ມາເຝິກວິທີຄິດ ແບບຄົນເບິ່ງໂລກໃນແງ່ດີນຳກັນເທາະ!

0
381

ເຮົາສາມາດຶງເອົາພະລັງຂອງການຄິດບວກມາໃຊ້ ຊ່ວຍສ້າງສິ່ງທີ່ປາຖະໜາໄດ້ ດ້ວຍການຄິດແລະເວົ້າສິ່ງທີ່ເຮັດໃຫ້ຕົນເອງຮູ້ສຶກດີເປັນປະຈຳຊູ່ມື້ ແລະນີ້ກໍຄືປະໂຫຍກດີໆ 7 ປະໂຫຍກທີ່ເຮົາຄວນຫັດແອບເອົາມານຳໃຊ້ ເມື່ອຕ້ອງປະເຊີນບັນຫາຫຼືອຸປະສັກທາງຄວາມຄິດຂອງຕົນເອງ.

1. ຈົ່ງເຊື່ອວ່າເຮົາຍັງມີໂອກາດຢູ່ສະໝີ
ຄວາມຄຽດແລະຄວາມຢ້ານມັກຈະຈຳກັດຈິນຕະນາການຂອງເຮົາໄວ້ ເຮັດໃຫ້ບໍ່ອາດຈະເຫັນພາບອະນາຄົດທີ່ສວຍງາມ ແລະກ້າວໜ້າກວ່າເກົ່າ ແຕ່ຖ້າເຮົາເຊື່ອໃນການເບິ່ງເຫັນຂອງໂຕເອງ ດວງຕາຂອງເຮົາຈະເປີດກວ້າງ ສູ່ວິທີແກ້ບັນຫາແລະຄວາມຄິດໃໝ່ໆ.
2. ຈົ່ງເຊື່ອວ່າທ່ານມີຄວາມຄິດສ້າງສັນ ແລະສະຫຼຽວສະຫຼາດ
ປະໂຫຍກນີ້ຈະຊ່ວຍໃຫ້ເຮົາໂຟກັດທີ່ຄວາມສາມາດຂອງຕົນເອງ ຈົ່ງລະນຶກສະເໝີວ່າຕົນເອງມີຄວາມສາມາດ ມີພອນສະຫວັນ ແລະມີສະຕິປັນຍາຂະໜາດໃດ ເວົ້າໃຫ້ກຳລັງໃຈຕົນເອງ ເຊັ່ນ “ເຮົາເຮັດໄດ້” ຫຼື “ເຮົາພັດທະນາການມາໄກຫຼາຍ” ແທນທີ່ຈະໄປນຶກເຖິງແຕ່ວ່າເຮົາຢູ່ຫ່າງໄກຈາກເປົ້າໝາຍເທົ່າໃດ.
3. ຈົ່ງຄາດຫວັງວ່າຈະມີສິ່ງດີໆ ເກີດຂຶ້ນ
ເວລາເຮົາພົບເຫດການທີ່ບໍ່ສູ້ດີ ເຮົາກໍມັກຄິດເຖິງເລື່ອງທີ່ບໍ່ດີທີ່ສຸດທີ່ອາດຈະເກີດຂຶ້ນກ່ອນສະເໝີ ແຕ່ການເຝິກຈິດໃຈ ໂດຍການໂຟກັດທີ່ຄວາມຄາດຫວັງຈະມີສິ່ງດີໆ ເກີດຂຶ້ນ ຈະເຮັດໃຫ້ເຮົາສາມາດປ່ຽນມຸມມອງຕໍ່ໂລກໄດ້.
ປະໂຫຍກນີ້ຈະຊ່ວຍໃຫ້ທ່ານເປີດໂອກາດໃຫ້ກັບຜົນລັບທີ່ດີແລະຄາດບໍ່ເຖິງ ແລະເຮົາຈະເລິ່ມເບິ່ງເຫັນສິ່ງທີ່ເກີດຂຶ້ນໃນທາງບວກຫຼາຍກວ່າຄວາມຜິດຫວັງ.
4. ຖ້າຮູ້ສຶກທໍ້ຖອຍຂາດກຳລັງໃຈ ໃຫ້ບອກໂຕເອງວ່າ “ມັນບໍ່ເຫັນຫຍັງ…ເລິ່ມໃໝ່ກໍໄດ້”
ຄວາມຮູ້ສຶກທໍ້ຖອຍໃຈ ສາມາດພາໄປສູ່ການປ່ຽນແປງໃນທາງທີ່ດີຂຶ້ນໄດ້ ດັ່ງນັ້ນ, ເຮົາຄວນຍອມຮັບມັນດີກວ່າ ແທນທີ່ຈະຫຼີກລ່ຽງຫຼືໂທດໂຕເອງ ປ່ຽນຄວາມຜິດຫວັງແລະໃຈຮ້າຍໃຫ້ກາຍເປັນຄວາມຮູ້ສຶກທີ່ດີ ເພາະມັນຈະກະຕຸ້ນໃຫ້ທ່ານຮູ້ສຶກວ່າ “ພໍເສຍທີ” ແລະລຸກຂຶ້ນມາປ່ຽນແປງສະຖານະການໃນທີ່ສຸດ.
