ຄວາມເຊື່ອຖືໃນສາສະໜາໄປທາງບໍ່ຖືກຕ້ອງປາກົດມີຂຶ້ນ

1
749

ຜ່ານການຕິດຕາມສະພາບການເຄື່ອນໄຫວສາສະໜາຢູ່ລາວໃນໄລຍະຜ່ານມາເຫັນວ່າ: ຍັງມີບາງຄົນ, ສາສະນິກະຊົນຈໍານວນໜຶ່ງເຊື່ອຖືສາສະໜາຂອງຕ່າງປະເທດ ແລະ ໄດ້ຈັດກິດຈະກໍາທາງສາສະໜາບໍ່ໄປຕາມຫລັກສີນທໍາຄໍາສອນຂອງພະເຈົ້າ,​ ມີການປະຕິເສດກົດເກນຂະຫຍາຍຕົວຂອງສັງຄົມມະນຸດ ແລະ ກົດເກນທໍາມະຊາດ, ຝືນຕໍ່ຫລັກວິທະຍາສາດ, ມີຄວາມໃຝ່ຝັນຕໍ່ສິ່ງເໜືອທໍາມະຊາດ, ໂດຍປາກົດການດັ່ງກ່າວເຖິງວ່າຈະເກີດຢູ່ປະເທດໃດ, ລະບອບການເມືອງໃດກໍຍ່ອມຮັບບໍ່ໄດ້ ເຊັ່ນ: ກໍລະນີເກີດຂຶ້ນເມື່ອປີ 2003 ມີປະຊາຊົນຜູ້ເຊື່ອຖືຢູ່ບ້ານແຫລ້ ເມືອງຄູນ ແຂວງຊຽງຂວາງລົງມືຂ້າເມຍຕົນເອງເພື່ອບູຊາພະເຈົ້າ, ຕໍ່ມາມີປະກົດການມີຄົນປີນຜາແລ້ວໂດດລົງມາເພື່ອຫວັງຈະບິນໄປຫາພະເຈົ້າ, ໃນປີ 2016 ຢູ່ເມືອງຄໍາ ແຂວງຊຽງຂວາງມີກໍລະນີແມ່ຂ້າລູກ 3 ຄົນ ແລະ ຂ້າຕົນ ເອງຕາຍຕາມເພື່ອຫວັງໄປຢູ່ນໍາພະເຈົ້າ ແລະ ລ້າສຸດເມື່ອເດືອນພຶດສະພາ 2017 ນີ້, ທ້າວ ໄທຢາງ ຢູ່ບ້ານດົງ ເມືອງບໍລິຄັນ ແຂວງບໍລິຄໍາໄຊ ເປັນຜູ້ນັບຖືສາສະໜາຄຣິສ, ໄດ້ພາຄອບຄົວຂອງຜູ້ກ່ຽວໄປນອນເຮັດກິດຈະກໍາທາງສາສະໜາຢູ່ຖຽງສວນຢາງພາລາຂອງຕົນ ແລ້ວສ້າງວິທີຫລອກລວງຄອບຄົວ, ລູກເມຍແກ້ເປືອຍຕົວແລ້ວເອົາຄ້ອນທູບຫົວແຕ່ລະຄົນຈົນເສຍຊີວິດແລ້ວຈົກສະໝອງຫວ່ານເພື່ອຖວາຍພະເຈົ້າ, ເຫດການອັນຊົ່ວຮ້າຍຄັ້ງນີ້ມີຜູ້ເສຍຊີວິດ 6 ຄົນ. ນອກນີ້ຍັງມີບາງກຸ່ມຄົນຈໍານວນໜຶ່ງຫາວິທີຕົວະຍົວະປະຊາຊົນຜູ້ຮູ້ເທົ່າບໍ່ເຖິງການໃຫ້ມີຄວາມໃຝ່ຝັນຫາສິ່ງທີ່ບໍ່ເປັນຄວາມຈິງ ແລະ ກ້າວໄປສູ່ການກະທໍາທີ່ຂັດຕໍ່ລະບຽບກົດໝາຍ.

