ທະຫານແຂວງໄຊຍະບູລີ ຈັດກຳລັງຊ່ວຍປະຊາຊົນ ພ້ອມສືບຕໍ່ສ້ອມແປງເຮືອນ ຈາກໄພນ້ຳຖ້ວມ!

ໃນວັນທີ 12 ສິງຫາຜ່ານມານີ້ ຍ້ອນສະພາບອາກາດ ມີການປ່ຽນແປງ ມີຝົນຕົກໜັກຕິດຕໍ່ກັນຫລາຍຊົ່ວໂມງ ຢູ່ບໍລິເວນເມືອງຫົງສາ ແຂວງໄຊຍະບູລີ ເປັນສາເຫດເຮັດໃຫ້ ນ້ຳຖ້ວມບ້ານເຮືອນ ໄຮ່ນາ-ສວນ ຂອງປະຊາຊົນ ໂດຍສະເພາະບ້ານແທ່ນຄຳ, ບ້ານສີບຸນເຮືອງ ແລະ ຫລາຍບ້ານຂອງ ເມືອງຫົງສາ ແຂວງໄຊຍະບູລີ ຖືກໄພນ້ຳຖ້ວມຢ່າງໜັກໜ່ວງ.

ຕໍ່ສະພາບການດັ່ງກ່າວກອງ “ຄ 410” ທະຫານແຂວງໄຊຍະບູລີ ໄດ້ຈັດຕັ້ງກຳລັງຂອງກົມກອງ 2 ກອງຮ້ອຍ ເພີ່ມທະວີເຂົ້າຊ່ວຍເຫລືອປະຊາຊົນ ທີ່ໄດ້ຮັບຜົນກະທົບໃນຄັ້ງນີ້ ເຊິ່ງນຳພາໂດຍ ພັນໂທ ພູເຂົາຄຳ ທີແກ້ວ ຫົວໜ້າການເມືອງ ກອງ “ຄ410” ໃນການຊ່ວຍເຫລືອຄັ້ງນີ້ ແມ່ນມີຄວາມຫຍຸ້ງຍາກພໍສົມຄວນ ເນື່ອງຈາກວ່າ ກະແສນ້ຳໄຫລແຮງ-ມີຄວາມເລິກ, ມີວັດຖຸສິ່ງຂອງ, ໄມ້ ແລະ ອື່ນໆ ໄຫລມາ ແຕ່ອ້າຍນ້ອງພະນັກ ງານ-ນັກຮົບ ກໍໄດ້ຕັດສິນໃຈຜ່ານຜ່າ ແລະ ສາມາດກອບກູ້ເອົາເຄື່ອງຂອງ ແລະ ປະຊາຊົນ ໄປຢູ່ເຂດທີ່ປອດໄພ ໄດ້ຢ່າງປອດໄພ ໂດຍສະເພາະແມ່ນບ້ານແທ່ນຄຳ ທີ່ຖືກກະທົບໜັກ.

ສຳລັບບ້ານເຮືອນທີ່ໄດ້ຮັບຜົນກະທົບໃນຄັ້ງນີ້ ບ້ານແທ່ນຄຳ ແມ່ນກວມເອົາປະມານ 95% ຂອງຈຳນວນຄົວເຮືອນທັງໝົດ ແລະ ບ້ານສີບຸນເຮືອງກວມເອົາ ປະມານ 15% ສ່ວນຜົນເສຍຫາຍທາງດ້ານ ຊັບສິນແມ່ນທາງການທ້ອງຖິ່ນ ຍັງບໍ່ທັນໄດ້ປະເມີນລາຍລະອຽດ ຕໍ່ກັບສະພາບການດັ່ງກ່າວ ກອງ “ຄ410” ຍັງຈະສືບຕໍ່ເຄື່ອນໄຫວ ຊ່ວຍເຫລືອປະຊາຊົນ ໃນການປັບປຸງສ້ອມແປງເຮືອນຊານບ້ານຊ່ອງ ໃຫ້ກັບຄືນສູ່ສະພາບ ປົກກະຕິ ຕື່ມອີກ.

 

ແຫລ່ງຂ່າວ:

ກອງທັບ

ຕິດຕາມເຮາທາງFacebook ກົດຖືກໃຈເລີຍ!