ສາທາລະນະສຸກສັ່ງກວດຄືນຫ້ອງກວດພະຍາດ ໂຮງໝໍເອກະຊົນ ໂຮງງານຜະລິດຢາ ແລະ ຮ້ານຂາຍຢາ

0
248

​ເມື່ອ ອາທິດ​ທີ່ຜ່ານ​ມາ, ກະຊວງ​ສາ​ທາ​ລະນະ​ສຸກ​ ໄດ້​ອອກ​ແຈ້ງ​ການ ​ໃຫ້​ກວດກາ​ຄືນ​ບັນດາ ​ຫ້ອງ​ກວດ​ພະຍາດ​ເອກະ​ຊົນ, ​ໂຮງໝໍ​ເອກະຊົນ, ​ໂຮງງານ​ຜະລິດ​ຢາ ​ແລະ ຮ້ານ​ຂາຍ​ຢາ​ອຸປະກອນ​ການ​ແພດ ​ທຸ​ກແຫ່ງ ​ເພື່ອ​ຮັບປະກັນ​ຄຸນ​ນະພາ​ບ ຂອງ​ການ​ບໍລິການ ​ແລະ ຄວາມ​ປອດ​ໄພ​ຂອງ​ປະຊາຊົນ​ບັນດາ​ເຜົ່າ​ ໃນ​ທົ່ວ​ປ​ະ​ເທດ. ​ເນື່ອງ​ຈາກ​ວ່າ​ ໃນ​​ໄລຍະ​ທີ່​ຜ່ານ​ມາ ​ໄດ້​ມີ​ຫ້ອງ​ກວດ ​ພະຍາດ​ເອກະ​ຊົນ, ​ໂຮງໝໍ​ເອກະ​ຊົນ, ຮ້ານ​ຂາຍ​ຍ່ອຍ​ຢາ, ​ໂຮງງານ​ຜະລິດ​ຢາ-ອຸປະກອນ​ການ​ແພດ, ບໍລິສັດ​ຂາ​​ເຂົ້າ-ຂາ​ອອກ ​ແລະ ບໍລິສັດ​ຂາຍ​ຍົກ ພາຍ​ໃນດ້ານ​ຢາ ​ແລະ ຜະລິດ​ຕະພັນ​ການ​ແພດ ​ຈຳນວນ​ໜຶ່ງ ຍັງ​ເຄື່ອນ​ໄຫວ​ ບໍ່​ຖືກຕ້ອງ​ຕາມ​ລະບຽບ, ຂໍ້​ກຳນົດ ​ແລະ ກົດໝາຍ ​ຂອງ​ກະຊວງ​ວາງ​ອອກ.