5. ຈົ່ງເຊື່ອວ່າເຮົາມີວິໄສທັດກວ້າງໄກ
ການຈະສ້າງສິ່ງທີ່ຍິ່ງໃຫຍ່ຕ້ອງໃຊ້ເວລາ ຕ້ອງຜ່ານສະຖານະການທີ່ໜັກໜ່ວງ ຈົນທັດສະນະວິໄສຂອງເຮົາອາດຈະແຄບລົງໄດ້ ໃນໄລຍະເວລາເຫຼົ່ານີ້ ສິ່ງສຳຄັນຄືການຮັກສາວິໄສທັດຂອງໂຕເອງໃຫ້ກວ້າງໄກເອົາໄວ້ ແຕ່ກໍຕ້ອງຍອມຮັບໃນຈຸດທີ່ເຮົາຢືນຢູ່ ໃນປັດຈັບນນຳພ້ອມ.
6. ຈົ່ງເຊື່ອວ່າເຮົາມີຄຸນຄ່າ
ທັດສະນະແລະມຸມມອງຂອງທ່ານຈະປ່ຽນໄປເມື່ອເຮົາເບິ່ງເຫັນຄຸນຄ່າຂອງສິ່ງຕ່າງໆ ບໍ່ວ່າໃນສະຖານະການໃດ ເຮົາຈະຢຸດໃສ່ໃຈກັບສິ່ງທີ່ຂາດຫາຍ ແລະນຶກເຖິງສິ່ງທີ່ມີຢູ່ໄດ້.
7. ຈົ່ງໃຫ້ຄວາມສຳຄັນກັບຂະບວນການເຮັດວຽກ
ແນ່ນອນວ່າ ຄົນທີ່ໂຟກັດແຕ່ກັບຜົນລັບ ຈະຕ້ອງຢູ່ກັບຄວາມວິຕົກກັງວົນ ຕາບໃດທີ່ຍັງບໍ່ເຫັນຜົນລັບ, ມາລອງໃຊ້ເຄັດລັບຈາກ ເຈບ ເບໂຊດ ປະທານບໍລິຫານແຫ່ງບໍລິສັດ Amazon ດີກວ່າ ເຂົາມຸ່ງເນັ້ນໄປທີ່ການທົດລອງຂະບວນວິທີການເຮັດວຽກໃໝ່ໆ ແທນທີ່ຈະສົນໃຈແຕ່ຜົນລັບ ແລະຖ້າຫາກວິທີໃດລົ້ມແຫຼວ ກໍພຽງແຕ່ປ່ຽນມາລອງວິທີໃໝ່ເທົ່ານັ້ນເອງ. ຈົ່ງສະໜຸກສະໜານໄປກັບການຄົ້ນຫາຂະບວນການເຮັດວຽກທີ່ດີທີ່ສຸດເອົາໄວ້ ແລະຢ່າເອົາແຕ່ແຂວນຄວາມສຸກໄວ້ເທິງຄວາມຄາດຫວັງແລະຜົນລັບເທົ່ານັ້ນລະ.
ຈື່ໄວ້ວ່າເຮົາບໍ່ສາມາດຄວບຄຸມສະຖານະການຂອງເຮົາໄດ້ຕະຫຼອດເວລາ ຫາກແຕ່ສາມາດຄວບຄຸມຄວາມຄິດຂອງໂຕເອງໄດ້ ການຮັກສາທັດສະນະຄະຕິທາງບວກເປັນສິ່ງທີ່ສຳຄັນ. ດັ່ງນັ້ນ, ຈົ່ງເຊື່ອໝັ້ນໃນສິ່ງທີ່ເໝາະສົມກັບທ່ານຫຼາຍທີ່ສຸດ ດັ່ງທີ່ ດຣ ເວເນ ດາຍເອີ (DR. WAYNE DYER) ຜູ້ຊ່ຽວຊານດ້ານການພັດທະນາສ່ວນບຸກຄົນ ທີ່ມີຊື່ສຽງກ່າວໄວ້ວ່າ “ທຸກສິ່ງປ່ຽນໄປຕາມວິທີທີ່ເຮົາເລືອກເບິ່ງມັນສະເໝີ”.
ບົດຄວາມຈາກ: Inc

ອອກ​ຈາກ REPLY ເປັນ

Please enter your comment!
Please enter your name here