ໄຊປຣັສກຽມຍຶດຄືນພາສປອດກຸ່ມຄົນໄຮໂຊກຳປູເຈຍ

0
1066

ລັດຖະບານຂອງປະເທດໄຊປຣັສປະກາດຈະເລີ່ມຂະບວນການຍຶດຄືນໜັງສືເດີນທາງຈາກຊາວຕ່າງຊາດຈຳນວນ 26 ຄົນ, ລວມເຖິງກຸ່ມຄົນຮັ່ງມີທີ່ເປັນຍາດພີ່ນ້ອງ ແລະ ຄົນໃກ້ຊິດກັບນາຍົກລັດຖະມົນຕີ ຮຸນ ເຊນ ຂອງກຳປູເຈຍທີ່ໄດ້ສັນຊາດໄຊປຣັສຈາກການໃຊ້ເງິນຈຳນວນມະຫາສານມາລົງທຶນໃນໄຊປຣັສ.

ສຳນັກຂ່າວຣອຍເຕີ້ລາຍງານຈາກນະຄອນເອເທນ ປະເທດເກຣັກເມື່ອວັນທີ 6 ພະຈິກຜ່ານມາວ່າ: ໄຊປຣັສຊຶ່ງເປັນປະເທດເກາະດອນຂະໜາດນ້ອຍທາງຟາກຕາເວັນອອກຂອງທະເລເມດິເຕີເຣນຽນກຳລັງສັ່ນຄອນຈາກການຖືກເປີດໂປງໂຄງການລົງທຶນແລກກັບພາສປອດ, ໂດຍລາຍງານພິເສດຂອງສຳນັກຂ່າວຣອຍເຕີ້ເມື່ອເດືອນຕຸລາຜ່ານມາທີ່ລະບຸຊື່ຂອງກຸ່ມຄົນທີ່ໄດ້ຮັບຜົນປະໂຫຍດຈາກໂຄງການ, ລວມເຖິງຜູ້ບັນຊາການຕຳຫຼວດແຫ່ງຊາດ ແລະ ລັດຖະມົນຕີກະຊວງການເງິນຂອງກຳປູເຈຍ.

ທັງນີ້, ການຖອດຖອນສິດການເປັນພົນລະເມືອງເປັນສິ່ງທີ່ເກືອບຈະບໍ່ເຄີຍປາກົດມາກ່ອນ ແລະ ຄວາມເຄື່ອນໄຫວຂອງທາງການໄຊປຣັສມີຂຶ້ນຫຼັງຈາກທີ່ເຈົ້າໜ້າທີ່ດຳເນີນການສືບສວນ-ສອບສວນຕາມການລາຍງານຂອງຣອຍເຕີ້. ຂະນະທີ່ ທ່ານ ຄອນສະແຕນຕິນອສ ເພທຣິເດສ ລັດຖະມົນຕີກະຊວງປ້ອງກັນປະເທດຂອງໄຊປຣັສກ່າວວ່າ: ຫຼັງການປະຊຸມຄະນະລັດຖະມົນຕີເປັນເວລາກວ່າ 4 ຊົ່ວໂມງໃນນະຄອນນິໂຄເຊຍເມື່ອບໍ່ດົນມານີ້ກໍໄດ້ຂໍ້ສະຫຼຸບວ່າ: ຄະນະລັດຖະມົນຕີຢືນຢັນເຈຕະນາຂອງລັດຖະບານໃນການຢຶດໝັ້ນຕໍ່ເງື່ອນໄຂຂອງໂຄງການລົງທຶນໄຊປຣັສ.

ທ່ານ ເພທຣິເດສ ຍັງບໍ່ໄດ້ເປີດເຜີຍສັນຊາດ ແລະ ຕົວຕົນຂອງຊາວຕ່າງຊາດ 26 ຄົນທີ່ຈະຖືກຍຶດຄືນພາສປອດ, ແຕ່ແຫຼ່ງຂ່າວວົງໃນຂອງລັດຖະບານໄດ້ເປີດເຜີຍວ່າ: ໃນນັ້ນ ມີຊາວຣັດເຊຍ 9 ຄົນ, ກຳປູເຈຍ 8 ຄົນ, ສປປ ຈີນ 5 ຄົນ, ເຄນຢາ 2 ຄົນ, ມາ ເລເຊຍ 1 ຄົນ ແລະ ຊາວອີຣ່ານ 1 ຄົນ. ໂດຍກຸ່ມຄົນເຫຼົ່ານີ້ກ່ຽວພັນກັບໂຄງການລົງທຶນໃນໄຊປຣັສໃນ 9 ໂຄງການ.

ສາທາລະນະລັດໄຊປຣັສເລີ່ມໂຄງການລົງທຶນແລກພາກປອດເມື່ອປີ 2012, ໂດຍຊາວຕ່າງຊາດສາມາດນຳເງິນໄປລົງທຶນໃນໄຊປຣັສຢ່າງໜ້ອຍ 2 ລ້ານເອີໂຣແລ້ວຈະໄດ້ຮັບສັນຊາດ ແລະ ສາມາດເດີນທາງເຂົ້າ-ອອກໄດ້ຢ່າງເສລີທົ່ວທັງ 28 ປະເທດສະມາຊິກສະຫະພາບເອີຣົບ ຫຼື EU. ຢ່າງໃດກໍຕາມ ນັບຕັ້ງແຕ່ເລີ່ມໂຄງການດັ່ງກ່າວລັດຖະບານໄຊປຣັສກໍໄດ້ອະນຸຍາດສິດທິຄວາມເປັນພົນ ລະເມືອງໃຫ້ກັບຊາວຕ່າງຊາດລວມທັງໝົດ 1.864 ຄົນ, ແຕ່ຖ້າລວມສະມາຊິກໃນຄອບຄົວໂຕເລກກໍສູງຂຶ້ນເກືອບ 4.000 ຄົນ.

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.