ໄມໂຄຣຊອຟມີຍອດຂາຍເພີ່ມ, ຫຼັງໃຫ້ພະນັກງານເຮັດວຽກອາທິດລະ 4 ວັນ

0
160

ບໍລິສັດໄມໂຄຣຊອຟໃນຍີ່ປຸ່ນເປີດເຜີຍເມື່ອວັນທີ 5 ພະຈິກ 2019 ວ່າ: ຍອດຂາຍຂອງບໍລິສັດເພີ່ມຂຶ້ນເກືອບ 40% ໃນຊ່ວງການທົດລອງໃຫ້ພະນັກງານເຮັດວຽກອາທິດລະ 4 ວັນໂດຍບໍ່ທັນໄດ້ຮັບເງິນເດືອນເຕັມຈຳນວນ.

ການທົດລອງດັ່ງກ່າວມີຊື່ວ່າ: Work Life Choice Challenge 2019 Summer ໂດຍໄມໂຄຣຊອຟໃຫ້ຫຼາຍພະແນກໃນຍີ່ປຸ່ນປິດການເຮັດວຽກທຸກວັນສຸກພາຍໃນເດືອນສິງຫາຜ່ານມາ, ໂດຍກຳນົດໃຫ້ເປັນວັນພັກພິເສດສຳລັບພະນັກງານທີ່ປະຕິບັດວຽກເຕັມເວລາ ແລະ ຈ່າຍຄ່າຈ້າງໃຫ້ຕາມປົກກະຕິ. ນອກຈາກນີ້ ບໍລິສັດຍັງຈຳກັດໄລຍະເວລາການປະຊຸມໄວ້ສູງສຸດຢູ່ທີ່ 30 ນາທີ ແລະ ສະໜັບສະໜູນໃຫ້ພະນັກງານປຶກສາຫາລືເລື່ອງວຽກງານຜ່ານຊ່ອງທາງອອນລາຍແທນທີ່ການໂອ້ລົມກັນແບບເຫັນໜ້າ.

ຍີ່ປຸ່ນເປັນອີກປະເທດໜຶ່ງທີ່ຜູ້ຄົນສ່ວນໃຫຍ່ມີຊົ່ວໂມງເຮັດວຽກຍາວນານທີ່ສຸດໃນໂລກ, ຜົນການສຳຫຼວດເມື່ອປີ 2017 ພົບຂໍ້ ມູນທີ່ບົ່ງຊີ້ວ່າ: ເກືອບ 1 ໃນ 4 ຂອງບໍລິສັດຍີ່ປຸ່ນມີພະນັກງານທີ່ເຮັດວຽກລ່ວງເວລາເກີນ 80 ຊົ່ວໂມງຕໍ່ເດືອນ ແລະ ຫຼາຍໆຄັ້ງແມ່ນຈະບໍ່ໄດ້ຮັບຄ່າຕອບແທນ, ຫຼັງຈາກການທົດລອງຄັ້ງນີ້ສິ້ນສຸດລົງກໍໄດ້ມີການສຳຫຼວດຄວາມເຫັນຂອງພະນັກງານໄມໂຄຣ ຊອຟ ແລະ ພົບວ່າ ​92% ຂອງພະນັກງານແມ່ນມັກໂຄງການນີ້.

ນອກຈາກນີ້, ຍັງພົບວ່າການທົດລອງທີ່ກິນເວລາ 1 ເດືອນຊ່ວຍຫຼຸດປະລິມານການໃຊ້ໄຟຟ້າລົງ 23% ແລະ ການໃຊ້ເຈ້ຍພິມວຽກກໍຫຼຸດລົງເຖິງ 59% ເມື່ອທຽບກັບໄລຍະດຽວກັນຂອງປີ 2018. ໄມໂຄຣຊອຟຍັງລະບຸອີກວ່າ: ມີແຜນຈະນຳໃຊ້ໂຄງການດັ່ງກ່າວອີກຄັ້ງໃນລະດູໜາວ, ແຕ່ຈະບໍ່ຈ່າຍເງິນວັນພັກພິເສດໃຫ້ພະນັກງານ. ຢ່າງໃດກໍຕາມ ບໍລິສັດສະໜັບສະໜູນໃຫ້ພະນັກງານໃຊ້ວັດພັກໃນການພັກຜ່ອນຢ່າງເຕັມທີ່.

ທັງນີ້, ການເຮັດວຽກໜັກຈົນຕາຍ ຫຼື ທີ່ເອີ້ນວ່າ ຄະໂຣສິ (Karoshi) ໃນຍີ່ປຸ່ນກາຍເປັນຂ່າວໃຫຍ່ຫຼັງເກີດກໍລະນີຂອງພະນັກ ງານຂອງບໍລິສັດໂຄສະນາແຫ່ງໜຶ່ງທີ່ຕ້ອງເຮັດວຽກລ່ວງເວລາເຖິງ 100 ຊົ່ວໂມງໃນເດືອນດຽວ, ຈົນເປັນເຫດໃຫ້ນາງເກີດຄວາມເມື່ອຍລ້າ ແລະ ຄວາມຄຽດສະສົມຮຸນແຮງອັນເປັນສາເຫດເຮັດໃຫ້ນາງຂ້າຕົວຕາຍເມື່ອປີ 2015. ໃນທາງກົງກັນຂ້າມ, ແຈັກ ໝ່າ ຜູ້ກໍ່ຕັ້ງອາລີບາບາ ກຣຸບ ຊຶ່ງເປັນທຸລະກິດອີຄອມເມີດຍັກໃຫຍ່ສັນຊາດຈີນໄດ້ແນະນຳຮູບແບບການເຮັດວຽກ 12 ຊົ່ວໂມງທີ່ເອີ້ນວ່າ: 996 ຊຶ່ງເປັນການເຮັດວຽກຕັ້ງແຕ່ເວລາ 9 ໂມງເຊົ້າເຖິງ 9 ໂມງແລງເປັນເວລາ 6 ວັນຕໍ່ອາທິດ, ຂະນະທີ່ມີລາຍງານການສຶກສາທີ່ເຮັດຂຶ້ນໂດຍພັກເລເບີຂອງອັງກິດທີ່ບົ່ງຊີ້ວ່າ: ແນວຄວາມຄິດເລື່ອງການເຮັດວຽກ 4 ຊົ່ວໂມງຕໍ່ອາທິດບໍ່ໜ້າຈະໃຊ້ງານໄດ້ແທ້!!.

ຢ່າງໃດກໍຕາມ, ລາຍງານທີ່ເຜີຍແຜ່ອອກມາເມື່ອເດືອນກັນຍາຜ່ານມາລະບຸວ່າ: ການເຮັດວຽກນອກເວລາ ຫຼື ຫຼຸດເວລາການເຮັດວຽກລົງນັ້ນໝາຍຄວາມວ່າເຂົາເຈົ້າຈະຕ້ອງເຮັດວຽກໃນປະລິມານເທົ່າເດີມໃຫ້ແລ້ວທັນໃນເວລາເທົ່າເດີມ, ຊຶ່ງອາດກໍ່ໃຫ້ເກີດແຮງກົດດັນ ຫຼື ເກີດຄວາມອ່ອນເພຍຫຼາຍກວ່າເກົ່າ.

ຮຽບຮຽງ: ເພັງສະຫວັນ

ຮູບພາບ: bbc.com/thai

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.