ເຍົາວະຊົນເມີນຫໍສະໝຸດຫັນໜ້າເຂົ້າຮ້ານບັນເທີງ! ຜູ້ໃຫຍ່ເຊຍເດັກນ້ອຍກິນເບຍ! ສັງຄົມເຊື່ອມຖອຍ

0
168

ປະກົດການເຍົາວະຊົນ-ຊາວໜຸ່ມລາວສ່ວນຫຼາຍມັກຫັນໜ້າເຂົ້າຮ້ານເບຍ ຫຼາຍກວ່າຫັນໜ້າເຂົ້າຫໍສະໝຸດ ການສະແຫວງຫາສິ່ງມຶນເມົາຂອງກຸ່ມເຍົາວະຊົນລະດັບມັດທະຍົມແມ່ນຍັງໄດ້ຮັບຄວາມນິຍົມສູງ ບັນຫານັກຮຽນອາຍຸຕ່ຳກວ່າ 18ປີ ເຂົ້າຮ້ານກິນດື່ມຍັງເປັນບັນຫາທີ່ແກ້ໄຂໄດ້ຍາກ ຍ້ອນຫຍັງ? ເປັນຍ້ອນກະແສສັງຄົມ? ເທຣນໄວຮຸ່ນ? ຫຼື ຄວາມລື້ງເຄີຍ?.

ສຽງຮ້ອງເຊຍຂອງຜູ້ໃຫຍ່ໃຫ້ເດັກນ້ອຍອາຍຸປະມານ 6-10ປີ ດື່ມເບຍ ທັງເອົາເງິນຈ້າງທັງຍ້ອງຍໍສາລະພັດ ເບິ່ງຜ່ານໆມັນອາດສ້າງຄວາມບັນເທີງໃຫ້ຜູ້ໃຫຍ່ເປັນຢ່າງດີ ເດັກນ້ອຍຜູ້ໄຮ້ດຽງສາຕໍ່ໂລກຊ່າງເບິ່ງໜ້າຮັກເວລາເມົາ ນີ້ອາດເປັນຄວາມພໍໃຈຂອງຄົນສິ້ນຄິດ ແຕ່ໃນມຸມມອງຂອງຄົນມີຈິດຈຳນຶກຮູ້ຈັກແຍກແຍະສິ່ງໃດຄວນ ຫຼື ບໍ່ຄວນເຮັດນັ້ນ ມັນເປັນເລື່ອງບໍ່ຖືກຕ້ອງ!. ເຮັດໃຫ້ສັງຄົມວັດທະນະທຳອັນດີງາມຂອງລາວເຮົາເຊື່ອມຖອຍ. ເພາະພຶດຕິກຳເຫຼົ່ານີ້ມັນເປັນການມອມເມົາແນວຄິດຈິດໃຈຂອງໄວຮຸ່ນເຍົາວະຊົນ-ຊາວໜຸ່ມລາວຜູ້ເປັນອະນາຄົດຂອງຊາດຕໍ່ໜ້າ ມົວເມົາໄປກັບສຸຣາ ແລະ ຜູ້ຂຽນກໍບໍ່ເຂົ້າໃຈວ່າຜູ້ໃຫຍ່ທີ່ເຫັນດີເຫັນພ້ອມໃຫ້ເດັກນ້ອຍດື່ມ-ເສບສິ່ງເຫຼົ່ານີ້ກຳລັງຄິດຫຍັງຢູ່? ມີຈຶດສຳນຶກຮູ້ແຍກແຍະຢູ່ ຫຼື ບໍ່? ຫຼື ມີພຽງຄວາມຄຶກຄະນອງສ່ວນຕົວ? ຫຼື ເຮີ່ໄປຕາມກະແສສັງຄົມພາໄປເທົ່ານັ້ນ?.