ສຳລັບ ​ຜູ້​ທີ່​ບໍ່​ໄດ້​ຮັບ​ອະນຸຍາດ ​ຈາກ​ກະຊວງ​ສາທາລະນະ​ສຸກ ມີ​ການ​ເປີດ​ບໍລິການ​ ຫ້ອງ​ກວດ​ພະຍາດ​ເອກະ​ຊົນ, ຄລີ​ນິກ, ​ໂຮງ​ໝໍ​ເອກະ​ຊົນ, ຮ້ານ​ຂາຍ​ຢາລວມທັງ ​ຜູ້​ທີ່​ບໍ່​ໄດ້​ສະ​ເໜີ ​ແລະ ຜູ້​ທີ່​ກຳລັງ​ສະ​ເໜີ​ຂໍອະນຸຍາດ ​ໃຫ້​ ປິດ​ການ​ບໍລິການ​ກ່ອນ ລໍຖ້າ​ດຳ​ເນີນ​ຂັ້ນ​ຕອນ ​ເອກະສານ​ຖືກຕ້ອງ ​ຕາມ​ລະບຽບກົດ​ໝາຍ; ຜູ້​ທີ່​ໄດ້​ຮັບ​ອະນຸຍາດ​ ຈາກ​ກະຊວງ​ສາທາ​ລະນະ​ສຸກ ​ໃຫ້​ກວດຄືນ ​ການ​ເຄື່ອນ​ໄຫວ​ບໍລິການ​ວ່າ​ ຖືກຕ້ອງ​ຕາມ​ໃບ​ອະ​ນຸ​ຍາດ ​ແລະ ວິຊາ​ຊີບ​ ທີ່​ໄດ້​ຮັບ​ອະນຸຍາດ​ ຫລື ບໍ່ ​ເຊັ່ນ: ​ໃຫ້​ປິ່ນປົວ​ທົ່ວ​ໄປ​ ແຕ່​ເຄື່ອນ​ໄຫວ​ປະສູດ-ພະຍາດ​ຍິງ, ອະນຸຍາດ​ໃຫ້​ເຄື່ອນ​ໄຫວ​ ປະສູດ​ພະຍາດ​ຍິງ ​ແຕ່​ເຮັດ​ການ​ປະສົມ​ພັນ​ທຽມ​ ໃນ​ພາວະ​ມີ​ລູກ​ຍາກ, ອະນຸຍາດ​ ໃຫ້​ເປີດ​ນອກ​ໂມງ​ການ ​ແຕ່​ພັດ​ເປີດ ​ໃນ​ໂມງ​ການ, ມີ​ການ​ຂະ​ຫຍາ​ຍສາຂາ​ ໂຮງ​ໝໍ​ເອກະ​ຊົນ ຢູ່​ນອກ​ສະຖານ​ທີ່ ​ເຮັດ​ຄື​ກັບ​ຫ້ອງ​ກວດ​ພະຍາດ ​ເຂດ​ນອກ, ​ໂດຍ​ບໍ່​ໄດ້​ຮັບ​ອະນຸຍາດ​ອື່ນໆ ຖ້າ​ກວດ​ພົບ ​ໃຫ້​ກ່າວ​ເຕືອນ, ຂຽນ​ບົດ​ບັນ​ທຶກ ​ຮ່ວມ​ກັນ ​ແລະ ​ໃຫ້​ຢຸດຕິ​ການ​ເຄື່ອນ​ໄຫ​ວ ທີ່​ບໍ່​ຖືກຕ້ອງ, ຖ້າ​ກວດ​ພົບ​ຄັ້ງ​ຕໍ່​ໄປ ຍັງ​ດຳ​ເນີນ​ກິດຈະການ​ ທີ່​ບໍ່​ຖືກຕ້ອງ ​ໃຫ້​ປິດ​ກິດຈະການ ​ແລະ ປະຕິບັດ​ວິ​ໄນ ​ຕາມ​ກົດໝາຍ;

ຜູ້​ທີ່​ໄດ້​ຮັບ​ການ​ສ້າງ​ຕັ້ງ ​ຫ້ອງ​ກວດ​ພະຍາດ​ເອກະ​ຊົນ ຂອງ​ຕົນ​ເອງ ​ໃຫ້​ຄົນ​ອື່ນ​ເຊົ່າ, ຮ່ວມ​ທຶນ, ຮ່ວມ​ວິຊາ​ການ ​ແລະ ອື່ນໆ ຫລື ​ໃນ​ກໍລະນີ​ ເຈົ້າ​ຂອງ​ຫ້ອງ​ກວດ​ພະຍາດ ​ເສຍ​ຊີວິດ ​ໃຫ້​ໂຈະ ​ການ​ບໍລິກາ​ນກ່ອນ ລໍຖ້າ​ດຳ​ເນີນ​ຂັ້ນ​ຕອນ ​ເອກະສານ​ຖືກຕ້ອງ​ຕາມ​ລະບຽບ​ການ; ຜູ້​ທີ່​ໄດ້​ຮັບ​ອະນຸຍາດ ​ຖືກຕ້ອງ ມີ​ການ​​ໂຄສະນາ​ເກີນ​ຄວາມ​ຈິງ ​ດ້ວຍ​ຮູບ​ການ​ຕ່າງໆ, ຕົບ​ແຕ່ງ​ສະຖານ ​ທີ່​ບໍລິການ​ປິ່ນປົວ, ຈັດ​ວາງ​ ປ້າຍ​ໂຄສະນາ ທີ່​ມີ​ລັກສະນະ ​ການ​ຄ້າ, ລົງ​ເຄື່ອນ​ໄຫວ​ໂຄສະນາ​ ຢູ່​ຊຸມ​ຊົນ ​ໃຫ້​ຢຸດຕິ​ການ​ ໂຄສະນາ ​ແລະ ປົດ​ປ້າຍ​ລົງ ​ໃຫ້​ແນະນຳ​ກ່າວ​ເຕືອນ ພ້ອມ​ເຮັດ​ບົດ​ບັນ​ທຶນ, ຖ້າ​ກວດ​ພົບ​ຄັ້ງ​ຕໍ່​ໄປ ​ໃຫ້​ສັ່ງ​ປິດ​ກິດຈະການ​ທັນ​ທີ; ສຳລັບ ​ຜູ້​ທີ່​ນຳ​ເຂົ້າ​ອຸປະກອນ​, ຢາ ​ແລະ ຜະລິດ​ຕະພັນ ​ການ​ແພດ ທີ່​ບໍ່​ໄດ້​ຂຶ້ນ​ທະບຽກ ຖື​ກຕ້ອງ, ຢາ​ບໍ່​ມີ​ສະຫລາກ ມາ​ບໍລິການ​ປິ່ນປົວ ​ໃນ​ຫ້ອງ​ກວດ​ພະຍາດ ​ເອກະ​ຊົນ, ​ໂຮງໝໍ​ເອກະ​ຊົນ ຖ້າ​ກວດ​ພົບ​ໃ ຫ້​ແນະນຳ​ກ່າວ​ເຕືອນ ພ້ອມ​ເຮັດ​ບົດ​ບັນທຶກ​ໄວ້້ ຖ້າ​ກວດ​ພົບ​ຄັ້ງຕໍ່​ໄປ​ ແມ່ນ​ໃຫ້ຢຶດຢາ ​ແລະ ອຸປະກອນ​ໄວ້​ ເປັນ​ຫລັກ​ຖານ ​ແລ້ວ​ດຳ​ເນີນ​ຕາມ​ລະບຽບ​ກົດ ໝາຍ; ກໍລະນີ​ພົບ​ເຫັນ ​ການ​ໂອນ​ ຫລື ​ເຊົ່າ​ໃບ​ອະນຸຍາດ ​ວິຊາ​ຊີບ​ເພ​ສັດ​ຊະ​ກຳ​ໃຫ້​ຜູ້​ອື່ນ​ນຳ​ໃຊ້ ​ໃຫ້​ປະຕິບັດ​ມາດ​ຕະການ ​ສຶກສາ​ອົບຮົມ​ ​ແລະ ​ເຮັດ​ບົດ​ບັນ​ທຶກ​ໄວ້ ຖ້າ​ພົບ​ເຫັນ​ຄັ້ງ​ຕໍ່​ໄປ ​ໃຫ້​ປິດ ​ກິດຈະການ​ຖາວອນ;