ສ່ວນໃນສາສະໜາພຸດ ກໍປາກົດວ່າມີພະສົງ, ພຸດທະສາຊະນິກະຊົນຈໍານວນໜຶ່ງທັງຢູ່ໃນຕົວເມືອງ ແລະ ທ້ອງຖິ່ນຕ່າງໆ ມີການເຄື່ອນໄຫວແຜ່ປັດໄຈຊະຊາຍຢູ່ຕາມຕະຫລາດ, ຖະໜົນຫົນທາງດ້ວຍວິທີແຈກຊອງ, ເອົາຄ້ອງ, ກອງ, ພະພຸດທະຮູບຕ່າງໆໃສ່ລົດ ແລະ ອື່ນໆ ໂຄສະນາຊວນເຊື່ອເພື່ອສວຍໂອກາດແຜ່ປັດໄຈໂດຍບໍ່ຖືກຕ້ອງ, ມີພະສົງບາງອົງເຄື່ອນໄຫວບໍ່ສອດຄ່ອງກັບຫລັກທໍາມະວິໄນ, ຫາຜົນປະໂຫຍດໃສ່ຕົນເອງ ແລະ ມີການປະພຶດບໍ່ເໝາະສົມກັບສະມະນະເພດ ແລະ ນອກນີ້ຍັງມີປາກົດການເຊື່ອຖືງົມງວາຍຕ່າງໆ.

ແຫລ່ງຂ່າວ: ໜັງສືພິມລາວພັດທະນາ.

1 ຄວາມ​ຄິດ​ເຫັນ

  1. ຂອບໃຈທີ່ລົງໃຫ້ອ່ານ ແຕ່ທ່ານຮູ້ດີກ່ຽວກັບຄວາມເຊື່ອທາງສາດສະໜາຄຣິສຕຽນດີຫຼາຍປານໃດກ່ອນຈະລົງເລື່ອງເລົ່ານີ້ ໄດ້ທຳການບ້ານຫຼືໄດ້ຫາຂໍ້ມູນແນ່ຊັດບໍ່ ກ່ອນເຜີຍແຜ່? ຫາກທ່ານມີເວລາ ຢາກໃຫ້ອ່ານພຣະຄຳພີຂອງຄຣິສຕຽນແລະບອກແນ່ວ່າມີຂໍ້ໄດ້ທີ່ພຣະເຢຊູສອນໃຫ້ຂ້າຄົນຂ້າຕົວເອງ? ແຕ່ເພີ່ນສອນວ່າໃຫ້ຮັກເພື່ອນບ້ານເໝືອນຮັກຕົວເອງນະ ບາງຄົນອາດໃຊ້ຄວາມຄິດຂອງຕົວເອງກໍເຮັດໄປຕາມໃຈມັກໍໄປເຮັດແບບຜິດໆນັ້ນ ຊຶ່ງບໍ່ໄດ້ມາຈາກຄຳສອນຂອງພຣະເຢຊູຄຣິສເລີຍ

    ສຸດທ້າຍ ຢາກຂໍແນະນຳໃນການເປັນນັກຂຽນຂ່າວທີ່ດີຄື ຕ້ອງກວດກາຄຳເວົ້າ ຕ້ອງກວດກາວ່າເຮົາສະກົດຂຽນຄຳເວົ້າຖືກຕ້ອງບໍ່ກ່ອນມາລົງເຜີຍແຜ່ໃຫ້ມວນຊົນໄດ້ອ່ານ ມີຫຼາຍຄຳເຫຼືອເກີນທີ່ສະກົດຜິດຢູ່

ອອກ​ຈາກ REPLY ເປັນ

Please enter your comment!
Please enter your name here