ລັດຖະບານຣັດເຊຍ ສືບຕໍ່ໃຫ້ທຶນການສຶກສາແກ່ລາວ

0
385

ສະຖານທູດ​ຣັດ​ເຊຍ​ຮ່ວມ​ກັບສູນ​ວິທະຍາສາດ ແລະ ວັດ​ທະນະ​ທຳ​ຣັດ​ເຊຍ​ປະຈຳ​ລາວ ຈັດງານ​ລ້ຽງ​ສົ່ງ​ນັກ​ສຶກ​ສາ​ລາວ ເພື່ອ​ໄປ​ຮຽນ​ຕໍ່​ທີ່​ປະເທດ​ຣັດ​ເຊຍ ໃນ​ວັນ​ທີ 21 ກັນຍາ 2017 ທີ່​ສະຖານ​ທູດ​ຣັດ​ເຊຍ ປະຈຳ​ລາວ ມີທ່ານ ບົວ​ລານ ສີ​ລິ​ປັນຍາ ຮອງລັດຖະມົນຕີ ກະຊວງ​ສຶກ​ສາ​ທິການ ແລະ ກີລາ ທ່ານ ມີ​ກາ​ອິນ ບາ​ຣາ​ນັອບ ເອກ​ອັກ​ຄະ​ລັດ​ຖະທູດ​ຣັດ​ເຊຍ ປະຈຳ​ລາວ ທ່ານຮອງ​ປະທານ​ສະມາຄົມ​ມິດ​ຕະພາບ ລາວ-ຣັດ​ເຊຍ ທ່ານ​ອຳນວຍ​ການ​ສູນ​ວິທະຍາສາດ ແລະ ວັດທະນະທຳ​ຣັດ​ເຊຍ ປະຈຳ​ລາວ ຜູ້​ປົກຄອງ​ນັກ​ສຶກ​ສາ ແລະ ແຂກຖືກ​ເຊີນ​ເຂົ້າ​ຮ່ວມ.

ນັບ​ແຕ່​ປີ 2014 ເປັນຕົ້ນ​ມາ ລັດຖະບານ​ຣັດ​ເຊຍ ​ໄດ້​ໃຫ້ການສະໜັບສະໜູນ​ດ້ານ​ການ​ພັດ​ທະນາ​ຊັບພະຍາກອນ​ມະນຸດ​ແກ່ລາວ ສະເພາະ​ປີ 2017 ໄດ້​ໃຫ້ທຶນ​ນັກ​ສຶກ​ສາ​ໄປ​ຮຽນ​ຕໍ່​ຈຳນວນ 81 ຄົນ ຍິງ 35 ຄົນ ໃນ​ນີ້ ມີ​ລະດັບ​ປະ ລິນຍາ​ເອກ 3 ຄົນ ຍິງ 1 ຄົນ ໃນ​ສາຂາ​ພົວພັນ​ຕ່າງປະເທດ ແລະ ໄຟຟ້າ ລະດັບ​ປະລິນຍາ​ໂທ 20 ຄົນ ແລະ ເຫຼືອ​ນັ້ນ​ແມ່ນ​ສຶກສາ​ຕໍ່​ໃນ​ລະດັບ​ປະລິນຍາ​ຕີ ສຳລັບ​ສາ​ຊາວິຊາ​ຮຽນ​ຫຼັກ ແມ່ນ​ຄະນະ​ພົວພັນຕ່າງປະເທດ ບໍລິຫານ​ທຸລະ​ກິດ ການເມືອງ​ການ​ປົກຄອງ ສະ​ຖາປາ​ນິດ ການ​ແພດ ແລະ ວິຊາການ​ດ້ານ​ເຕັກນິກ​ຕ່າງໆ ແລະ ໃນ​ປີ​ຕໍ່​ໄປ​ລັດຖະບານ​ຣັດ​ເຊຍ ຈະເພີ່ມ​ທຶນ​ການ​ສຶກ​ສາ​ໃຫ້​ແກ່​ລາວຂຶ້ນ​ເປັນ 90 ທຶນ​ຕໍ່​ປີ.

ສຳລັບ​ວິຊາ​ຮຽນ​ທີ່​ກຳລັງ​ໄດ້ຮັບ​ຄວາມ​ນິຍົມ ​ທີ່​ນັກ​ສຶກ​ສາ​ໃຫ້ຄວາມ​ສົນໃຈ​ໄປ​ຮຽນ​ຕໍ່​ທີ່​ຣັດ​ເຊຍ ແມ່ນ​ສາ​ຊາ​ວິຊາ​ບໍລິ ຫານ​ທຸລະກິດ ຮອງ​ລົງ​ມາ​ແມ່ນ​ສາຂາ​ວິຊາ​ພົວພັນ​ຕ່າງປະເທດ ແລະ ບັນດາ​ວິຊາ​ການ​ທາງ​ດ້ານ​ເຕັກນິກຕ່າງໆ ເຊິ່ງ​ນັກ​ສຶກ​ສາ​ເຫຼົ່າ​ນີ້ ນອກຈາກ ຈະ​ໄດ້​ຮຽນ​ເອົາ​ຄວາມຮູ້​ທາງ​ດ້ານ​ເຕັກນິກ​ວິຊາ​ການແລ້ວ ຍັງ​ຈະ​ໄດ້​ຮຽນ​ຮູ້​ວັດທະ ນະທຳ-ສັງຄົມ ເປັນ​ການ​ປະກອບສ່ວນ​ເຂົ້າ​ໃນ​ການ​ເສີມ​ສ້າງ ​ສາຍພົວພັນ​ມິດຕະພາບ​ທີ່​ມີ​ມູນເຊື້ອມາ​ແຕ່​ດົນ​ນານ​ຂອງ​ສອງ​ປະເທດ ກໍ່​ຄືປະຊາຊົນ​ສອງ​ຊາດ ລາວ-ຣັດ​ເຊຍ ໃຫ້​ໝັ້ນຄົງ​ທະ​ນົງແກ່ນ ແລະ ຮ່ວມ​ກັນ​ພັດທະນາເສດຖະກິດ-ສັງຄົມ ໃຫ້​ຈະເລີນວັດທະນາ​ຖາວອນ.

 

ແຫລ່ງຂ່າວ: ໜັງສືພິມວຽງຈັນໃໝ່

ອອກ​ຈາກ REPLY ເປັນ

Please enter your comment!
Please enter your name here