ເຈົ້າໜ້າທີ່ຈັບ ຜູ້ຮັບຈ້າງແລ່ນເຂົ້າໂຮງຮຽນ

1
8915

ເຈົ້າໜ້າທີ່ຕຳຫຼວດພະແນກເສດຖະກິດ ປກສ ແຂວງວຽງຈັນ ໄດ້ຮັບແຈ້ງຄວາມ ແລະຄຳຮ້ອງຟ້ອງຈາກຜູ້ຖືກເສຍຫາຍຈຳນວນ 8 ຄົນ ໃນວັນທີ 12 ຕຸລາ 2016 ຜ່ານມາວ່າ: ນາງ ວອນແສງ ອາຍຸ 60 ປີ ປະຊາຊົນບ້ານ ນຳແຈ້ງ ເມືອງໂພນໂຮງ ແຂວງວຽງຈັນ ຮັບແລ່ນເອກະສານເອົາຄົນເຂົ້າໂຮງຮຽນຊົນເຜົ່າເດັກກຳພ້າຫຼັກ 67 ພ້ອມສໍ້ໂກງຊັບພົນລະເມືອງ ລວມມູນຄ່າການເສຍຫາຍ 100 ກວ່າລ້ານກີບ, ຈາກນັ້ນເຈົ້າໜ້າທີ່ໄດ້ເກັບຫຼັກຖານຕົວຈິງ ເຫັນວ່າມີຂໍ້ມູນຄວາມຈິງ ຈຶ່ງໄດ້ກັກຕົວ ນາງ ວອນແສງ ໃນັນທີ 18 ຕຸລາ 2016 ມາສືບສວນ-ສອບສວນ

ຜ່ານການສືບສວນ ນາງ ວອນແສງ ໄດ້ຮັບສາລະພາບວ່າ: ປີ 2015 ໄດ້ເຄື່ອນໄຫວເລີ່ມຮັບແລ່ນເອກະກສານເອົາຄົນເຂົ້າໂຮງຮຽນຊົນເຜົ່າເດັກກຳພ້າຫຼັກ 67 ຈົນມາຮອດປີ 2016 ໄດ້ມີຜ້ເສຍຫາຍ 8 ຄົນຈາກແຂວງບໍລິຄຳໄຊ ມາຫານາງ ວອນແສງ ເພື່ອໃຫ້ຜູ້ກ່ຽວແລ່ນເອກະສານເອົາເຂົ້າຮຽນ ເຊິ່ງຜູ້ກ່ຽວໄດ້ຮັບປາກວ່າຈະແລ່ນໃຫ້ ເພາະຮູ້ຈັກກັບຜູ້ໃຫຍ່ທີ່ສາມາດເອົານັກຮຽນເຂົ້າຮຽນໄດ້, ຈາກນັ້ນ ນາງວອນແສງ ໄດ້ສະເໜີເງື່ອນໄຂໃນການແລ່ນເອກະສານ ໂດຍໃຫ້ຈ່າຍກ່ອນເຄິ່ງໜຶ່ງ ຖ້າໄດ້ເຂົ້າຮຽນຈຶ່ງຈ່າຍສ່ວນທີ່ເຫຼືອ, ເງິນທີ່ໄດ້ໃຫ້ນາງແສງວອນໄປກ່ອນໃນງວດທີ 1 ມີຈຳນວນ 39,55 ລ້ານກີບ, ເງິນບາດໄທ 1,25 ແສນບາດ ພ້ອມເອກະສານທີ່ປະກອບຄົບຊຸດ ຫຼັງຈາກໄດ້ເງິນແລ້ວ ຜູ້ກ່ຽວບໍ່ໄດ້ແລ່ນເອກະສານຕາມຕົກລົງໄວ້ ແລະບໍ່ມີການຕິດຕໍ່ພົວພັນອີກ

ຕໍ່ມາ ນາງວອນແສງ ໄດ້ສະເໜີເອົາເງິນທີ່ເຫຼືອນຳຜູ້ເສຍຫາຍເປັນງວດທີ 2 ເປັນເງິນຈຳນວນ 58,65 ລ້ານກີບ, ເງິນບາດໄທ 30 ພັນບາດ ທັງທີ່ຮູ້ດີວ່າ ຜູ້ກ່ຽວແລ່ນເຂົ້າຮຽນນັ້ນແມ່ນບໍ່ມີລາຍຊື່ເຂົ້າຮຽນ ແຕ່ກໍຍັງຕົວະໃຫ້ຜູ້ເສຍຫາຍເອົາເງິນມາຈ່າຍໃຫ້ອີກ, ໂດຍອ້າງວ່າຈະເອົາເງິນຈຳນວນນີ້ໄປຊຸກຍູ້ໃຫ້ຜູ້ມີຕຳແໜ່ງອີກ ຜູ້ເສຍຫາຍຈຶ່ງຫຼົງເຊື່ອ ແລະຍອມມອບເງິນໃຫ້.

ຈົນມາຮອດວັນທີ 12 ຕຸລາ 2016 ຜູ້ເສຍຫາຍຈຶ່ງຮູ້ວ່າແລ່ນເອກະສານໃຫ້ເຂົ້າຮຽນບໍ່ໄດ້ຕາມການຕົກລົງກັນໄວ້ ຜູ້ກ່ຽວແມ່ນ ເຈດຕະນາສໍ້ໂກງຊັບພົນລະເມືອງຢ່າງແທ້ຈິງ ເຊິ່ງຜູ້ກ່ຽວໄດ້ຕົວະຍົວະຫຼອກລວງຜູ້ອື່ນ ໂດຍອ້າງບຸກຄົນທີ່ບົດບາດ ແລະມີຖານະຕຳແໜ່ງກັບຜູ້ກ່ຽວ. ການກະທຳຂອງນາງ ວອນແສງ ເປັນການກະທຳຜິດທາງກົດໝາຍອາຍາ ແຫ່ງ ສປປລາວ ໃນມາດຕາ 120 ການສໍ້ໂກງຊັບຂອງພົນລະເມືອງ, ປະຈຸບັນເຈົ້າໜ້າທີ່ຕຳຫຼວດ ເສດຖະກິດ ປກສ ແຂວງວຽງຈັນ ໄດ້ສະຫຼຸບສຳນວນຄະດີ ແລະໄດ້ດຳເນີນຄຳດີຕາມລະບຽບກົດໝາຍໃນຂັ້ນຕໍ່ໄປ

ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ

1 COMMENT

  1. ແນວນີ້ມີຫຼາຍໂພດຢູ່ລາວເຮົາ,ແນວຄິດກັບຄືນສະໄໝປະຕິການສັນດານເກົ່າອີກ,ຂ້ອຍຄິດວ່າລະບອບໃໝ່ຊິດີ,ຍຸຕິທຳ,ປອດໃສກວ່າສຸດທ້າຍກະພໍກະເທີນ,ລັກສະນະແບບແກ້ຕົວ,ຖ້າເປັນແບບນີ້ສັດທາຕ້ອງເສື່ອມແນ່ນອນ

Comments are closed.