ຍອດມູນຄ່າການຊ່ວຍເຫລືອຈາກສັງຄົມທັງພາຍໃນ ແລະ ຕ່າງປະເທດ ໂດຍຜ່ານສູນຮັບບໍລິຈາກ ຮສສ

1
1002

ຍອດມູນຄ່າການຊ່ວຍເຫລືອຈາກສັງຄົມທັງພາຍໃນ ແລະ ຕ່າງປະເທດ ໂດຍຜ່ານສູນຮັບບໍລິຈາກ ຢູ່ກະຊວງແຮງງານ ແລະ ສະຫວັດດີການສັງຄົມ ພຽງສູນດຽວເທົ່ານັ້ນ (ບໍ່ລວມມູນຄ່າການຊ່ວຍເຫລືອຜ່ານລັດຖະບານ, ບັນດາກະຊວງ, ສຳນັກງານ, ແຂວງ ແລະ ສູນບໍລິຈາກອື່ນໆ) ມາຮອດວັນທີ 2 ສິງຫາ 2018, ເງິນກີບທັງໝົດ 12,8 ຕື້ກວ່າກີບ, ສະກຸນເງິນບາດໄທ 8,6 ລ້ານກວ່າບາດ, ສະກຸນເງິນໂດລາ 865.000 ກວ່າໂດລາສະຫະລັດ ແລະ ສະກຸນເງິນຫວຽດນາມຈຳນວນ 100 ລ້ານດົງ.

ຈຳນວນເງິນເຫລົ້ານີ້ໄດ້ມາຈາກການບໍລິຈາກຂອງ ບັນດາບໍລິສັດ, ສຳນັກງານ, ອົງການ, ຫ້າງຮ້ານ ແລະ ພໍ່ແມ່ພີ່ນ້ອງປະຊາຊົນລາວ ລວມທັງພີ່ນ້ອງບ້ານໃກ້ເຮືອນຄຽງ, ທັງໝົດນີ້ໄດ້ສະແດງເຖິງຄວາມມີນໍ້າໃຈ ແລະ ຄວາມເປັນຫ່ວງເປັນໃຍ ຂອງປະຊາຊົນລາວບັນດາເຜົ່າໃນທົ່ວປະເທດ ແລະ ປະເທດເພື່ອນມິດ ທີ່ຊ່ວຍກັນປະກອບສ່ວນ ແລະ ທັງເປັນການໃຫ້ກຳລັງໃຈຜູ້ປະສົບໄພພິບັດໃນຄັ້ງນີ້ ໃຫ້ຜ່ານພົ້ນວິກິດນີ້ໄປໄດ້ດ້ວຍດີ ແລະ ມີກຳລັງໃຈຕໍ່ສູ້ກັບເຫດການອັນໂຫດຮ້າຍນີ້ ແລະ ກັບເຂົ້າສູ່ສະພາບປົກກະຕິໂດຍໄວ.

ສູນຮັບບໍລິຈາກດັ່ງກ່າວນີ້ຍັງຈະສືບຕໍ່ຮັບເອົາການຊ່ວຍເຫລືອຈາກທຸກພາກສ່ວນ ເພື່ອນຳເອົາໄປແບ່ງເບົາຄວາມທຸກ ແລະ ແກ້ໄຂຊີວິດການເປັນຢູ່ຂອງຜູ້ທີ່ໄດ້ຮັບຜົນກະທົບຈາກອຸທົກກະໄພ ໃຫ້ກັບຄືນມາສູ່ສະພາບປົກກະຕິໂດຍໄວ ແລະ ມີຊີວິດທີ່ດີຂຶ້ນ, ຊຶ່ງທ່ານສາມາດສອບຖາມຂໍ້ມູນ ຫລື ຕິດຕໍ່ພົວພັນຜ່ານສາຍດ່ວນໂດຍບໍ່ໄດ້ເສຍຄ່າ ໂທ: 1511, 1522 ຕັ້ງແຕ່ເວລາ 8:00 ໂມງ ຫາ 18:00 ໂມງ.

ສ່ວນຢູ່ສູນອົບພະຍົບຂອງເມືອງສະໜາມໄຊ ແຂວງ ອັດຕະປືມາຮອດ 16:00 ໂມງ ຂອງວັນທີ 2 ສິງຫາ ມີຕົວເລກລວມຍອດທັງໝົດດັ່ງນີ້:

ເງິນສົດ 15,408,000,000 ກີບ ເພີ່ມຈາກວັນທີ 1 ສິງຫາ 200 ລ້ານກວ່າກີບ, ເຄື່ອງອຸປະໂພກ-ບໍລິໂພກ: ຄິດເປັນມູນຄ່າ 39 ຕື້ກວ່າກີບ, ເຂົ້າສານ: 595 ໂຕນ ຄິດເປັນມູນຄ່າ 3.5 ຕື້ກີບ.

ໃນຂະນະທີ່ ຕົວເລກຜູ້ເສຍຊີວິດຮອດຕອນຄໍ່າຂອງມື້ວານນີ້ 2/8/2018 ພົບຜູ້ເສຍຊີວິດເພີ່ມອີກ 5 ລວມແມ່ນ 18 ສົບ, ຍັງສາບສູນອີກ 113 ຄົນ. 

ແຫລ່ງຂ່າວ: ສິງຄຳ ຂ່າວສານປະເທດລາວ.

1 ຄວາມ​ຄິດ​ເຫັນ

  1. ເພື່ອຍົກສູງຄຸນນະພາບແມ່ນເຫັນດີແຕ່ວ່າຢ່າໃຫ້ມີການຊື້ຂາຍຄະແນນເດີ ທ່ານ

ອອກ​ຈາກ REPLY ເປັນ

Please enter your comment!
Please enter your name here