ເຈົ້າໜ້າທີ່ດ່ານໜອງຄາຍຈັບ 3 ຊາວລາວກຽມຂົນເງິນ 38 ລ້ານບາດຂ້າມປະເທດ

0
1098

ເມື່ອເວລາ 10:00 ໂມງ ຂອງວັນທີ 11 ຕຸລາ 2018 ທີ່ດ່ານຂົວມິດຕະພາບລາວ-ໄທ 1 ເມືອງ ໜອງຄາຍ ຜູ່ອຳນວຍການດ່ານຊາຍແດນພາກທີ 2 ພ້ອມດ້ວຍເຈົ້າໜ້າທີ່ດ່ານໜອງຄາຍ ໄດ້ຖະແຫຼງການຮ່ວມກັນກ່ຽວກັບການຈັບກຸມຕົວຄົນລາວ 3 ຄົນ; ເປັນຊາຍ 1 ຄົນ, ຍິງ 2 ຄົນ (ບໍ່ເປີດເຜີຍຊື່ ແລະ ນາມສະກຸນ) ຊຸກເຊື່ອງທະນະບັດໃບ 1.000 ບາດ ຈຳນວນ 10 ລ້ານບາດ ແລະ ເຊື່ອງໄວ້ບ່ອນມ້ຽນເຄື່ອງ ແລະ ກາງເບາະລົດດ້ານຫຼັງ 28 ລ້ານບາດ, ລວມທັງໝົດເປັນ 38 ລ້ານບາດ ໃນລົດເກັງ ໂຕໂຢຕ້າ ແຄັມຣີ ສີປອນ ທະບຽນ ຄວ 9889 ກຳແພງນະຄອນຫຼວງວຽງຈັນ.

ການຈັບກຸມໃນຄັ້ງນີ້ເຈົ້າໜ້າທີ່ດ່ານ ໄດ້ເຝົ້າລະວັງຂະບວນການລັກລອບນຳເງິນຕາອອກນອກປະເທດ ໂດຍຜິດກົດໝາຍ ເຊິ່ງລົດເກັງຄັນດັ່ງກ່າວຂັບເຂົ້າອອກປະເທດໄທຫຼາຍຄັ້ງ ຈົນມາຮອດເວລາປະມານ 20.30 ນາທີ ຂອງວັນທີ 10 ຕຸລາ 2018 ລົດເກັງຄັນດັ່ງກ່າວຂັບເຂົ້າມາບໍລິເວນດ່ານຊາຍແດນ ແລະ ກຳລັງຈະເດີນທາງອອກນອກປະເທດມຸ່ງໜ້າເຂົ້າ ສປປ ລາວ ເຈົ້າໜ້າທີ່ດ່ານ ຈື່ງໄດ້ກວດຄົ້ນກໍ່ພົບຂອງກາງດັ່ງກ່າວ.

ຈາກການສອບສວນເບື້ອງຕົ້ນ ຜູ້ຖືກຫາທັງ 3 ຄົນຍອມຮັບສາລະພາບວ່າໄດ້ເຊື່ອງເງິນທັງໝົດໄວ້ແທ້ ໂດຍຕ່າງຄົນຕ່າງກໍ່ມີທຸລະກິດເປັນຂອງຕົນເອງ ສ່ວນເງິນທັງໝົດທີ່ຖືກເຈົ້າໜ້າທີ່ກວດຢຶດເປັນເງິນທີ່ໄດ້ມາຈາກການຂາຍອາຫານສົດ ແລະ ອາຫານແຫ້ງ ຮວມທັງທຸລະກິດແລກປ່ຽນເງິນຕາໃນນະຄອນຫຼວງວຽງຈັນ ຫຼັງຈາກຖືກຈັບກຸມໄດ້ມີການຍິນຍອມໃນຊັ້ນດ່ານ.

ຜູ້ອຳນວຍການດ່ານຊາຍແດນພາກທີ 2 ກ່າວວ່າການຢຶດເງິນໃນຄັ້ງນີ້ຖືເປັນຄັ້ງທີ 3 ທີ່ທາງດ່ານໜອງຄາຍໄດ້ຈັບກຸມ, ຄັ້ງທຳອິດ 98 ລ້ານບາດ, ຄັ້ງທີສອງ 30 ລ້ານບາດ ແລະ ຄັ້ງທີສາມ 38 ລ້ານບາດ, ເຊິ່ງການລັກລອບນຳເງິນອອກນອກປະເທດແມ່ນເປັນຄວາມຜິດຕາມ ບົດບັນຍັດ ດາ່ນຊາຍແດນ ໂດຍທາງດ່ານຈະປະສານງານກັບໜ່ວຍງານປາບປາມການຟອກເງິນ ເຮັດການກວດສອບແຫຼ່ງທີ່ມາຂອງເງິນວ່າເປັນເງິນທີ່ກ່ຽວຂ້ອງກັບທຸລະກິດຜິດກົດໝາຍ ແລະ ຢາເສບຕິດ ຫຼື ບໍ່ ແຕ່ຄາດວ່າໜ້າຈະເປັນຂະ ບວນການຄ້າເງິນ ເມື່ອຜູ້ກະທຳຜິດຍອມຮັບຜິດ ແລະ ຍິນຍອມລະງັບຄະດີໃນຊັ້ນດ່ານ ກໍ່ຈະຖືກປັບໄໝຄົນລະ 20.000ບາດ ແລະ ຄືນເງິນໃຫ້ຄົນລະ 2 ລ້ານບາດຕາມສິດທິ ສ່ວນເງິນທີ່ເຫຼືອ 32 ລ້ານບາດ ແລະ ລົດເກັງແມ່ນຢຶດເຂົ້າຄັງຫຼວງ.

ລາຍລະອຽດ ກໍລະນີ້ ກວດພົບເງິນ 38 ລ້ານບາດ ຢູ່ລົດແຄມຣີ ກໍາແພງນະຄອນ ຄວ 9889 ທີ່ດ່ານໜອງຄາຍhttp://tholakhong.com/16903/

Posted by ຂ່າວຕ່າງປະເທດ International on ວັນພະຫັດ ທີ 11 ຕຸລາ 2018

 

 

 

 

 

 

ຮຽບຮຽງຂ່າວ: ບຸດສະດີ ສາຍນ້ຳມັດ
ແຫຼ່ງຂໍ້ມູນ: news.ch7.com
ຮູບປະກອບ: thairath

ຄລິບວິດີໂອຈາກ: ຂ່າວຕ່າງປະເທດ International

ອອກ​ຈາກ REPLY ເປັນ

Please enter your comment!
Please enter your name here