ຕຳຫຼວດນະຄອນບານ ຈັບຄໍກຸ່ມຄ້າອາວຸດເສິກອັນຕະລາຍ 20 ຄົນ ພ້ອມຂອງກາງຈຳນວນຫຼາຍ

ກຸ່ມຜູ້ຄ້າອາວຸດເສິກຈຳນວນ 20 ຄົນ ໄດ້ຖືກໜ່ວຍສະເພາະກິດ ຕຳຫຼວດນະຄອນຫຼວງວຽງຈັນ ຈັບໂຕໄດ້ຕັ້ງແຕ່ປີ 2015 ທີ່ຜ່ານມາ ພ້ອມທັງອາວຸດເສິກປະເພດປືນແລະລະເບີດຈຳນວນຫຼາຍ.

ການມ້າງກຸ່ມຄ້າອາວຸດເສິກດັ່ງກ່າວນັ້ນ ຖືກຖະແຫຼງຂ່າວຢ່າງເປັນທາງການໃນວັນທີ 4 ມີນາ 2017 ທີ່ຜ່ານມາ ທີ່ຫ້ອງຕຳຫຼວດນະຄອນຫຼວງວຽງຈັນ ໂດຍທ່ານ ພັນໂທ ຄຳແພງ ໄຊຍະລາດ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ. ໂດຍທ່ານກ່າວວ່າ ພາຍຫຼັງທີ່ໄດ້ຮັບແຈ້ງວ່າມີການ­ເຄື່ອນ­ໄຫວຂອງ​ກຸ່ມ​ຄົນ​ບໍ່​ດີ, ມີ​ການ​ນຳ​ເຂົ້າ​ອາ­ວຸດ​ເສິກ​ຈຳ­ນວນ​ບໍ່​ໜ້ອຍ ເພື່ອ​ມາ​ຈຳ­ໜ່າຍໃຫ້​ກຸ່ມ​ຄົນ​ບໍ່​ດີ​ທີ່​ອາ​ໄສ​ຢູ່​ໃນ​ນະ­ຄອນ­ຫຼວງວຽງ​ຈັນ, ດັ່ງ­ນັ້ນ ເຈົ້າ​ໜ້າ­ທີ່ ປກສ ນະ­ຄອນ­ຫຼວງ​ວຽງ​ຈັນ ໄດ້​ແຕ່ງ­ຕັ້ງ​ເຈົ້າ​ໜ້າ­ທີ່​ວິ­ຊາ​ສະ­ເພາະ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ເພື່ອ​ລົງ​ເກັບ​ກຳ​ຂໍ້​ມູນ​ນຳ​ມາ​ວິ­ເຄາະ​ຢ່າງ​ຊັດ​ເຈນ. ນັບ​ແຕ່​ເດືອນ​ມີ​ຖຸ​ນາ 2015 ຈົນ​ເຖິງ​ວັນ​ທີ 24 ພະ­ຈິກ 2015 ຈິ່ງ​ສາ­ມາດ​ຈັບ​ກຸ່ມ​ເປົ້າ​ໝາຍ​ໄດ້​ທັງ​ໝົດ 12 ຄົນ, ຍິງ 5 ຄົນ, ໃນ​ນັ້ນ ມີ​ສັນຊາດ​ໄທ 9 ຄົນ, ຍິງ 4 ຄົນ ແລະ​ຮອດວັນ​ທີ 28 ພະ­ຈິກ 2015 ສາ­ມາດ​ຈັບເປົ້າ​ໝາຍ​ໄດ້​ຕື່ມ​ອີກ 8 ຄົນ, ຍິງ 4 ຄົນ ລວມ​ທັງ​ໝົດ​ເປັນ 20 ຄົນ, ຍິງ 9 ຄົນ, ພ້ອມ​ນີ້ ຍັງ​ສາ­ມາດ​ຢືດ​ຂອງ​ກາງ​ໄດ້​ຄື: ປືນ​ຊະ­ນິດ​ຕ່າງໆ 28 ກະ­ບອກ, ໃນ​ນັ້ນ ປືນ​ເຫຼັກ​ຍາວ 17 ກະ­ບອກ, ປືນ​ສັ້ນ 11 ກະ­ບອກ, ໝາກ​ແຕກ 24 ໜ່ວຍ, ລູກປືນ​ຊະ­ນິດ​ຕ່າງໆ​ເກືອບ 700 ລູກ ແລະ ກະ­ສອບ​ລູກ​ປຶນ​ມີ​ແກັບ 53 ກະ­ສອບ, ໂຄງ​ໃສ່​ປືນ​ສັ້ນ​ສຳ­ລັບ​ຍິງ​ໄກ 3 ຊຸດ, ກ້ອງ​ສ່ອງ​ສຳ­ລັບ​ຕິດ​ປືນ 3 ໜ່ວຍ, ຊິ້ນສ່ວນ​ປະ­ກອບ​ປືນ​ສັ້ນ 13 ອັນ, ໜ້າ​ເຮັດດ້ວຍ​ເຫຼັກ 1 ອັນ, ງ້າວ 3 ດວງ, ຢາ​ໄອ້ 1 ຖົງ​ໃຫຍ່ ແລະ 19 ຖົງ​ນ້ອຍ, ຢາ​ບ້າ 119 ເມັດ ແລະ​ເຄື່ອງ​ວັດ­ຖຸ​ອື່ນໆ​ອີກ​ເປັນ​ຈຳ­ນວນ​ຫຼາຍ.

ຜ່ານ​ການ​ສືບສວນ-ສອບ​ສວນຂອງເຈົ້າໜ້າທີ່ ພວກຜູ້ຖືກຫາ​ໄດ້​ຮັບ​ສາລະ​ພາບ​ວ່າ​ໄດ້​ຮ່ວມ​ກັນ​ຊື້​ຂາຍ, ຂົນ­ສົ່ງ, ຄອບ​ຄອງ​ອາ­ວຸດ​ເສິກ ແລະ​ມີ​ຢາ​ເສບ​ຕິດໄວ້​ໃນ​ຄອບ​ຄອງ​ຄື​ປະ­ເພດ​ຢາ​ໄອ, ຢາ​ບ້າ ແລະ​ຂອງ​ກາງ​ທີ່​ເຈົ້າ​ໜ້າ­ທີ່​ກວດ​ພົບ​ນັ້ນເປັນ​ຂອງ​ພວກ​ກ່ຽວ​ແທ້.

ພ້ອມ​ນີ້ ເຈົ້າ​ໜ້າທີ່​ຍັງ​ຈະ​ສືບ­ຕໍ່​ເປີດ​ກວ້າງ​ດຳ­ເນີນ​ການ​ສືບສວນ-ສອບ​ສວນ ເກັບ​ກຳ​ຂໍ້​ມູນ​ຫຼັກ​ຖານຂະ­ຫຍາຍ​ຜົນ​ໄປ​ຫາ​ກຸ່ມ​ແກ້ງ​ເຄືອ​ຂ່າຍທີ່​ຍັງ​ເຫຼືອ​ເພື່ອ​ນຳ​ຈັບ​ຕົວ​ມາ​ດຳ­ເນີນ​ຄະ­ດີຕາມ​ລະ­ບຽບ​ກົດ­ໝາຍ​ຢ່າງ​ເຂັ້ມ​ງວດ.