ເສັ້ນທາງເບຕົງຫາດຊາຍຂາວ-ດົງສະຫວາດສຳເລັດແລ້ວ 100%

ec88e83015909704f01dc3dc5921ff44

ໂຄງການ​ກໍ່ສ້າງ​ເສັ້ນທາງ​ເບຕົງ​ເສີມ​ເຫຼັກ ແຕ່​ບ້ານ​ຫາດ​ຊາຍຂາວ ເມືອງ​ຫາດ​ຊາຍ​ຟອງ ຫາບ້ານ​ດົງ​ສະຫວາດ ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ ມາ​ຮອດ​ປັດຈຸບັນ​ນີ້​ ແມ່ນ​ກໍ່ສ້າງສຳເລັດ​ແລ້ວ 100% ດ້ວຍຄວາມ​ຍາວ​ປະມານ 2 ກິ​ໂລແມັດ ໜ້າ​ທາງ​ກວ້າງ 7 ແມັດ ຄວາມ​ກວ້າງ​ຂອງ​ທາງ​ຄົນ​ຍ່າງທັງ​ສອງ​ຟາກ 1,50 ແມັດ ລວມມູນ​ຄ່າ​ການ​ກໍ່ສ້າງທັງ​ໝົດ 39.848.051.214 ກີບ ແລະ ປັດຈຸບັນ​ ພ້ອມ​ແລ້ວ​ທີ່​ຈະ​ເປີດ​ນຳໃຊ້​ເສັ້ນທາງ​ດັ່ງກ່າວ ແລະ ໂຄງການ​ໂດຍ​ແມ່ນ​ບໍລິສັດ ແສງ​ວິ​ໄຊກໍ່ສ້າງ​ຂົວ​ທາງກຼຸບ ຈຳກັດ ຜູ້ດຽວ​ເປັນ​ຜູ້​ຮັບ​ເໝົາ​ກໍ່ສ້າງ.

ພາຍຫຼັງ​ກໍ່ສ້າງ​ສຳເລັດ ວັນ​ທີ 30 ກັນຍາ 2015 ທາງ​ຄະນະກຳມະການ​ກວດກາ​ຂັ້ນ​ເມືອງຫາດ​ຊາຍ​ຟອງ ໄດ້​ລົງ​ຕິດຕາມກວດເບິ່ງ​ຄວາມ​ຮຽບ​ຮ້ອຍ​ ໃນດ້ານ​ຕ່າງໆ​ຂອງ​ລະບົບ​ການ​ກໍ່ສ້າງ ໂດຍ​ມີ​ທ່ານ ຂັນ​ທອງ ແກ້ວດວງ​ສີ ປະທານ​ກວດກາ​ພັກ-ລັດ ເມືອງ​ຫາດ​ຊາຍ​ຟອງ ມີ​ຜູ້​ຕາງໜ້າ​ພະ​ແນກ​ແຜນການ ແລະ ການ​ລົງທຶນ ພະ​ແນກ ​ຍທຂ ນະຄອນ​ຫຼວງ ເມືອງ ບໍລິສັດ ພະນັກງານ​ວິຊາ​ການ ແລະ ນາຍບ້ານ ເຂົ້າ​ຮ່ວມ.

ທ່ານ ແພງ​ຕາ ລາດ​ສະ​ຈັກ ທີ່​ປຶກສາ​ບໍລິສັດ​ໂຄງການ​ກໍ່ສ້າງເສັ້ນທາງ​ດັ່ງກ່າວ ໄດ້​ລາຍ​ງານກ່ຽວ​ກັບ​ການຈັດຕັ້ງ​ປະຕິບັດ​ໂຄງການ ເຊິ່ງ​ໂຄງການ​ດັ່ງກ່າວ​ ໄດ້ລົງມື​ຈັດ​ຕັ້ງ​ປະຕິບັດ​ມາ​ແຕ່​ວັນ​ທີ 13 ມິຖຸນາ 2014 ເປັນຕົ້ນ​ມາ ແລະ ມີ​ສັນຍາ​ຮັບ​ເໝົາ​ກໍ່ສ້າງ​ໃຫ້ສຳເລັດ​ພາຍ​ໃນ 16 ເດືອນ ຮອດປັດຈຸບັນ​ແມ່ນ​ສຳເລັດ 100% ພ້ອມ​ດຽວ​ກັນ ການ​ລົງມື​ປະຕິບັດການ​ກໍ່ສ້າງ​ຮ່ອງ​ລະບາຍ​ນ້ຳ ອອກ​ຈາກ​ເສັ້ນທາງ​ລົງ​ສູ່​ໜອງບົວ​ໃໝ້ ພ້ອມ​ທັງ​ລວງ​ຮ່ອງ​ໜອງບົວ​ໃໝ້ ມີ​ມູນ​ຄ່າ 2.964.185.950 ກີບ ໂດຍແມ່ນ​ທຶນ​ຂອງ​ບໍລິສັດ​ ຮັບ​ເໝົາ​ກໍ່ສ້າງ​ເປັນ​ຜູ້​ລົງທຶນ​ກ່ອນ ແລະ ຜ່ານ​ການ​ລົງ​ກວດກາ​ຕິດຕາມຄັ້ງ​ນີ້ ​ກໍ່​ເຫັນ​ໂຄງການ​ແມ່ນ​ໄດ້ປະຕິບັດ​ຕາມ​ສັນຍາ ແລະ ໄປຕາມ​ໜ້າ​ວຽກ​ທີ່​ວາງ​ໄວ້ ກໍ່​ຄື​ການກໍ່ສ້າງ​ໄດ້​ມາດຕະຖານ​ເຕັກນິກ ແລະ ຕໍ່​ໄປ​ກໍ່​ເຮັດ​ໃຫ້ການ​ສັນຈອນ​ໄປ​ມາ​ຂອງ​ປະຊາຊົນ​ເຂດດັ່ງກ່າວ ​ມີ​ຄວາມ​ສະດວກ​ສະບາຍ​ຫຼາຍ​ຂຶ້ນ.

 

ແຫລ່ງຂ່າວ:

ວຈໝ