ກະຊວງພາຍໃນ ຈັດສຳມະນາລະດົມຄວາມເຫັນ ວຽກງານຈົດທະບຽນ-ສະຖິຕິພົນລະເມືອງ

ຂປລ. ກະຊວງພາຍໃນ ຈັດກອງປະຊຸມສຳມະນາວຽກງານການຈົດທະບຽນ ແລະສະຖິຕິພົນລະເມືອງເພື່ອພ້ອມກັນຄົ້ນຄວ້າ, ປະກອບຄຳເຫັນຕໍ່ວຽກງານຄຸ້ມຄອງພົນລະເມືອງໂດຍສະເພາະ ຕໍ່ກັບຮ່າງ​​ແຜນຍຸດທະສາດການຈົດທະບຽນແລະ ສະຖິຕິພົນລະເມືອງ, ການທົບທວນນິຕິກຳທີ່ກ່ຽວຂ້ອງ ເພື່ອຄົ້ນ ຄວ້າປັບປຸງ ຫລື ສ້າງກົດໝາຍໃໝ່ ແລະ ລະບົບຖານຂໍ້ມູນຄຸ້ມຄອງພົນລະເມືອງ, ພ້ອມຮັບຟັງການສະ  ເໜີບົດຮຽນຂອງຊ່ຽວຊານຕ່າງປະເທດ ກ່ຽວກັບບັນດາບົດຮຽນ, ຂັ້ນຕອນ, ຄວາມເປັນໄປໄດ້ແລະ ລະ ບົບຄຸ້ມຄອງຂໍ້ມູນພົນລະເມືອງຂອງບາງປະເທດ​.

ທ່ານ ສີພຸ ວົງພັກດີ ຮອງລັດຖະມົນຕີກະຊວງພາຍໃນ ກ່າວໃນກອງປະຊຸມຄັ້ງນີ້ວ່າ: ປັດຈຸບັນ ກະຊວງພາຍໃນ ພວມຈັດຕັ້ງປະຕິບັດສາມວຽກງານໃຫຍ່ ກ່ຽວກັບວຽກການຄຸ້ມຄອງພົນລະເມືອງຄື: ການສ້າງແຜນຍຸດທະສາດການຈົດທະບຽນແລະ ສະຖິຕິພົນລະເມືອງ, ການທົບທວນຄືນການຈັດຕັ້ງປະຕິບັດກົດໝາຍ, ບັນດານິຕິກຳລຸ່ມກົດໝາຍຈຳນວນໜຶ່ງເພື່ອປັບປຸງຫລືສ້າງເປັນກົດໝາຍໃໝ່ຂຶ້ນມາ ​​ແນ່ໃສ່ໃຫ້ສອດຄ່ອງກັບສະພາບການຕົວຈິງແລະ ສຸດທ້າຍ ແມ່ນການສ້າງຖານຂໍ້ມູນຄຸ້ມຄອງພົນລະເມືອງໃຫ້ມີຄວາມສອດຄ່ອງແລະ ​​ແທດເໝາະກັບສະພາບຕົວຈິງຢູ່ພາຍໃນປະເທດ​ ​ແລະ ຢູ່ພາກພື້ນອາຊີ-​ປາຊີຟິກ ກໍຄືຖະແຫລງການບາງກອກທ້າຍປີ 2014 ທີ່ໄດ້ລະບຸວ່າ: ພົນລະເມືອງລາວທຸກຄົນໂດຍສະເພາະ ເດັກເກີດ​​ໃໝ່ຕ້ອງ​​ໄດ້ຮັບການຈົດທະບຽນໃຫ້ໄດ້ 70% ຮອດປີ 2024.

ກອງປະຊຸມສຳມະນາວຽກງານການຈົດທະບຽນ ແລະສະຖິຕິພົນລະເມືອງ ໄດ້ຈັດຂຶ້ນໃນວັນທີ 28 ມີນານີ້ ຢູ່ນະຄອນຫລວງວຽງຈັນ, ​​​ເຊິ່ງຈະດຳເນີນໄປເປັນເວລາ 5 ວັນ (28/3-1/4/2016) ​​ໂດຍມີທ່າ ສີພຸ ວົງພັກດີ ຮອງລັດຖະມົນຕີກະຊວງພາຍໃນ, ທ່ານນາງແຊລລີເບີນນິງແຮມ ຫົວໜ້າຫ້ອງ ການທະນາຄານໂລກປະຈຳລາວແລະ ຜູ້ຕາງໜ້າຈາກບັນດາພາກສ່ວນທີ່ກ່ຽວຂ້ອງຈາກສູນກາງແລະ ທ້ອງຖິ່ນເຂົ້າຮ່ວມຢ່າງພ້ອມພຽງ.

 

ແຫລ່ງຂ່າວ:

ຂປລ