ສຳລັບ ​ຜູ້​ທີ່​ດຳ​ເນີນ​ທຸລະ​ກິດ ​ດ້ານ​ຢາ ​ແລະ ຜະລິດ​ຕະພັນ​ການ​ແພດ​ ບໍ່​ໄດ້​ຮັບ​ອະນຸດ​ຍາດ ຈາກ​ກະຊວງ​ສາທາ ລະນະ​ສຸກ ​ໃຫ້​ໂຈະ ​ທຸລະ​ກິດ​ກ່ອນ ລໍຖ້າ​ດຳ​ເນີນ ​ຂັ້ນ​ຕອນ​ເອກະ​ສານ​ຖືກຕ້ອງ​ ຕາມ​ລະບຽບ​ກົດໝາຍ; ສຳລັບ​ ຜູ້​ທີ່​ດຳ​ເນີນ​ທຸລະ​ກິດ​ຮ້ານ​ຂາຍ​ຢາ ​ຢູ່​​ໃນ​ຕະຫລາດ, ຢູ່​ຫ້ອງ​ກວດ​ພະ​ຍາດ ​ເອກະ​ຊົນ ຫລື ຄລີ​ນິກ ມີ​ການ​ຂາຍ​ຢາ ​ເກີນ​ບັນຊີ​ຢາ ທີ່​ຕົນ​ຮັບ​ອະນຸຍາດ​ ໃຫ້​ຂາຍ, ມີ​ການ​ໃຊ້​ສະຖານ​ທີ່​ຂາຍ​ຢາ​ ເປັນ​ບ່ອນ​ກວດ​ພະ​ຍາດ ​ແລະ ປິ່ນປົວ​ຄົນ​ເຈັບ, ຍົກຍ້າຍ​ ສະຖານ​ທີ່​ບໍ່​ໄດ້​ຮັບ​ອະນຸຍາດ ​ແມ່ນ​ ໃຫ້​ແນະນຳກ່າວ​ເຕືອນ ພ້ອມ​ເຮັດ​ບົດ​ບັນທຶກ​ໄວ້ ​ໃນ​ປຶ້ມ​ຕິດຕາມ ​ແລະ ​ໃຫ້​ຂຽນ​ໃບ​ປະຕິຍານ ຖ້າ​ພົບ​ເຫັນ​ຄັ້ງ​ຕໍ່​ໄປ ​ຍັງ​ເຄື່ອນ​ໄຫວ​ບໍ່​ຖືກຕ້ອງ ບໍ່​ຕໍ່​ທະບຽນ​ວິຊາຊີບ ​ເພສັດຊະກໍາ ​ແລະ ສັ່ງ ​ປິດ​ກິດຈະການ​ທັນ​ທີ.

