ເຂື່ອນໄຟຟ້າດອນສະໂຮງ ຄືບໜ້າ 31% ຄາດສໍາເລັດພາຍໃນປີ 2019

0
243

ຂປລ. ອາທິດຜ່ານມານີ້, ທ່ານ ໂມ ໄອນິ ອາຕານ ( Mohd Aini Atan) ເອກອັກຄະລັດຖະທູດມາເລເຊຍປະຈໍາລາວ ໄດ້ເຄື່ອນໄຫວຢ້ຽມຢາມ ແລະ ຕິດຕາມໂຄງການກໍ່ສ້າງ​ເຂື່ອນໄຟຟ້າດອນ​ສະ​ໂຮງ ຢູ່ແຂວງຈໍາປາສັກ ຂະນະທີ່ການຈັດຕັ້ງປະຕິບັດວຽກງານຂອງໂຄງການດັ່ງກ່າວຄືບໜ້າ 31% ແລະ ຄາດວ່າຈະສໍາເລັດພາຍໃນປີ 2019 ນີ້.

ລະຫວ່າງຢ້ຽມຢາມຄັ້ງນີ້, ທ່ານ ຊິມ ຊີ ເຊັງ ຜູ້ຄວບຄຸມຝ່າຍວຽກງານກໍ່ສ້າງໄດ້ແຈ້ງໃຫ້ຊາບວ່າ: ໂຄງການກໍ່ສ້າງ​ເຂື່ອນໄຟຟ້າດອນ​ສະ​ໂຮງຕັ້ງ ຢູ່ເມືອງໂຂງ ແຂວງຈຳປາສັກ ມາ​ຮອດ​ປັດຈຸບັນ ການກໍ່ສ້າງໂດຍລວມສຳເລັດ 31 % ພາຍຫລັງດຳເນີນການກໍ່ສ້າງ ມາແຕ່ເດືອນຕຸລາ 2015 ຄາດວ່າຈະໃຫ້ສຳເລັດ 100% ໃນ ທ້າຍປີ 2019 ປັດຈຸບັນ ພວມດຳເນີນສ້າງບ່ອນໂຮງຜະລິດໄຟຟ້າ ​ແລະ ອື່ນໆ.

ໂອກາດດັ່ງກ່າວນີ້ ທ່ານເອກອັກຄະລັດຖະທູດມາເລເຊຍ ກໍໄດ້ກ່າວສະແດງຄວາມຊົມເຊີຍ ແລະ ດີໃຈທີ່ເຫັນວ່າກໍ່ສ້າງໂຄງການຕົວຈິງ ມີຄວາມຄືບໜ້າຫລາຍ ແລະ ເຊື່ອວ່າໂຄງການນີ້ພາຍໃຕ້ການລົງທຶນຂອງນັກທຸລະກິດມາເລເຊຍ ຈະປະກອບສ່ວນສໍາຄັນເຂົ້າໃນການຊຸກຍູ້ແຜນພັດທະນາເສດຖະກິດ-ສັງຄົມ ແລະ ຈະຊ່ວຍເຮັດໃຫ້ ສປປ ລາວ ອອກຈາກສະຖານະພາບດ້ອຍພັດທະນາພາຍໃນປີ 2020. ພ້ອມນີ້ ທ່ານ ໂມ ໄອນິ ອາຕານ ກໍໄດ້ແນະນໍາໃຫ້ກຸ່ມນັກທຸລະກິດດັ່ງກ່າວ ຕ້ອງເອົາໃຈໃສ່ປະຕິບັດຕາມລະບຽບກົດໝາຍ ແລະ ຮັກສາໃຫ້ໄດ້ຄວາມເປັນລະບຽບຮ້ອຍ.

ເຂື່ອນໄຟຟ້າດອນສະໂຮງ ເປັນຝາຍນໍ້າລົ້ນທີ່ບໍ່ມີການເກັບກັກນ້ຳ ໂດຍແມ່ນບໍລິສັດ​​ເມັກກະເຟີຈາກປະເທດມາເລເຊຍ ​ເປັນຜູ້ຮັບເໝົາກໍ່ສ້າງ, ລວມມູນ​ຄ່າການລົງທຶນທັງໝົດ ​ຫລາຍກວ່າ 500 ລ້ານ ​ໂດລາສະຫະລັດ, ​ໃນ​ນັ້ນ ບໍລິສັດ​ດັ່ງກ່າວ ຖື​ຮຸ້ນ 80% ​ແລະ ລັດ​ວິ​ສາ​ຫະກິດ​ໄຟຟ້າ​ລາວ ຖື​ຮຸ້ນ 20%, ມີ​ອາຍຸ​ສຳ​ປະທານ 25 ປີ ​ເຊິ່ງເຂື່ອນດັ່ງກ່າວ ປະກອບມີ ​ເຄື່ອງ​ຈັກມີກຳລັງການຕິດຕັ້ງ 260  ເມກາວັດ, ສາມາດຜະລິດກະແສໄຟຟ້າ ໄດ້ສະເລ່ຍ2.000 ກວ່າກິກກາ​ວັດໂມງຕໍ່ປີ ພາຍຫລັງ ສ້າງສຳເລັດ ແລະ ເປີດໃຊ້ຢ່າງເປັນທາງການ ຈະສົ່ງກະແສໄຟຟ້າ ໃຫ້ລັດ​ວິ​ສາ​ຫະກິດ​ໄຟຟ້າ​ລາວ 100%.
ແຫລ່ງຂ່າວ: ຂປລ

ອອກ​ຈາກ REPLY ເປັນ

Please enter your comment!
Please enter your name here