ໂຄງການກໍ່ສ້າງທາງດ່ວນວຽງຈັນໝາຍເລກ 1 ພ້ອມລົງມືທ້າຍປີນີ້

0
878

ໂຄງການກໍ່ສ້າງທາງດ່ວນວຽງຈັນໝາຍເລກ 1 (ທາງດ່ວນຄູ່ຂະໜານຖະໜົນໄກສອນພົມວິຫານ) ແຕ່ໄອເຕັກຫາດົງໝາກຄາຍ ຄາດວ່າຈະລົງມືກໍ່ສ້າງໃນທ້າຍປີ 2019 ນີ້ ຊຶ່ງປັດຈຸບັນນີ້ຢູ່ໃນຂັ້ນຕອນການໄກ່ເກ່ຍ ແລະ ຊົດເຊີຍສິ່ງກີດຂວາງຕ່າງໆ ໂຄງການດັ່ງກ່າວລົງທຶນໂດຍບໍລິສັດເອເຊຍລົງທຶນພັດທະນາ ແລະ ກໍ່ສ້າງຈໍາກັດຜູ້ດຽວ ຮ່ວມກັບບໍລິສັດ ນໍລິໂກ ສປ ຈີນ ໃນຮູບແບບ BOT (ກໍ່ສ້າງ ດຳເນີນງານ ແລະ ມອບໂອນ) ຄາດວ່າຈະໃຊ້ເວລາໃນການກໍ່ສ້າງໃຫ້ສຳເລັດພາຍໃນ 3 ປີ ທັງນີ້ ກໍເພື່ອເປັນການຮອງຮັບການຂະຫຍາຍຕົວຂອງເສດຖະກິດ-ສັງຄົມ ແລະ ຫຼຸດຜ່ອນການສັນຈອນທີ່ແອອັດໃນຕົວເມືອງ ໂດຍສະເພາະແມ່່ນໃນຊົ່ວໂມງທີ່ຮີບດ່ວນ.

ທ່ານ ບຸນຈັນ ແກ້ວສີທຳມະ ຮອງຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນໄດ້ໃຫ້ສຳພາດເມື່ອວັນທີ 5 ກໍລະກົດຜ່ານມາວ່າ ຄຽງຄູ່ກັບການຂະຫຍາຍຕົວຂອງເສດຖະກິດ-ສັງຄົມທີ່ວ່ອງໄວ ຈຳນວນພາຫະນະກໍນັບມື້ນັບເພີ່ມຂຶ້ນເຊັ່ນກັນ ຊຶ່ງເຮັດໃຫ້ການສັນຈອນມີຄວາມຫຍຸ້ງຍາກ ແອອັດ ແລະ ໜາແໜ້ນພໍສົມຄວນ ດັ່ງນັ້ນ ລັດຖະບານກໍຄືຂະແໜງການໂຍທາທິການ ແລະ ຂົນສົ່ງຈຶ່ງຄົ້ນຄວ້າ ສຳຫຼວດ ສຶກສາຄວາມເປັນໄປໄດ້ ແລະ ທາບທາມຫາງສຽງຂອງປະຊາຊົນ ແລະ ຕົກລົງສ້າງເສັ້ນ ທາງດັ່ງກ່າວເພື່ອເປັນການແກ້ໄຂບັນຫາການສັນຈອນທີ່ແອອັດ ແລະ ສ້າງຄວາມສະດວກສະບາຍໃຫ້ກັບຜູ້ໃຊ້ລົດໃຊ້ຖະໜົນໃນຕໍ່ໜ້າ ເນື່ອງຈາກໂຄງການດັ່ງກ່າວເປັນຮູບແບບ BOT ແນ່ນອນຕ້ອງມີຄ່າບໍລິການ ຊຶ່ງຖືເປັນອີກໜຶ່ງທາງເລືອກໃຫ້ກັບຜູ້ໃຊ້ລົດໃຊ້ຖະໜົນໂດຍບໍ່ໄດ້ມີການບັງຄັບໃດໆທັງສີ້ນ ຖ້າໃຜຟ້າວ ຫຼື ຕ້ອງການຄວາມໄວເພື່ອໃຫ້ທັນກັບເວລາກໍສາມາດໄປໃຊ້ທາງດ່ວນໄດ້ ແລະ ຖ້າບໍ່ຟ້າວກໍໃຊ້ທາງປົກກະຕິ ໂຄງການກໍ່ສ້າງທາງດ່ວນແຫ່ງນີ້ດຳເນີນພາຍໃຕ້ໂດຍທຸກພາກສ່ວນໄດ້ຮັບຜົນປະໂຫຍດເຊັ່ນ ຜູ້ລົງທຶນກໍມີກຳໄລ ພາກລັດກໍມີຜົນປະໂຫຍດ ສັງຄົມກໍໄດ້ຜົນປະໂຫຍດ ທັງເປັນໃບໜ້າໃບຕາໃຫ້ກັບປະເທດຊາດກໍຄືນະຄອນຫຼວງວຽງຈັນ.

