ຜູ້ນຳຝຣັ່ງຢໍ້າບໍ່ຍົກເລີກແຜນຂຶ້ນລາຄານໍ້າມັນ ອ້າງ “ເພື່ອຮັກສາສິ່ງແວດລ້ອມ”

0
314

ສຳນັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມືອວັນທີ 28 ພະຈິກ 2018 ວ່າ ປະທານາທິບໍດີ ເອມມານູເອລ ມາຄົງ ຖະແຫຼງຜ່ານໂທລະພາບແຫ່ງຊາດ ເມື່ອວັນອັງຄານວ່າ “ເຂົາເຄົາລົບສິດຂອງປະຊາຊົນໃນການປະທ້ວງເພື່ອສະແດງຄວາມບໍ່ພໍໃຈຕໍ່ນະໂຍບາຍຂອງລັດຖະບານ ແລະ ມີຄວາມເຂົ້າໃຈເປັນຢ່າງດີຕໍ່ຄວາມຮູ້ສຶກບໍ່ພໍໃຈຢ່າງໜັກຂອງປະຊາຊົນ ທີ່ມີຕໍ່ມາດຕະການປັບເພີ່ມລາຄານໍ້າມັນ”

ປັດຈຸບັນລາຄາເກັບພາສີແກ໊ສ ແລະ ນໍ້າມັນກາຊວນເພີ່ມເປັນ 2,9 ຍູໂຣຕໍ່ລິດ (ປະມານ 28.295,30 ກີບ/ລິດ) ແລະ ລາຄານ້ຳມັນແອັດຊັງຢູ່ທີ່ 6,5 ຢູໂຣ/ລິດ (ປະມານ 63.420,50 ກີບ/ລິດ) ນີ້ຄືການປັບລາຄານໍ້າມັນຂຶ້ນສູງສຸດໃນຮອບ 18 ປີ ໂດຍເພີ່ມຂຶ້ນຈາກອັດຕາປົກກະຕິໃນຮອບ 12 ເດືອນທີ່ຜ່ານມາເຖິງ 23% ແລະ ລັດຖະບານຍັງກຽມໃຊ້ອັດຕາໃໝ່ໃນວັນທີ 1 ມັງກອນ 2018 ເຊິ່ງມັນໄດ້ສົ່ງຜົນກະທົບຢ່າງໜັກຕໍ່ຄຸນນະພາບຊີວິດຂອງປະຊາຊົນ.

ຢ່າງໃດກໍ່ຕາມ, ຜູ້ນຳຝຣັ່ງກ່າວວ່າເຂົາຈະບໍ່ມີທາງເປັນຝ່າຍ “ຍິນຍອມຕາມຄວາມປະສົງ” ຂອງກຸ່ມຄົນ “ເປັນສ່ວນໜ້ອຍ” ໃຊ້ວິທີກໍ່ຄວາມຮຸນແຮງ ແລະ ຄວາມບໍ່ສະຫງົບເພື່ອຮຽກຮ້ອງຄວາມສົນໃຈໃຫ້ລັດຖະບານຍອມປະຕິບັດຕາມເງື່ອນໄຂຂອງຕົວເອງ ແຕ່ເພື່ອຜົນປະໂຫຍດ ແລະ ຄວາມພໍໃຈຂອງປະຊາຊົນສ່ວນໃຫຍ່ ມາຄົງສະເໜີ “ແຜນຍຸດທະສາດ” ໄລຍະ 3 ເດືອນທີ່ຮວມເຖິງການເຈລະຈາກັບທຸກພາກສ່ວນເພື່ອເຮັດແຜນປະຕິຮູບພຶດຕິກຳການໃຊ້ພະລັງງານຂອງປະເທດຈາກການໃຊ້ພະລັງງານຖ່ານຫີນ ໃຫ້ມີຄວາມເປັນມິດກັບສິ່ງແວດລ້ອມຫຼາຍຂຶ້ນ.

 

 

ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ ແລະ ຮູບປະກອບ: dailynews

ອອກ​ຈາກ REPLY ເປັນ

Please enter your comment!
Please enter your name here