ​ພາ­ຫະ­ນະ​ເປ່​ເພ​ເລັກ​ໜ້ອຍ 334 ຄັນ ເປ່ເພສົມ­ຄວນ 955 ຄັນ ໃຊ້​ການ​ບໍ່​ໄດ້ 9 ຄັນ ຄົນ​ຂັບ​ໄດ້​ຮັບ​ບາດ­ເຈັບ​ເລັກ​ໜ້ອຍ 152 ຄົນ ບາດເຈັບສົມ­ຄວນ 263 ຄົນ ເຈັບສາ­ຫັດ 94 ຄົນ ເສຍ​ຊີ­ວິດ 65 ລາຍ ແລະ ຜູ້​ຊ້ອນ​ທ້າຍ​ໄດ້​ຮັບ​ບາດ­ເຈັບ​ເລັກ​ໜ້ອຍ 23 ຄົນ ບາດເຈັບສົມຄວນ 54 ຄົນ ບາດເຈັບສາ­ຫັດ 24 ຄົນ ເສຍ​ຊີ­ວິດ 17 ລາຍ.

ນອກ​ນີ້ ຍັງ​ມີ​ຄົນ​ເສຍ​ຊີ­ວິດ​ຈາກ​ລົດ​ໂດຍ­ສານ 2 ລາຍ ແລະ ລົດ​ຕຳ​ຄົນ​ຍ່າງ​ເສຍ​ຊີ­ວິດ 5 ລາຍ ສາ­ເຫດ​ຂອງ​ການ​ເກີດ​ອຸ­ບັດ­ເຫດ​ທີ່​ເຮັດ​ໃຫ້​ມີ​ຜູ້​ໄດ້​ຮັບ​ບາດ­ເຈັບ ແລະ ເສຍ​ຊີ­ວິດ​ນັ້ນເກີດ​ມາ​ຈາກ​ຜູ້​ຂັບ​ຂີ່​ບໍ່​ຮູ້​ກົດ​ລະ­ບຽບ​ຈະ­ລາ­ຈອນ​ດີ​ເທົ່າ​ທີ່​ຄວນ ຂາດ​ທັກ​ສະ​ຈິດ​ສຳ­ນຶກ​ຂັບ​ຂີ່​ປອດ​ໄພ ລວມ​ເຖິງ​ການ​ບໍ່ມີວິໄນໃນການ​ໃຊ້​ລົດ​ໃຊ້​ຖະ­ໜົນ​ຮ່ວມ​ກັບ​ຄົນ​ອື່ນ ແລະ ສະ­ພາບ​ເຕັກ­ນິກ​ຂອງ​ລົດ ສຳ­ລັບ​ອຸ­ບັດ­ເຫດ​ທີ່​ເກີດ​ຂຶ້ນ​ຈາກ​ລົດ​ສ່ວນ​ຫຼາຍ​ແມ່ນ​ໃຊ້​ຄວາມ​ໄວ​ເກີນ​ກຳ­ນົດ ດື່ມ​ສິ່ງ​ມຶນ­ເມົາ​ແລ້ວ​ຂັບ ລ້ຽວ​ຊ້າຍ-ຂວາ​ບໍ່​ຮັບ­ປະ­ກັນ​ຄວາມ​ປອດ​ໄພ ແລະ ອື່ນໆ.

ດັ່ງນັ້ນ ເພື່ອ​ຫຼີກ​ລ້ຽງຈາກ​ອຸ­ບັດ­ເຫດ​ທີ່​ຈະ​ເກີດ​ຂຶ້ນຜູ້​ຂັບ​ຂີ່​ຕ້ອງ​ປະ­ຕິ­ບັດ​ຕາມ​ກົດ​ລະ­ບຽບ​ຈະ­ລາ­ຈອນ​ຢ່າງ​ເຂັ້ມ​ງວດ ໂດຍ​ເອົາ­ໃຈ­ໃສ່​ເປັນ​ພິ­ເສດ​ໃນ​ການ​ຄວບ​ຄຸມ​ຄວາມ​ໄວ ດື່ມ​ສິ່ງ​ມຶນ­ເມົາ​ແລ້ວ​ບໍ່​ຂັບ​ຂີ່​ ແລະ​ ອື່ນໆ ນອກ​ນີ້ ຕ້ອງ​ຂັບ​ຂີ່​ຢ່າງ​ມີ​ມາ­ລະ­ຍາດ ມີ​ການ​ຜ່ອນ ຜັນ ເຫັນ​ອົກ​ເຫັນ­ໃຈ​ຊຶ່ງ​ກັນ ແລະ ກັນ ຕ້ອງ​ຍອມ​ເສຍ­ສະ­ຫຼະ ແລະ ປ່ອຍ​ສິດ​ໃຫ້​ແກ່​ກັນ ຖ້າ​ພວກ​ເຮົາ​ຫາກ​ປະ­ຕິ­ບັດ​ໄດ້​ຄື​ແນວ​ນີ້ ມັນ​ຈະ​ຊ່ວຍ​ຫຼຸດ­ຜ່ອນ​ອຸ­ບັດ­ເຫດ.

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.