ການຂະຫຍາຍຕົວເສດຖະກິດຂອງ ສປປ ລາວ ຄາດວ່າຈະຍັງໝັ້ນທ່ຽງສໍາລັບປີ 2019 ແລະ 2020 ໂດຍໄດ້ຮັບແຮງສະໜັບສະໜູນຈາກການຂະຫຍາຍຕົວຂອງຂະແໜງກະສິກຳ, ຂະແໜງພະລັງງານ, ຂະແໜງອຸດສາຫະກຳ ແລະ ຂະແໜງບໍລິການ.
ອີງຕາມບົດລາຍງານການຄາດຄະເນເສດຖະກິດຂອງອາຊີປະຈຳປີ 2019 ໄດ້ຄາດຄະເນວ່າ ອັດຕາການຂະຫຍາຍຕົວ ຂອງລວມຍອດຜະລິດຕະພັນພາຍໃນ(ຈີດີພີ) ຂອງສປປ ລາວ ແມ່ນຍັງຄົງຢູ່ທີ 6,5% ສຳລັບປີ2019 ແລະ ປີ2020 ໂດຍການຂະຫຍາຍຂະແໜງອຸດສາຫະກຳ ແມ່ນຄາດວ່າຈະສູງຂຶ້ນເລັກນ້ອຍໃນອັດຕາ 8,1% ໃນປີ 2019 ເພີ່ມຂຶ້ນຈາກປີ 2018 ປະມານ 8% ສາເຫດຍ້ອນ ການພັດທະນາພື້ນຖານໂຄງລ່າງ ພ້ອມທັງການຜະລິດກະແສໄຟຟ້າ ທີ່ເພີ່ມຂຶ້ນ. ສ່ວນຂະແໜງກະສິກຳ ແມ່ນຂະຫຍາຍຕົວໃນອັດຕາ 2,5% ໃນປີ2019 ແລະ ປີ2020 ຂະນະທີ່ຂະແໜງບໍລິການຄາດວ່າຈະຂະຫຍາຍຕົວໃນອັດຕາ 6,7%.
ທ່ານ ຢາຊູຊີ ເນກິຊີ ຕາງໜ້າສຳນັກ ADB ປະຈຳ ສປປ ລາວ ໄດ້ກ່າວວ່າ: ການຂະຫຍາຍຕົວຂອງເສດຖະກິດ ສປປ ລາວ ຈະຍັງຄົງແຂງແຮງຍ້ອນມີການຟື້ນຕົວຂອງຂະແໜງກະສິກຳ ພ້ອມທັງຂະຫຍາຍຕົວຢ່າງແຂງແຮງໃນການຜະລິດກະແສໄຟຟ້າ, ການກໍ່ສ້າງ ແລະ ການບໍລິການຕ່າງໆທີ່ຕິດພັນກັບການທ່ອງທ່ຽວ.
ທ່ານ ຢາຊູຊີ ເນກິຊີ ຍັງກ່າວຕື່ມອີກວ່າ: ເພື່ອຮັກສາຄວາມມີສະຖຽນລະພາບທາງດ້ານເສດຖະກິດມະຫາພາກ ແລະ ບັນລຸການຈະເລີນເຕິບໂຕທີ່ທົ່ວເຖິງ ແລະ ຍືນຍົງ ລັດຖະບານລາວຄວນຈະສືບຕໍ່ຫລຸດຜ່ອນລະດັບໜີ້ສິນພາກລັດ ພ້ອມທັງປັບປຸງການຄຸ້ມຄອງຂອງການເງິນພາກລັດຂອງຕົນ ດ້ວຍການເພີ່ມເກັບລາຍຮັບ ແລະ ການຄຸ້ມຄອງໜີ້ສິນໃຫ້ດີຂຶ້ນ ແລະ ຫລຸດຜ່ອນການຂາດດຸນງົບປະມານໃນຊຸມປີຕໍ່ໜ້າ.
ຂຽນໂດຍ: ແຟນຊິສ ສະຫວັນຄຳ