ພ້ອມ​ນີ້, ຜູ້​ທີ່​ດຳ​ເນີນ​ການ​ຜະລິດ, ນຳ​ເຂົ້າ ​ແລະ ຈຳໜ່າຍ​ຢາ ບໍ່​ໄດ້​ຮັບອະນຸຍາດ ​ແລະ ບໍ່​ໄດ້​ຂຶ້ນ​ທະບຽນ ນຳ​ກະຊວງ ​ສາທາລະນະ​ສຸກ ຖ້າ​ພົບ​ເຫັນ ​ໃຫ້​ຢຶດຜະລິດ​ຕະພັນ ​ແລະ ​ແນະນຳ​ ກ່າວ​ເຕືອນ ຖ້າ​ພົບ​ເຫັນ​ຄັ້ງ​ຕໍ່​ໄປ ​ໃຫ້​ຍຶດຜະລິດ​ຕະພັນ ​ແລະ ປັບ​ໄໝ 100% ຂອງ​ມູນ​ຄ່າ​ຢາ​ ທີ່​ຈຳໜ່າຍ​ໃນ​ທ້ອງ​ຕະຫລາດ ​ຕໍ່​ໜຶ່ງ​ລາຍການ ​ແລະ ສັ່ງ​ປິດ​ກິດຈະການ 1 ປີ, ຖ້າ​ຍັງ​ບໍ່​ຢຸດ​ເຊົາ​ ໃຫ້​ຍຶດຜະລິດ​ຕະພັນ ​ແລະ ປັບ​​ໄໝ 200% ຂອງ​ມູນ​ຄ່າ​ຢາ​ ທີ່​ຈຳ​ໜ່າຍ​ໃນ​ທ້ອງ​ຕະຫລາດ ​ແລະ ປິດ​ກິດຈະ​ການ ​ຢ່າງ​ຖາວອນ; ກໍລະນີ​ພົບ​​ເຫັນ ການ​ເຜີຍ​ແຜ່ ​ແລະ ​ໂຄສະນາ​ ຜະລິດ​ຕະພັນ​ອາຫານ ຫລື ອາຫານ​ເສີມ ລວມທັງ ​ຜະລິດ​ຕະພັນ​​ເສີມສຸຂະພາບ ​ແລະ ​ເຄື່ອງ​ສຳ​ອາງ ທີ່​ກ່າວ​ອ້າງ​ເຖິງ​ສັບພະ​ຄຸນ​ ໃນ​ການ​ປິ່ນປົວ​ພະຍາດ ທັງ​ພາກ​ລັດ ​ແລະ ​ເອກະ​ຊົນ ​ໃຫ້ ​ແນະນຳ​ກ່າວ​ເຕືອນ ​ແລະ ສຶກສາ​ອົບຮົມ, ພ້ອມ ​ເຮັດ​ບົດ​ບັນທຶກ ​ແລະ ຂຽນ ​ໃບ​ປະຕິຍານ, ຖ້າ​ພົບ​ເຫັນ​ຄັ້ງຕໍ່​ໄປ ​ປັບ​ໄໝ 1.500.000 ກີບ ​ແລະ ຍັງ​ສືບ​ຕໍ່​ກະທຳ​ຜິດ​ອີກ ໃຫ້​ປັບ​ໄໝ 3.000.000 ກີບ ​ແລະ ​ໃຫ້​ຖອນ​ໃບ​ທະບຽນ ຫລື ຈົດ​ແຈ້ງ​ຜະລິດ​ຕະພັນ ຖ້າ​ຮ້າຍ​ແຮງ​ ຈະ​ຖືກ​ປະຕິບັດ​ຕາມ​ລະບຽບ​ກົດໝາຍ.

 

ແຫລ່ງຂ່າວ : ຂ່າວສານປະເທດລາວ

ອອກ​ຈາກ REPLY ເປັນ

Please enter your comment!
Please enter your name here