ມາເລເຊຍຍົກເລີກ 3 ໂຄງການ ທີ່ລົງນາມກັບ ສປ.ຈີນ

0
579

ຕາມການລາຍງານຈາກແຫຼ່ງຂ່າວຈາກ ສສ.ຫວຽດນາມ ລາຍງານຈາກເມືອງກົວລາລຳເປີ, ປະເທດມາເລເຊຍ ອ້າງອີງເຖິງການຢັ້ງຢືນຂອງໂຄສົກກະຊວງການເງີນມາເລເຊຍທີ່ວ່າ ມາເລເຊຍໄດ້ຍົກເລີກໂຄງການກໍ່ສ້າງທໍ່ສົ່ງນໍ້າມັນ 3 ລາຍການທີ່ໄດ້ລົງນາມກັບ ສປ.ຈີນ ຢ່າງເປັນທາງການ ຫຼັງຈາກທີ່ໄດ້ໂຈະໂຄງການເຫຼົ່ານັ້ນໄວ້ຊົ່ວຄາວ.

ໜັງສືພິມ Financial times ແຈ້ງວ່າ ທ່ານ ລິມ ກວນເອງ, ລັດຖະມົນຕີການເງິນມາເລເຊຍ ໄດ້ສົ່ງຈົດໝາຍໄປຍັງຝ່າຍຕ່າງໆທີ່ກ່ຽວຂ້ອງຂອງ ສປ.ຈີນ ເພື່ອແຈ້ງໃຫ້ຮູ້ເຖີງການຍົກເລີກໂຄງການຕ່າງໆ​. ບັນດາໂຄງການທີ່ໄດ້ຍົກເລີກໄປແມ່ນ ໂຄງການໃນການກໍ່ສ້າງສົ່ງທໍ່ນໍ້າມັນ ແລະ ແກັສ ທີ່ມີຍອດມູນຄ່າກວ່າ 1 ຕື້ໂດລາສະຫະລັດ, ແລະ ໂຄງການກໍ່ສ້າງສົ່ງທໍ່ນໍ້າມັນ ທີ່ມີມູນຄ່າ 795 ລ້ານໂດລາສະຫະລັດ ເຊື່ອມຈອດລະຫວ່າງລັດ ມາລັກກາ ກັບໂຮງງານກັ່ນນໍ້າມັນ ແລະ ເຄມີທາດຢູ່ໃນ ລັດໂຈຮໍ.

ທ່ານ ມາຮາເທຍ ມໍຮາມັດ, ນາຍົກລັດຖະມົນຕີມາເລເຊຍ ຢັ້ງຢືນເມື່ອວັນທີ 21 ສິງຫາ ທີ່ຜ່ານມາເຖິງການຍົກເລີກ 3 ໂຄງການໂດຍມີຍອດມູນຄ່າ 22 ຕື້ໂດລາສະຫະລັດ ທີ່ໄດ້ລົງນາມກັບ ສປ.ຈີນ ໄປນັ້ນຈົນກວ່າວ່າມາເລເຊຍຈະຊໍາລະຫນີ້ສິນຕ່າງໆສຳເລັດ. ໂຄງການທີ່ຖືກຍົກເລີກນັ້ນກໍປະກອບມີ ໂຄງການທາງລົດໄຟເຊື່ອມຕໍ່ແຄມຝັ່ງທະເລທິດຕາເວັນອອກຂອງມາເລເຊຍ ໄປຍັງພາກໃຕ້ຂອງໄທ – ກົວລາລຳເປີ ແລະ 2 ໂຄງການທໍ່ສົ່ງນໍ້າມັນ – ແກັສ.

ເມື່ອເດືອນພຶດສະພາທີ່ຜ່ານມາ ທ່ານ ມາຮາເທຍ, ນາຍົກລັດຖະມົນຕີມາເລເຊຍ ກໍໄດ້ອອກການໂຈະຊົ່ວຄາວກັບໂຄງການທາງລົດໄຟຄວາມໄວສູງ ທີ່ລົງນາມລະຫວ່າງ ມາເລເຊຍ ກັບ ສິງກະໂປ ຍ້ອນວ່າໂຄງການນີ້ມີຄວາມສີ້ນເປືອງຫລາຍ.

ນັບແຕ່ຂື້ນຮັບອຳນາດເປັນຕົ້ນມາ ນາຍົກລັດຖະມົນຕີ ມາຮາເທຍ ໄດ້ດຳເນີນການພິຈາລະນາຄືນໃຫມ່ຫມົດ ຕໍ່ກັບຫຼາຍໂຄງການດ້ານພື້ນຖານໂຄງລ່າງຂະໜາດໃຫຍ່ ເຊິ່ງໄດ້ຮັບການລົງນາມໃນສະໄໝຂອງອະດີດນາຍົກລັດຖະມົນຕີ ນາຈິບ ຣາຊັກ, ຕໍ່ຄວາມພະຍາຍາມດັ່ງກ່າວຂອງ ທ່ານ ມາຮາເທຍ ແມ່ນເພື່ອຕັດ-ຫຼຸດໜີ້ສິນຂອງຊາດ ເຊິ່ງປະຈຸບັນນີ້ມີຢູ່ປະມານ 250 ຕື້ໂດລາສະຫະລັດ.

 

 

 

 

ຮຽບຮຽງໂດຍ: ບຸນມີ ຄຳມີໄຊ

ແຫຼ່ງຂ່າວ: ວຽງຈັນໃຫມ່

ອອກ​ຈາກ REPLY ເປັນ

Please enter your comment!
Please enter your name here