ຫົວໜ້າໂຄສະນາອົບຮົມ ຕ້ອນຮັບຄະນະຜູ້ແທນຫວຽດນາມ

ຫົວໜ້າໂຄສະນາອົບຮົມ ຕ້ອນຮັບຄະນະຜູ້ແທນຫວຽດນາມ

 

ຕອນ​ແລງ​ວັນ​ທີ 20 ມີນາ 2013 ຜ່ານ​ມາ​ນີ້ ທີ່​ຄະນະ​ໂຄສະນາ​ອົບຮົມ​ສູນ​ກາງ​ພັກ ທ່ານ ເຈືອງ ສົມບູນ​ຂັນ ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ ປະທານ​ສະພາ​ວິທະຍາສາດ​ສັງຄົມ​ແຫ່ງ​ຊາດ ໄດ້​ໃຫ້​ກຽດ​ຕ້ອນຮັບ​ການ​ເຂົ້າ​ຢ້ຽມ​ຂ່ຳນັບ​ຂອງ​ທ່ານ ຝຸງ​ດິງ​ຟູ ຮອງ​ປະທານ ຜູ້​ປະຈຳການ​ສະພາ​ທິດ​ສະ​ດີ​ສູນ​ກາງ​ພັກ​ກອມ​ມູ​ນິດ​ຫວຽດນາມ ພ້ອມ​ຄະນະ ເນື່ອງ​ໃນ​ໂອກາດ​ທີ່​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ແຕ່​ວັນ​ທີ 19-22 ມີນາ​ນີ້.

ໂອກາດ​ດັ່ງກ່າວ​ນີ້ ທ່ານ​ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ ໄດ້​ສະແດງ​ຄວາມ​ຕ້ອນຮັບ​ຢ່າງ​ອົບ​ອຸ່ນ ພ້ອມ​ທັງ​ຕີ​ລາ​ສູງ​ຕໍ່​ການ​ເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຢູ່ ​ສປປ ລາວ ຂອງ​ຄະນະ​ຜູ້​ແທນ​ຂອງ​ສະພາ​ທິດ​ສະ​ດີ​ສູນ​ກາງ​ພັກ​ກອມ​ມູ​ນິດ​ຫວຽດນາມ​ຄັ້ງ​ນີ້ ຈະ​ເປັນ​ການ​ສືບຕໍ່​ເພີ່ມ​ທະວີ​ການ​ພົວພັນ​ແບບ​ພິເສດ ແລະ ການ​ຮ່ວມ​ມື​ແບບ​ຮອບດ້ານ ລະຫວ່າງ​ສອງ​ພັກ-ສອງ​ລັດ ແລະ ປະຊາຊົນ​ສອງ​ຊາດ ລາວ-ຫວຽດນາມ ໂດຍ​ສະເພາະ ລະຫວ່າງ​ສະພາ​ວິທະຍາສາດ​ສັງຄົມ​ແຫ່ງ​ຊາດ​ລາວ ກັບ​ສະພາ​ທິດ​ສະ​ດີ​ສູນ​ກາງ​ພັກ​ກອມ​ມູ​ນິດ​ຫວຽດນາມ ທີ່​ມີ​ມາ​ແລ້ວ​ນັ້ນ​ໃຫ້​ນັບ​ມື້​ແຕກ​ດອກ​ອອກ​ຜົນ ແລະ ກ້າວ​ເຂົ້າ​ສູ່​ລວງ​ເລິກ.

ການ​ພົບ​ປະ​ທັງ​ສອງ​ໄດ້​ແລກປ່ຽນ​ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ ໂດຍ​ສະເພາະ​ໄດ້​ພ້ອມ​ກັນ​ທົບ​ທວນຄືນ​ຜົນສຳເລັດ​ຂອງ​ການ​ຮ່ວມ​ມື​ເຊິ່ງ​ກັນ ແລະ ກັນ ໃນ​ໄລຍະ​ຜ່ານ​ມາ ພ້ອມ​ທັງ​ປຶກສາ​ຫາລື ແລະ ແລກປ່ຽນ​ບາງ​ບັນຫາ​ທີ່​ສອງ​ຝ່າຍ​ໃຫ້​ຄວາມ​ສົນໃຈ ເປັນຕົ້ນ​ກໍ​ແມ່ນ​ການ​ຮ່ວມ​ມື​ກັນ​ໃນ​ວຽກ​ງານ​ຄົ້ນຄວ້າ​ທິດ​ສະ​ດີ ແລະ ວິທະຍາສາດ​ສັງຄົມ​ເຊິ່ງ​ກັນ ແລະ ກັນ.

ຂ່າວ​ແຈ້ງ​ຕື່ມ​ວ່າ: ໃນ​ວັນ​ທີ 21 ມີນາ 2013 ຄະນະ​ຜູ້​ແທນ​ດັ່ງກ່າວ ຍັງ​ໄດ້​ເຂົ້າ​ພົບ​ປະ​ກັບ​ທ່ານ ​ສຈ.​ດຣ. ກິ​ແກ້ວ ໄຂ​ຄຳ​ພິທູນ ຫົວໜ້າ​ສະ​ຖາ​ບັນ​ການເມືອງ ແລະ ການ​ປົກຄອງ​ແຫ່ງ​ຊາດ ຮອງ​ປະທານ​ສະພາ​ວິທະຍາສາດ​ສັງຄົມ​ແຫ່ງ​ຊາດ ທີ່​ສະ​ຖາ​ບັນ​ການເມືອງ ແລະ ການ​ປົກຄອງ​ແຫ່ງ​ຊາດ.

ທີ່ມາhttp://www.vientianemai.net