ຫຼາຍຄົນຮູ້ດີວ່າເຄື່ອງດື່ມທີ່ມີສານແອລກໍຮໍເປັນສິ່ງບໍ່ດີ ຍິ່ງດື່ມຍິ່ງໃຫ້ໂທດ ດີແທ້ແມ່ນບໍ່ຄວນນຳເຂົ້າສູ່ຮ່າງກາຍ ໂດຍສະເພາະຮ່າງກາຍຂອງເດັກນ້ອຍແມ່ນບໍ່ຄວນທີ່ສຸດ ເນື່ອງຈາກແອລກໍຮໍຈະສົ່ງຜົນອັນຕະລາຍຕໍ່ອະໄວຍະວະຂອງເດັກນ້ອຍ, ສົ່ງຜົນອັນຕະ ລາຍຕໍ່ພັດທະນາການທາງດ້ານສະໜອງ ແລະ ທີ່ຮ້າຍແຮງໄປກວ່ານັ້ນຫາກໃຫ້ເດັກນ້ອຍດື່ມແອລກໍຮໍຫຼາຍອາດເຮັດໃຫ້ເດັກນ້ອຍເສຍຊີວິດໄດ້ ອີກທັງຍັງສົ່ງຜົນເສຍທາງດ້ານສຸຂະພາບເຊັ່ນ: ສຸຂະພາບອ່ອນເພຍ, ຄວາມຈຳບໍ່ດີມັກລືມ, ມັກຄິດບໍ່ອອກ… ແລະ ຜົນກະທົບໃນຫຼາຍໆດ້ານ ບໍ່ວ່າຈະເປັນດ້ານສັງຄົມ, ບັນຫາໄວຮຸ່ນເມົາແລ້ວຍົກພວກຕີກັນ, ເມົາແລ້ວຂາດສະຕິໃນການຂັບລົດເຮັດໃຫ້ເກີດອຸບັດຕິເຫດ, ເມົາແລ້ວມັກແຫກກົດເຊັ່ນ : ຢາກລອງຢາເສບຕິດ, ຢາກລອງມີເພດສຳພັນແບບບໍ່ປ້ອງກັນ ແລະ ອື່ນໆ.

ຫາກຈະສົມທຽບປະເທດທີ່ພັດທະນາແລ້ວຍົກຕົວຢ່າງປະເທດຈີນ, ຢີ່ປຸ່ນ, ເກົາຫຼີໃຕ້, ອາເມລິກາ… ພວກເຂົາປະຕິບັດຢ່າງເຄັ່ງຂັດໃນການຫ້າມເດັກນ້ອຍອາຍຸຕ່ຳກວ່າ 18 ປີ ເຂົ້າສະຖານບັນເທີງ ຫ້າມຊື້ເຄື່ອງດື່ມແອລກໍຮໍ ແລະ ຍັງໄດ້ຮັບຄວາມຮ່ວມມືຈາກພາກປະກອບການ ແລະ ຮ້ານຄ້າ, ແຕ່ສຳລັບບ້ານເຮົາພາບການຊື້-ຂາຍເຄື່ອງດື່ມແອລກໍຮໍໃຫ້ເດັກນ້ອຍ, ພາບໃຊ້ເດັກນ້ອຍໄປຊື້ເຫຼົ້າເບຍ ແລະ ຢາສູບ, ພາບເຊຍເດັກນ້ອຍດື່ມສິ່ງມຶນເມົາ, ພາບເຍົາວະຊົນຕັ້ງວົງດື່ມເຫຼົ້າເບຍ ຫຼື ນັ່ງໃນສະຖານບັນເທີງຕ່າງໆຍັງເຫັນຢູ່ຫຼາຍ.

ບົດຄວາມນີ້ ບໍ່ມີເຈດຕະນາສ້າງຄວາມວຸ່ນວາຍ, ຕໍ່ຕ້ານ, ເຢາະເຢີ້ຍໃດໆທັງສິ້ນ ພຽງຢາກໃຫ້ທຸກຄົນຄຳນຶງເຖິງພຶດຕິກຳການດື່ມ ກິນ ຫຼິ້ນທ່ຽວຂອງຕົວ ບາງຄັ້ງມັນອາດສົ່ງຜົນກະທົບທາງກົງ ແລະ ທາງອ້ອມ ແລະ ຮຽກຮ້ອງໃຫ້ກຸ່ມຜູ້ໃຫຍ່ທີ່ມັກເຊຍເດັກນ້ອຍດື່ມສິ່ງມຶນເມົາແມ່ນຢາກໃຫ້ທ່ານຢຸດເຮັດ ອີກທັງຮຽກຮ້ອງໃຫ້ທຸກຄົນເປັນເຈົ້າການນຳກັນໃນການແກ້ໄຂບັນຫາເຍົາວະຊົນ-ຊາວໜຸ່ມລາວເຂົ້າຮ້ານບັນເທີງຢ່າງຈິງຈັງ ພ້ອມສະເໜີທາງພາກສ່ວນທີ່ຮັບຜິດຊອບ ເມື່ອມີລະບຽບວາງອອກມາແລ້ວກໍ່ໃຫ້ເບິ່ງຄືນ ແລະ ເອົາໃຈໃສ່ປະຕິບັດຕື່ມ.

 

 

 

 

ຮຽບຮຽງບົດ: ບຸດສະດີ ສາຍນໍ້າມັດ
ຮູບປະກອບຈາກວິດີໂອ: facebook.com/jotmaikhaofacebook.com/100019915209533 

ອອກ​ຈາກ REPLY ເປັນ

Please enter your comment!
Please enter your name here