ໄທເປັນ 1 ໃນ 21 ປະເທດທີ່ບໍ່ມີເສລີພາບທາງອິນເຕີເນັດ

0
210

ຟຣີດອມເຮົາສ (Freedom House) ຊຶ່ງມີສຳນັກງານໃຫຍ່ຢູ່ທີ່ນະຄອນວໍຊີງຕັນຂອງອາເມຣິກາໄດ້ເປີດເຜີຍວ່າ: ປະເທດໄທເປັນ 1 ໃນ 21 ປະເທດທີ່ບໍ່ມີສິດເສລີພາບທາງອິນເຕີເນັດ, ໂດຍມີການໃຊ້ກົນລະຍຸດທາງກົດໝາຍ ແລະ ກົນລະຍຸດາງຂໍ້ມູນ-ຂ່າວສານແຊກແຊງເຂົ້າໃນການເລືອກຕັ້ງ.

ລາຍງານວ່າດ້ວຍເສລີພາບທາງອິນເຕີເນັດ (Freedom on the Net) ປະຈຳປີ 2019 ຂອງຟຣີດອມເຮົາສຊຶ່ງລາຍງານເມື່ອວັນທີ 5 ພະຈິກຜ່ານມາໃຫ້ຮູ້ວ່າ: ການໃຊ້ອິນເຕີເນັດຖືກຈຳກັດຢ່າງເຂັ້ມງວດໃນປະເທດໄທ, ກ່ອນການເລືອກຕັ້ງເດືອນມີນາ ຊຶ່ງເປັນຄັ້ງທຳອິດຫຼັງຈາກລັດຖະປະຫານເມື່ອ 5 ປີກ່ອນ, ລັດຖະບານໄດ້ພະຍາຍາມຢ່າງໜັກໃນການກີດກັນຜູ້ສະໜັບສະໜູນຂອງຝ່າຍກົງກັນຂ້າມ ແລະ ອອກມາດຕະການຄວບຄຸມ ແລະ ຈຳກັດໃນສື່ສັງຄົມອອນລາຍ, ໂດຍຜູ້ສະໝັກເລືອກຕັ້ງຈາກຝ່າຍກົງກັນ ຂ້າມຖືກຕັ້ງຂໍ້ຫາພາຍໃຕ້ກົດໝາຍທີ່ມີການປະຕິບັດທີ່ບໍ່ຊັດເຈນ, ເພີ່ມອຳນາດໃຫ້ເຈົ້າໜ້າທີ່ໃນການລົບເນື້ອຫາ ຫຼື ຈຳກັດການໃຊ້ໂຊຊຽວມີເດຍໃນການໂຄສະນາການເລືອກຕັ້ງ.

ທັງນີ້, ຣາຊະອານາຈັກໄທຕົກເປັນ 1 ໃນ 21 ປະເທດທີ່ຖືກລະບຸວ່າບໍ່ມີເສລີພາບທາງອິນເຕີເນັດ ແລະ ຍັງເປັນ 1 ໃນ 33 ປະ ເທດຈາກທັງໝົດ 65 ປະເທດທີ່ປາກົດໃນລາຍງານຂອງຟຣີດອມເຮົາສທີ່ຖືກພົບວ່າ: ເສລີພາບທາງອິນເຕີເນັດຫຼຸດລົງ. ຊຶ່ງໃນປີ 2019 ປາກົດວ່າປະເທດອາເມຣິກາເຂົ້າມາຢູ່ໃນກຸ່ມນີ້ເຊັ່ນກັນ, ສ່ວນ ສປ ຈີນ ຍັງຄອງຄວາມເປັນຊາດທີ່ລະເມີດເສລີພາບທາງອິນເຕີເນັດຫຼາຍທີ່ສຸດໃນໂລກຕິດຕໍ່ກັນເປັນປີທີ 4. ຂະນະທີ່ທາງການປັກກິ່ງໄດ້ຍົກລະດັບການຄວບຄຸມຂໍ້ມູນ-ຂ່າວສານກ່ອນເຖິງວັນຄົບຮອບ 30 ປີເຫດການສັງຫານໝູ່ກາງຈະຈຸຣັດທຽນອັນເໝີນ ແລະ ທ່າມກາງການປະທ້ວງໃຫຍ່ໃນຮົງກົງ.

ພ້ອມນີ້, ຟຣີດອມເຮົາສຍັງພົບວ່າ: ມີ 40 ປະເທດທີ່ປາກົດຫຼັກຖານການມີຢູ່ຂອງໂປຣແກຣມຂັ້ນສູງທີ່ໃຊ້ສອດແນມໂຊຊຽວມີເດຍ ຊຶ່ງນັ້ນກໍໝາຍຄວາມວ່າ: 89% ຂອງຜູ້ໃຊ້ງານອິນເຕີເນັດ ຫຼື ເກືອບ 3.000 ລ້ານຄົນທົ່ວໂລກກຳລັງຖືກສອດແນມ, ໂດຍແມ່ນ ສປ ຈີນທີ່ຍັງເປັນຜູ້ນຳແຫ່ງການຕິດຕາມສອດແນມພົນລະເມືອງຂອງຕົນ, ຂະນະທີ່ 47 ປະເທດມີຜູ້ຖືກຈັບຍ້ອນສະ ແດງຄວາມຄິດເຫັນທາງການເມືອງ, ສັງຄົມ ແລະ ສາສະໜາທາງອິນເຕີເນັດ.

 

ຮຽບຮຽງ: ເພັງສະຫວັນ

ຮູບພາບ: bbc.com/thai

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.