ທ່ານ ບຸນຈັນ ກ່າວຕື່ມວ່າ ທຸກໂຄງການພັດທະນາແມ່ນຫຼີກລ້ຽງບໍ່ໄດ້ທາງດ້ານຜົນກະທົບ ດັ່ງນັ້ນ ທຸກໂຄງການຕ້ອງມີການປະເມີນຜົນກະທົບຕໍ່ສະພາບແວດລ້ອມ ແລະ ສັງຄົມຢ່າງລະອຽດ ແລະ ໃຫ້ມີຜົນກະທົບໜ້ອຍທີ່ສຸດ ແລະ ປະຊາຊົນເອງກໍຕ້ອງເສຍສະ ຫຼະເພື່ອການພັດທະນາ ໝາຍຄວາມວ່າທຸກຄົນຕ້ອງມີສ່ວນຮ່ວມນຳກັນເພື່ອນຳພາປະເທດເຮົາກ້າວໄປສູ່ຄວາມສີວິໄລ ແລະ ຈະ ເລີນຮຸ່ງເຮືອງໃຫ້ທຽບເທົ່າກັບສາກົນເທື່ອລະກ້າວ ເສັ້ນທາງດັ່ງກ່າວມີຄວາມຍາວທັງໝົດ 15,3 ກີໂລແມັດ ອອກແບບເປັນທາງ 4 ເລນ ມີຈຸດເຊື່ອມຕໍ່ກັບຖະໜົນສາຍຫຼັກຕ່າງໆ ມີຈຸດລ້ຽວຄືນ ມີລະບົບແສງສະຫວ່າງ ແລະ ສິ່ງອຳນວຍຄວາມສະດວກອື່ນໆ ໃນນັ້ນ ມີບ້ານທີ່ໄດ້ຮັບຜົນກະທົບທັງໝົດ 19 ບ້ານ ຊຶ່ງມີ 146 ຫຼັງຄາເຮືອນ ແລະ ມີດິນທັງໝົດ 767 ຕອນໃນສອງເມືອງຄື ໄຊເສດຖາ ແລະ ໄຊທານີ ສຳລັບການຊົດເຊີຍແມ່ນມີ 3 ປະເພດຄື ດິນ ສິ່ງປຸກສ້າງ ແລະ ຜົນລະປູກກະສິກຳໃນລາຄາທີ່ສົມເຫດສົມ ຜົນທີ່ສຸດ ໂດຍອີງຕາມແຕ່ລະປະເທດຂອງທີ່ດິນ ແລະ ສິ່ງປຸກສ້າງ ຊຶ່ງການປະເມີນຕ່າງໆແມ່ນອີງຕາມລະບົບທະນາຄານ ແລະ ພາກສ່ວນອື່ນໆທີ່ກ່ຽວຂ້ອງ.

ທ່ານ ບຸນວັນ ຈະສົ໋ວເກົ້າ ຮອງເຈົ້າເມືອງໄຊທານີກ່າວວ່າ ສະເພາະເມືອງໄຊທາມີພຽງ 7 ບ້ານ ທີ່ໄດ້ຮັບຜົນກະທົບ ມີ 31 ຫຼັງຄາເຮືອນ ຊຶ່ງຜ່ານການລົງພົບປະ ແລະ ເກັບກຳຂໍ້ມູນຕ່າງໆເຫັນວ່າປະຊາຊົນກວມ 90% ແມ່ນເຫັນດີໃນການຈັດຕັ້ງປະຕິບັດໂຄງການນີ້.

ທ່ານ ບຸນປີງ ບັນຍາຈິດ ຮອງເຈົ້າເມືອງໄຊເຊດຖາກ່າວວ່າ ເມືອງຕົນເອງມີບ້ານທີ່ໄດ້ຮັບຜົນກະທົບທັງໝົດ 12 ບ້ານ ມີ 115 ຫຼັງຄາເຮືອນ ແລະ ບາງຄອບຄົວກໍເຄີຍຖືກຜົນກະທົບມາຈາກໂຄງການອື່ນກ່ອນໜ້ານີ້ ໝາຍຄວາມວ່າຕ້ອງໄດ້ຍົກຍ້າຍເຖິງສອງຄັ້ງຊຶ່ງເຮັດໃຫ້ປະຊາຊົນໄດ້ຮັບຄວາມຫຍຸ້ງຍາກຫຼາຍ ປັດຈຸບັນການຊົດເຊີຍຕ່າງໆຢູ່ໃນຂັ້ນຕອນການເຈລະລາ ແລະ ພ້ອມຈະຈ່າຍຄ່າຊົດເຊີຍໃຫ້ປະຊາຊົນຜູ້ທີ່ໄດ້ຮັບຜົນກະທົບທັນທີ ພາຍຫຼັງສອງຝ່າຍໄດ້ມີການຕົກລົງເຫັນດີເປັນເອກະພາບກັນ ຊຶ່ງໃນຮູບແບບການຊົດເຊີຍມີ​ 3 ປະເພດຄື ຊົດເຊີຍເປັນເງິນສົດທັງໝົດ (ລາຄາແມ່ນຈະອີງຕາມປະເທດຂອງດິນ ແລະ ອາຄານທີ່ໄດ້ຮັບຄວາມເສຍຫາຍຕ່າງກັນ) ຊົດເຊີຍເຮືອນພ້ອມທີ່ດິນ ແລະ ເຂົ້າຮຸ້ນນຳບໍລິສັດ ແຕ່ປະຊາຊົນເກືອບທັງໝົດແມ່ນເຫັນດີຊົດເຊີຍເປັນເງິນສົດ.

 

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.