ໂຟກສະວາເກນວາງຂາຍ “ລົດເຕົ່າ” ລຸ້ນສຸດທ້າຍ

0
276

ລົດເຕົ່າ ຫຼື ບີເທິລ ຂອງບໍລິສັດໂຟກສະວາເກນຈາກເຢຍລະມັນກາຍເປັນຕຳນານໃນວົງການລົດຍົນໂລກຢ່າງເປັນທາງການ ເມື່ອໂຮງງານໃນເມັກຊິໂກສິ້ນສຸດການຜະລິດລົດລຸ້ນດັ່ງກ່າວຈຳນວນ 65 ຄັນສຸດທ້າຍ.

ບໍລິສັດໂຟກສະວາເກນໜຶ່ງໃນຜູ້ຜະລິດລົດຍົນລາຍໃຫຍ່ລະດັບໂລກຈາກເຢຍລະມັນເປີດໂຕລົດຍົນລຸ້ນ “ບິເທິລ” ຫຼື ທີ່ຮູ້ຈັກໃນຊື່ ລົດໂຟກເຕົ່າ ຊຶ່ງຜະລິດເປັນລຸ້ນສຸດທ້າຍຈຳນວນ 65 ຄັນເທົ່ານັ້ນຈາກໂຮງງານທີ່ເມືອງປວຍບລາໃນລັດປວຍລາ ທາງຕອນກາງຂອງເມັກຊິໂກ ໂດຍທ່ານ ເຊເຕຟເຟນ ໄຣເຊີ ປະທານຄະນະເຈົ້າໜ້າທີ່ບໍລິຫານ (CEO) ຂອງໂຟກ ສະວາເກນປະຈຳເມັກຊິໂກກ່າວວ່າ ບິເທິລລຸ້ນສຸດທ້າຍຈະວາງຈຳໜ່າຍສະເພາະໃນເມັກຊິໂກ ແລະ ທາງອິນເຕີເນັດເທົ່ານັ້ນ ສ່ວນລາຄາເລີ່ມຕົ້ນແມ່ນຄັນລະ 21.000 ໂດລາ.

ຢ່າງໃດກໍຕາມ ຫຼາຍຝ່າຍເຊື່ອວ່າບິເທິລຊຸດສຸດທ້າຍຈະໄດ້ຮັບຄວາມສົນໃຈຢ່າງຫຼວງຫຼາຍ ໂດຍສະເພາະໃນກຸ່ມນັກສະສົມ ແລະ ຜູ້ທີ່ນິຍົມລົດຫາຍາກ ແລະ ຄາດວ່າຈະສາມາດຈຳໜ່າຍໄດ້ໝົດຢ່າງໄວວາແນ່ນອນ ເນື່ອງຈາກລົດຍົນທຸກຄັນຈະມີແຜ່ນປ້າຍທະບຽນທີ່ລະນຶກ ລຽງລຳດັບໝາຍເລກລົດຍົນຈາກ 1 ເຖິງ 65 ຂະນະທີ່ສີຂອງລົດມີໃຫ້ເລືອກ 4 ສີຄື ດຳ ຂາວ ເບຊ ແລະ ສີນ້ຳເງິນເມທັລລິກ.

ທັງນີ້ ໂຟກສະວາເກນປະກາດແຜນຍຸຕິການຜະລິດ ບິເທິລ ຫຼື ລົດໂຟກເຕົ່າເມື່ອເດືອນກັນຍາ 2018 ໂດຍໃຫ້ເຫດຜົນວ່າ ບໍລິສັດຈະຫັນໄປໃຫ້ຄວາມສຳຄັນກັບການຜະລິດລົດຍົນຂັບເຄື່ອນດ້ວຍພະລັງງານໄຟຟ້າ ແລະ ລົດຍົນຂະໜາດໃຫຍ່ແບບຄອບຄົວເພີ່ມ ຂຶ້ນຕາມກະແສນິຍົມຂອງຕະຫຼາດ ແລະ ຜູ້ຊົມໃຊ້.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.