ໃນປີ 2019 ລາວຍັງກວດພົບການສໍ້ລາດບັງຫຼວງກວ່າ 1,5 ຕື້ກີບ

0
208

ອີງຕາມການລາຍງານຂ່າວຈາກໜັງສືພິມປະຊາຊົນໃນວັນທີ 13 ມັງກອນຜ່ານມາໃຫ້ຮູ້ວ່າ: ກອງ​ປະຊຸມ​ວຽກ​ງານ​ກວດກາ​ທົ່ວ​ປະ ເທດ​ປະຈຳ​ປີ 2019 ​​ໂດຍອົງການ​ກວດກາ​ລັດຖະບານໄດ້​ຂຶ້ນ​ຜ່ານ​ຮ່າງ​ບົດ​ສະຫຼຸບ​ຕີ​ລາຄາການເຄື່ອນໄຫວ​ວຽກ​ງານ​ຕິດ​ຕາມ​-​ກວດກາ ແລະ ສະກັດ​ກັ້​ນ-​ຕ້ານ​ການ​ສໍ້​ລາດ​ບັງ​ຫຼວງ​ໃນ​ປີ 2019 ແລະ ວາງທິດ​ທາງ​ແຜນການ​ວຽກ​ງານ​ກວດກາ​ປີ 2020.

ກອງ​ປະຊຸມ​ວຽກ​ງານ​ກວດກາ​ທົ່ວ​ປະເທດ​ປະຈຳ​ປີ 2019 ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 8-10 ມັງກອນ 2020 ຜ່ານ​ມາ ທີ່​ສະໂມສອນ​ຄະນະ​ກວດກາ​ສູນ​ກາງ​ພັກ (ຫຼັກ 6) ພາຍ​ໃຕ້​ການ​ເປັນປະທານ​ຂອງ​ ສະຫາຍ ບຸນ​ທອງ ຈິດ​ມະນີ ກຳມະການ​ກົມ ​ການເມືອງ​ສູນ​ກາງ​ພັກ, ເລຂາທິການ​ສູນ​ກາງ​ພັກ, ຮອງ​ນາຍົກລັດຖະມົນຕີ ທັງເປັນປະທານ​ຄະນະ​ກວດກາ​ສູນ​ກາງ​ພັກ, ປະທານ​ອົງການ​ກວດກາ​ລັດຖະບານ, ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ.

ໃນ​ໄລຍະ 1 ປີຜ່ານມາ​ຄະນະ​ພັກ, ອົງການ​ປົກຄອງ​ຄະນະ​ກວດກາພັກ​-ອົງການ​ກວດກາ​ລັດ​ແຕ່​ລະ​ຂັ້ນ​ໄດ້​ສຸມ​ໃສ່​ຈັດ​ຕັ້ງ​ປະຕິບັດ​ວຽກ​ງານ​ກວດກາ​ຕາມ​ພາລະ​ບົດບາດ, ໜ້າທີ່, ຂອບເຂດ​ສິດ​ຂອງ​ຕົນ ເປັນຕົ້ນ​ແມ່ນ​ການ​ຄົ້ນຄວ້າ​ສ້າງ ແລະ ເຜີຍ​ແຜ່​-​ໂຄສະນາ​ນິຕິ​ກໍາ​ຕ່າງໆ​ທີ່​ກ່ຽວຂ້ອງ, ການເຄື່ອນໄຫວ​ວຽກ​ງານ​ຕິດ​ຕາມ​-​ກວດກາ​ພັກ, ການ​ຕິດ​ຕາມ​-​ກວດກາ​ການ​ບໍລິຫານ​ລັດ ໂດຍ​ອົງ ການ​ກວດກາ​ລັດ​ແຕ່​ລະ​ຂັ້ນ​ໄດ້​ຕິດຕາມ, ກວດກາ​ຕາມ​ພາລະ​ບົດບາດ​ຂອງ​ຕົນ ແລະ ຕາມ​ການ​ລາຍ​ງານ​ຈາກ 21 ກະ​ຊວງ​-​ອົງ ການ, 17 ແຂວງ​-​ນະຄອນຫຼວງ ໄດ້​ກວດກາ​ທັງ​ໝົດ 945 ເປົ້າ​ໝາຍ, ໃນ​ນີ້ ຕິດຕາມ, ກວດກາ​ປົກກະຕິ 333 ເປົ້າ​ໝາຍ, ສືບຕໍ່​ຕິດຕາມ, ກວດກາ​ໂຄງການ​ລົງທຶນ​ຂອງ​ລັດ​ເລີ່ມ​ແຕ່​ຫົວທີ 140 ໂຄງການ, ກວດກາ​ຕາມ​ຜົນ​ການ​ກວດສອບ 307 ເປົ້າ​ໝາຍ. ຜ່ານ​ການ​ຕິດຕາມ, ກວດກາ ພົບ​ເຫັນ​ຜົນ​ເສຍ​ຫາຍ​ທັງ​ໝົດ 1.477,64 ຕື້​ກີບ, 10,08 ລ້ານ​ບາດ, 24,68 ລ້ານ​ໂດ​ລາ, ລົດ​ໃຫຍ່ 5 ຄັນ, ເກັບ​ກູ້​ຄືນ 35,95 ຕື້​ກີບ, 10 ລ້ານ​ບາດ, 200.000 ໂດ​ລາ ແລະ ລົດ​ໃຫຍ່ 4 ຄັນ.

 

 

 

ຮຽບຮຽງຂ່າວ: ພຸດສະດີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.