ເຈົ້າໜ້າທີ່ອາວຸໂສອາຊຽນ ກະກຽມແກ່ກອງປະຊຸມສຸດຍອດ ຄັ້ງທີ 28 ແລະ 29

ຂປລ. ໃນຕອນເຊົ້າຂອງວັນທີ 5 ກັນຍາ 2016, ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ທ່ານ ອາລຸນແກ້ວ ກິດຕິຄຸນ, ລັດຖະມົນຕີ ປະຈຳສຳນັກງານນາຍົກລັດຖະມົນຕີ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ, ໄດ້ເປັນປະທານກອງປະຊຸມເຈົ້າໜ້າທີ່ອາວຸໂສອາຊຽນ ໂດຍມີຫົວໜ້າເຈົ້າໜ້າທີ່ອາວຸໂສອາຊຽນ ຈາກປະເທດສະມາຊິກອາຊຽນ, ຮອງເລຂາທິການໃຫຍ່ອາຊຽນ ຮັບຜິດຊອບເສົາຄ້ຳ ການເມືອງ-ຄວາມໝັ້ໜຄົງ ພ້ອມດ້ວຍຄະນະຜູ້ແທນເຂົ້າຮ່ວມ. ກອງປະຊຸມໄດ້ສຸມໃສ່ ການກະກຽມໃຫ້ແກ່ກອງປະຊຸມສຸດຍອດຕ່າງໆ ແລະ ກິດຈະກຳອື່ນໆກ່ຽວຂ້ອງ ທີ່ຈະຈັດຂຶ້ນໃນໄລຍະວັນທີ 6 ຫາ 8 ກັນຍາ 2016 ນີ້ ທີ່ນະຄອນຫລວງວຽງຈັນ ມີດັ່ງນີ້:

ການກະກຽມໃຫ້ແກ່ການລົງນາມ ຮັບເອົາຊີເລ, ເອຢິບ ແລະ ມາຣົກ ເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້; ກອງປະຊຸມສະພາປະຊາຄົມ ການເມືອງ-ຄວາມໝັ້ນຄົງອາຊຽນ ຄັ້ງທີ 14; ກອງປະຊຸມສະພາປະສານງານອາຊຽນ ຄັ້ງທີ 18; ກອງປະຊຸມສຸດຍອດອາຊຽນ ຄັ້ງທີ 28 ແລະ 29; ການພົບປະລະຫວ່າງຜູ້ນໍາອາຊຽນ ກັບ ຜູ້ຕາງໜ້າສະມັດຊາລັດຖະສະພາລະຫວ່າງຊາດອາຊຽນ, ຊາວໜຸ່ມອາຊຽນ ແລະ ສະພາທີ່ປຶກສາທຸລະກິດອາຊຽນ; ກອງປະຊຸມສຸດຍອດອາຊຽນ-ອົດສະຕາລີ ທຸກໆ 2 ປີ ຄັ້ງທີ 1; ກອງປະຊຸມສຸດຍອດອາຊຽນ-ຈີນ ຄັ້ງທີ 19 ເພື່ອສະເຫລີມສະຫລອງສາຍພົວພັນອາຊຽນ-ຈີນ ຄົບຮອບ 25 ປີ; ກອງປະຊຸມສຸດຍອດອາຊຽນ-ສະຫະລັດອາເມລິກາ ຄັ້ງທີ 4; ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 18; ກອງປະຊຸມສຸດຍອດອາຊຽນ-ສ.ເກົາຫລີ ຄັ້ງທີ 18; ກອງປະຊຸມສຸດຍອດອາຊຽນ-ອົງການ ສປຊ ຄັ້ງທີ 8; ກອງປະຊຸມສຸດຍອດອາຊຽນ-ອິນເດຍ ຄັ້ງທີ 14; ກອງປະຊຸມສຸດຍອດອາຊຽນ ບວກສາມ ຄັ້ງທີ 19 ແລະ ກອງປະຊຸມສຸດຍອດອາຊີຕາເວັນອອກ ຄັ້ງທີ 11.

ອັນສຳຄັນ, ບັນດາເຈົ້າໜ້າທີ່ອາວຸໂສ ໄດ້ຜ່ານແຜນການເຄື່ອນໄຫວ, ຫົວຂໍ້ການປຶກສາຫາລື ແລະ ບັນດາເອກະສານທີ່ຈະເປັນຜົນຂອງກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ.

 

ແຫລ່ງຂ່າວ:

ຂປລ