ເມືອງໝື່ນ ພົບຜູ້ຕິດເຊື້ອໄຂ້ຍຸງລາຍແລ້ວ 17 ກໍລະນີ

ໃນປີນີ້ ນັບແຕ່ເດືອນມັງກອນຫາເດືອນມີຖຸນາ ເມືອງໝື່ນ ເເຂວງວຽງຈັນ ມີຜູ້ເຂົ້າຮັບການປິ່ນປົວອາການໄຂ້ຍຸງລາຍທັງໝົດ 35 ກໍລະນີ ຊຶ່ງຜ່ານການກວດກາ ແລະ ບົ່ງມະຕິພະຍາດຢ່າງລະອຽດເຫັນວ່າມີຜູ້ຕິດເຊື້ອໄຂ້ຍຸງລາຍແລ້ວ 17 ກໍລະນີ ຊຶ່ງຜູ້ປ່ວຍຕິດເຊື້ອໄດ້ເຂົ້າຮັບການປິ່ນປົວນອນໂຮງໝໍເມືອງໝື່ນເຫັນວ່າດີເປັນປົກກະຕິ ແລະ ສາມາດກັບບ້ານໄດ້ເເລ້ວ.

ທ່ານ ດຣ ຊົວທ່າວ ເຍ້ຍຕູ້ ຫົວໜ້າຫ້ອງການສາທາລະນະສຸກເມືອງໝື່ນໄດ້ໃຫ້ສຳພາດຕໍ່ນັກຂ່າວວ່າ ພະຍາດໄຂ້ຍຸງລາຍສາມາດເກີດຂຶ້ນ ແລະ ລະບາດໄດ້ກັບຄົນທຸກເກນອາຍຸ ລະບາດໄດ້ທັງລະດູແລ້ງ ແລະ ລະດູຝົນ ຊຶ່ງໃນປີ 2019 ນີ້ເມືອງໝື່ນເລີ່ມມີຜູ້ຕິດເຊື້ອໄຂ້ຍຸງລາຍເລີ່ມແຕ່ເດືອນເມສາເປັນຕົ້ນມາ ເພາະໄລຍະນີ້ເລີ່ມເຂົ້າສູ່ລະດູຝົນ ເຮັດໃຫ້ຍຸງລາຍເລີ່ມມີການແພ່ພັນ ປັດຈຸບັນເຫັນວ່າຝົນຕົກລົງມາຕະຫຼອດບວກໃສ່ສະພາບເເວດລ້ອມ ຄວາມແອອັດ ເປີເປື້ອນ ອັນເປັນເງື່ອນໄຂອຳນວຍໃຫ້ຍຸງມີການແພ່ພັນ ແລະ ນຳເຊື້ອມາສູ່ຄົນ ເພື່ອປ້ອງກັນ ແລະ ຄວບຄຸມພະຍາດດັ່ງກ່າວຫ້ອງການສາທາລະນາສຸກເມືອງກໍໄດ້ລົງສົມທົບກັບອຳນາດການປົກຄອງ ແລະ ພໍ່ແມ່ປະຊາຊົນສ້າງກິດຈະກຳອະນາໄມ ແລະ ທຳລາຍແຫຼ່ງເພາະພັນຂອງຍຸງລາຍ ໂດຍບ້ານເປົ້າໝາກໍຄື ບ້ານປາກຈັນ ບ້ານຄົກເໝືອດ ບ້ານກ້ອນຄຳ ບ້ານນ້ຳຮີ້ ແລະ ບ້ານວັງ ເພື່ອນຳພາພໍ່ແມ່ປະຊາຊົນຈັດກິດຈະກຳອະນາໄມລວມທຳລາຍແຫຼ່ງເພາະພັນຂອງຍຸງລາຍເຊັ່ນ ອາງນ້ຳ ກະຟຸ້ຍນ້ຳ ໂຖດອກໄມ້ ຢາງຕີນລົດ ຈານຮອງຕີນຕູ້ ແລະ ເເຈກຢາຍຢາອາແບັດໃຫ້ກັບພໍ່ແມ່ປະຊາຊົນຈຳນວນໜຶ່ງ ນອກຈາກ 5 ບ້ານນີ້ຍັງຈະສືບຕໍ່ລົງສຸຂະສຶກສາບ້ານອື່ນໆຕື່ມອີກ.

ໂອກາດດຽວກັນນີ້ ທ່ານກໍຮຽກຮ້ອງມາຍັງທຸກພາກສ່ວນໃນສັງຄົມຈົ່ງພ້ອມກັນເອົາໃຈໃສ່ຮັກສາອະນາໄມສະພາບເເວດລ້ອມພາຍ ໃນເຮືອນ ແລະ ນອກເຮືອນໃຫ້ສະອາດ ນອນໃນມຸ້ງ ລີກເວັ້ນບໍ່ໃຫ້ຍຸງລາຍກັດ ແລະ ພ້ອມກັນປະຕິບັດຫຼັກການ 5 ປໍຄື:

1. ປິດຝາພາຊະນະທີ່ມີນ້ຳໃນເຮືອນ ແລະ ນອກເຮືອນບໍ່ໃຫ້ຍຸງມາໄຂ່ໃສ່.

2. ປ່ຽນນ້ຳ ແລະ ທຳຄວາມສະອາດພາຊະນະເຊັ່ນ ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກນ້ຳ.

3. ປ່ອຍປາຫາງນົກຍຸງເພື່ອກິນໜອນນ້ຳ.

4. ປັບປຸງບໍ່ໃຫ້ມີນ້ຳຂັງໃນກະໂປະ ກະປ໊ອງ ຮາງລິນ ຢາງຕີນລົດ.

5. ປະຕິບັດເປັນປະຈຳທຸກໆອາທິດ ແລະ ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ ຫຼື ສຸກສາລາໃກ້ບ້ານ.

 

ໂດຍ: ແຫວນຄຳ