ຕ້ອງການອາສາສະໝັກເພື່ອມາຊ່ວຍແຍກເຄື່ອງທີ່ໄດ້ຮັບການບໍລິຈາກ

0
170

ໃນປະຈຸບັນ ກະຊວງແຮງງານ ແລະ ສະຫວັດດີການສັງຄົມ (ຮສສ) ຍັງຕ້ອງການແຮງງານ ຫລື ຈິດອາສາ ເພີ່ມຕື່ມ ເພື່ອມາຊ່ວຍໄຈ້ແຍກເຄື່ອງບໍລິຈາກ ຫລັງຈາກທີ່ໄດ້ຮັບເຄື່ອງຈາກຜູ້ບໍລິຈາກທັງພາຍໃນ ແລະ ຕ່າງປະເທດ ເປັນຈຳນວນຫລວງຫລາຍ ໃນໄລຍະແຕ່ວັນທີ 24 ກໍລະ ກົດ 2018 ເປັນຕົ້ນມາ.

ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງ ຮສສ ໄດ້ໃຫ້ສຳພາດຕໍ່ນັກຂ່າວ ໃນວັນທີ 4 ສິງຫາ 2018 ໃນໂອກາດ ທີ່ທ່ານໄດ້ລົງກວດກາເບິ່ງເຄື່ອງທີ່ໄດ້ຮັບ ຈາກການບໍລິຈາກ ທີ່ສາງເກັບມ້ຽນເຄື່ອງຫລັກ 17 ຂອງກະຊວງແຮງງານ ແລະ ສະຫວັດດີການສັງຄົມ ຢູ່ບ້ານດ່ານຊ້າງ ເມືອງໄຊທານີ ນະຄອນຫລວງວຽງຈັນ ນີ້ວ່າ: ປັດຈຸບັນ ເຄື່ອງບໍລິຈາກທີ່ຢູ່ໃນສາງດັ່ງກ່າວ, ແມ່ນມີຈຳນວນຫລວງຫລາຍ ທີ່ໄດ້ຮັບການຊ່ວຍເຫລືອຈາກຫລາຍພາກສ່ວນທັງພາຍໃນ ແລະ ຕ່າງປະເທດ ເປັນຕົ້ນ ເຄື່ອງນຸ່ງຫົ່ມ, ເຄື່ອງອຸປະໂພກບໍລິໂພກ ໂດຍສະເພາະນ້ຳດື່ມ, ເຮືອ, ເຕັ້ນ ແລະ ວັດຖຸອຸປະກອນ ອື່ນໆ ມື້ໜຶ່ງມີເຄື່ອງເຂົ້າມາບໍ່ຫລຸດ 4-6 ຄັນລົດຕູ້ຄອນເທັນເນີ້. ສະນັ້ນ ເຮັດໃຫ້ກຳລັງແຮງງານ ທີ່ມາຊ່ວຍໄຈ້ແຍກເຄື່ອງ ແມ່ນບໍ່ພຽງພໍ ສຳລັບກຳລັງແຮງງານໃນວັນລັດຖະການ ມີພຽງແຕ່ 50-60 ຄົນ, ວັນເສົາ-ອາທິດ ມີປະມານ 100 ຄົນ ເພາະວ່າມີແຕ່ພະນັກງານພາຍໃນກະຊວງ ຮສສ ເທົ່ານັ້ນ. 

 

ປັດຈຸບັນ, ເຄື່ອງບໍລິຈາກຕ່າງໆ ທີ່ຢູ່ໃນສາງມ້ຽນເຄື່ອງນະຄອນຫລວງວຽງຈັນ, ຈຳປາສັກ, ອັດຕະປື, ເມືອງສະໜາມໄຊ ແລະ ຢູ່ບັນດາແຂວງຕ່າງໆ ມີຈຳນວນຫລວງຫລາຍ ທີ່ຍັງບໍ່ທັນໄດ້ໄຈ້ແຍກ ແລະ ຕ້ອງການແຮງງານປະມານ 200-300 ຄົນ ເພື່ອມາຊ່ວຍແຍກເຄື່ອງດັ່ງກ່າວ. ສະນັ້ນຈຶ່ງຂໍຄວາມຮ່ວມມື ແລະ ຂໍເຊີນຊວນມາຍັງພະນັກງານ, ທະຫານ, ຕຳຫລວດ, ບັນດາກະຊວງຕ່າງໆ ຫລື ຜູ້ທີ່ມີຈິດອາສາທີ່ມີເວລາຫວ່າງ ຢາກເຂົ້າມາຊ່ວຍແຍກເຄື່ອງດັ່ງກ່າວ ໃຫ້ແຈ້ງມາຍັງກະຊວງ ຮສສ ຂອງພວກເຮົາໄດ້ ທີ່ສາຍດ່ວນໂທ: 1511; 1522.

ໃນໂອກາດດຽວກັນ, ທ່ານ ຄຳແພງ ໄຊສົມແພງ ຍັງໄດ້ຮຽກຮ້ອງໃຫ້ຜູ້ບໍລິຈາກທຸກພາສ່ວນ ຄວນໄຈ້ແຍກເຄື່ອງໃຫ້ເປັນລະບຽບກ່ອນມາບໍລິຈາກ ເພື່ອໃຫ້ມັນສະດວກ ແລະ ບໍ່ເປັນການເສຍເວລາມາໄຈ້ແຍກເຄື່ອງຄືນ ໃນການສົ່ງຕໍ່ໄປ ຫລື ນຳໄປມອບໃຫ້ແກ່ປະຊາຊົນທີ່ປະສົບໄພ ຫລື ຜູ້ທີ່ມີຄວາມຕ້ອງການຢູ່ໃນທົ່ວປະເທດ ໂດຍສະເພາະ ແຂວງ ອັດຕະປື.

 

ແຫລ່ງຂ່າວ: ມະນີທອນ (ສຳນັກຂ່າວສານປະເທດລາວ)

ອອກ​ຈາກ REPLY ເປັນ

Please enter your comment!
Please enter your name here