ໄຕ້ຫວັນໃຊ້ມາດຕະການຫ້າມໃຊ້ຫຼອດດູດພລາສຕິກ

0
112

ກະແສຮັກໂລກ ຫຼຸດໂລກຮ້ອນ ແລະ ນະໂຍບາຍດ້ານສິ່ງແວດລ້ອມກາຍເປັນສິ່ງທ້າທາຍໃຫ້ຫຼາຍໆປະເທດຕ້ອງຫາມາດຕະການຄວບຄຸມ ແລະ ໃຫ້ຄວາມສຳຄັນ ໜຶ່ງໃນນັ້ນກໍຄືການອອກມາດຕະການຍົກເລິກຖົງພລາສຕິກລວມເຖິງຫຼອດພລາສຕິກ ຊຶ່ງເປັນວັດສະດຸທີ່ສ້າງບັນຫາທາງສິ່ງແວດລ້ອມອັນດັບຕົ້ນໆ.

ໄຕ້ຫວັນກໍເປັນອີກໜຶ່ງເມືອງໃຫຍ່ທີ່ມີການສັ່ງຫ້າມບໍ່ໃຫ້ໃຊ້ຫຼອດພລາສຕິກແບບຈິງຈັງ ໂດຍປະກາດນະໂບບາຍວ່າຈະສັ່ງຫ້າມການໃຊ້ຫຼອດພລາສຕິກຊຶ່ງຈະເລີ່ມຕົ້ນກັບສຳນັກງານຂ້າລາຊະການກວ່າ 8.000 ແຫ່ງ ລວມເຖິງໂຮງຮຽນ ຫ້າງສັບພະສິນຄ້າ ແລະ ຮ້ານອາຫານຈານດ່ວນເປັນອັນດັບທຳອິດ ຊຶ່ງມີຜົນບັງຄັບໃຊ້ເມື່ອວັນທີ 1 ກໍລະກົດຜ່ານມາ ປັດຈຸບັນກໍມີຮ້ານອາຫານຊື່ດັງຫຼາຍແຫ່ງເລີ່ມປະຕິບັດແລ້ວ.

ນະໂຍບາຍນີ້ມີການປະກາດໃຊ້ຢ່າງຈິງຈັງຫາກມີຄົນຝ່າຝືນຕ້ອງຖືກປັບໄໝ 6.000 ໂດລາໄຕ້ຫວັນ ຊຶ່ງທາງລັດຖະບານໄຕ້ຫວັນຫວັງວ່າຈະຍົກເລີກການໃຊ້ຫຼອດດູດພລາສຕິກໄດ້ໝົດພາຍໃນປີ 2030 ທັງນີ້ ມີການປະເມີນວ່າໃນແຕ່ລະປີໄຕ້ຫວັນໃຊ້ຫຼອດດູດພລາສຕິກຫຼາຍເຖິງ 3.000 ລ້ານອັນ ຈຶ່ງເປັນເລື່ອງທີ່ທາງລັດຖະບານຕ້ອງຫາວິທີການແກ້ໄຂບັນຫາ ໂດຍເລີ່ມຕົ້ນຈາກການກະຕຸ້ນພຶດຕິກຳຂອງຜູ້ບໍລິໂພກໃນການກິນໂດຍບໍ່ໃຊ້ຫຼອດພລາສຕິກ ໂດຍຫວັງວ່າໃນອະນາຄົດຈະມີການປັບໂຕ ແລະ ບໍ່ໃຊ້ຫຼອດດູດພລາສຕິກໄດ້ 100%.

ຂະນະທີ່ຊາໄຂ່ມຸກຊຶ່ງເປັນທີ່ນິຍົມໃນໄຕ້ຫວັນ ແລະ ແນ່ນອນວ່າການສັ່ງຫ້າມບໍ່ໃຫ້ໃຊ້ຫຼອດດູດພລາສຕິກຕ້ອງສົ່ງຜົນກະທົບຕໍ່ການດື່ມຊາໄຂ່ມຸກແນ່ນອນ ແຕ່ກໍລະນີນີ້ສາວົກຊາໄຂ່ມຸກ ກໍບໍ່ຕົກກັງວົນເພາະພໍ່ຄ້າແມ່ຄ້າກຽມຊອກຫາຮູບແບບໃໝ່ເພື່ອຮອງຮັບການກິນຊາໄຂ່ມຸກແບບບໍ່ຈຳເປັນຕ້ອງໃຊ້ຫຼອດດູດ ທັງກຽມພັດທະນາຖ້ວຍທີ່ສາມາດໃຊ້ຊ້ຳໄດ້ຫຼາຍຄັ້ງ ແລະ ມີປ່ອງສຳລັບໄຂ່ມຸກ ເມື່ອກິນກໍຈະໄດ້ທັງຊາ ແລະ ໄຂ່ມຸກພ້ອມກັນ ທັງນີ້ ຖ້ວຍດັ່ງກ່າວຈະອອກວາງຂາຍໃນທ້າຍປີນີ້.

ທັງນີ້ ເມືອງຊີເອເທິລຖືເປັນເມືອງທຳອິດໃນອາເມຣິກາທີ່ປະກາດຫ້າມໃຊ້ຫຼອດພລາສຕິກ ຊຶ່ງໄດ້ເລີ່ມມາແຕ່ປີ 2018 ຜ່ານມາ ສ່ວນສະຕາບັ໊ກມີແຜນຈະຍົກເລີກການໃຊ້ຫຼອດດູດພລາສຕິກທັງໝົດໃນສາຂາທົ່ວໂລກພາຍໃນປີ 2020 ແລະ ທາງສະຫະພາບເອີຣົບກໍໄດ້ມີຂໍ້ຕົກລົງໃນການຫ້າມໃຊ້ຫຼອດດູດພລາສຕິກ ລວມເຖິງບ່ວງ ແລະ ສ້ອມພລາສຕິກພາຍໃນ ປີ 2021 ອີກດ້ວຍ.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: posttoday

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.