ແອັດສະປາຍຈະຈັດກອງປະຊຸມ COP 25 ວ່າດ້ວຍການປ່ຽນແປງສະພາບພູມີອາກາດໂລກ

0
159

ອົງການອຸຕຸນິຍົມວິທະຍາໂລກ ຫຼື WMO ໄດ້ອອກມາຖະແຫຼງເມື່ອບໍ່ດົນມານີ້ວ່າ: ລະດັບຄວມເຂັ້ມຂຸ້ນຂອງແກ໊ສກາກບອນ ແລະ ແກ໊ສເຮືອນແກ້ວອື່ນໆໃນຊັ້ນບັນຍາກາດໂລກເມື່ອປີ 2018 ຍັງຄົງເພີ່ມສູງຂຶ້ນເລື້ອຍໆຈົນເຖິງລະດັບທຳລາຍສະຖິຕິທີ່ມີການບັນ ທຶກໄວ້ອີກຄັ້ງ.

ຊຶ່ງເມື່ອປີຜ່ານມາຄວາມເຂັ້ມຂຸ້ນຂອງກາກບອນໃນຊັ້ນບັນຍາກາດເພີ່ມຂຶ້ນໃນອັດຕາທີສູງກວ່າຄ່າສະເລ່ຍຂອງທັງສະຕະວັດທີ່ຜ່ານມາຄືຢູ່ທີ່ 407,8 ສ່ນໃນລ້ານສ່ວນ (ppm) ສູງກວ່າຄ່າສະເລ່ຍໃນປີ 2017 ຊຶ່ງຢູ່ທີ່ 405,5 ppm, ທັງສູງກວ່າລະດັບກ່ອນຍຸກອຸດສາຫະກຳເມື່ອປີ 1750 ເຖິງ 147%.

ສ່ວນຄວາມເຂັ້ມຂຸ້ນຂອງແກ໊ສເຮືອນແກ້ວອື່ນໆເຊັ່ນ: ມີເທນ ແລະ ໄນຕຣັສອ໋ອກໄຊກໍເພີ່ມສູງຂຶ້ນກວ່າຄ່າສະເລ່ຍເຊັ່ນກັນ, ກວ່າ 60% ຂອງມີເທນໃນຊັ້ນບັນຍາກາດມາຈາກກິດຈະກຳຂອງມະນຸດເຊັ່ນ: ກະສິກຳ ແລະ ການລ້ຽງສັດ ເຮັດໃຫ້ມີເທນໃນຊັ້ນບັນຍາ ກາດໃນຍຸກປັດຈຸບັນເພີ່ມສູງຂຶ້ນກວ່າຊ່ວງກ່ອນຍຸກອຸດສາຫະກຳເຖິງ 259%, ສ່ວນໄນຕຣັສອ໋ອກໄຊຊຶ່ງບາງສ່ວນແມ່ນມາຈາກການໃຊ້ປຸ໋ຍເຄມີ, ມີຄວາມເຂັ້ມຂຸ້ນເພີ່ມສູງຂຶ້ນກວ່າ 123% ເມື່ອທຽບກັບປີ 1750.

ນັບແຕ່ຊ່ວງທົດສະວັດ 1990 ເປັນຕົ້ນມາ, ຜົນກະທົບຈາກແກ໊ສເຮືອນແກ້ວຕໍ່ອຸນຫະພູມໂລກທີ່ເພີ່ມຂຶ້ນໂດຍລວມ (Total radiative forcing)  ນັບວ່າສູງຂຶ້ນເຖິງ 43%, ເຮັດໃຫ້ໂລກຮ້ອນ ແລະ ເກີດການປ່ຽນແປງຂອງສະພາບພູມີອາກາດເປັນວົງກວ້າງ, ລະດັບຄວາມເຂັ້ມຂຸ້ນຂອງແກ໊ສເຮືອນແກ້ວທີ່ຕົກຄ້າງ ແລະ ສະສົມໃນຊັ້ນບັນຍາກາດໂລກແມ່ນມີຄວາມແຕກຕ່າງຈາກປະລິມານການປ່ອຍແກ໊ສເຮືອນແກ້ວຈາກການເຜົາໄໝ້ເຊື້ອໄຟຟອສຊິລ ແລະ ຈາກອຸດສາຫະກຳຕ່າງໆໃນຂັ້ນຕົ້ນ, ເນື່ອງຈາກປ່າ ໄມ້, ຜືນດິນ ແລະ ມະຫາສະໝຸດຈະດູດຊຶມກາກບອນ ແລະ ແກ໊ສອື່ນໆທີ່ເກີດຂຶ້ນກ່ອນ, ແຕ່ຖ້າຫາກແກ໊ສເຮືອນແກ້ວຍັງມີເຫຼືອຫຼາຍກໍຈະກາຍເປັນສ່ວນເກີນ ແລະ ຈະສະສົມຢູ່ໃນຊັ້ນບັນຍາກາດແລ້ວກາຍເປັນຊະນວນກັກເກັບຄວາມຮ້ອນຂອງໂລກບໍ່ໃຫ້ມີ ການລະບາຍອອກ.

ຂະນະທີ່ເລຂາທິການຂອງ WMO ກໍໄດ້ກ່າວວ່າ: “ບໍ່ມີສັນຍານທີ່ບົ່ງບອກວ່າການສະສົມຂອງແກ໊ສເຮືອນແກ້ວໃນປັດຈຸບັນຈະມີທ່າອຽງຢຸດນິ້ງ ຫຼື ແມ່ນແຕ່ຫຼຸດລົງເລີຍ!! ເຖິງແມ່ນວ່ານາໆຊາດຈະຮ່ວມຫາວິທີແກ້ໄຂບັນຫາດັ່ງກ່າວຕາມຄວາມຕົກລົງປາຣີ ວ່າດ້ວຍການປ່ຽນແປງສະພາບພູມີອາກາດກໍຕາມ”, ເຮົາຈຳເປັນຈະຕ້ອງປ່ຽນຄວາມຕົກລົງໃຫ້ເປັນການລົງມືປະຕິບັດຢ່າງຈິງຈັງ, ຕ້ອງບໍ່ລືມວ່າຄັ້ງຫຼ້າສຸດທີ່ໂລກມີຄວາມເຂັ້ມຂຸ້ນຂອງແກ໊ສເຮືອນ ແກ້ວໃນລະດັບນີ້ກໍຄືເມື່ອ 3-5 ລ້ານປີກ່ອນ, ຊຶ່ງໃນຕອນນັ້ນອຸນຫະພູມໂລກສູງກວ່ານີ້ 2-3 ອົງສາ ແລະ ລະດັບນໍ້າທະເລກໍສູງກວ່າປັດຈຸບັນ 10-20 ແມັດ.

ຢ່າງໃດກໍຕາມ, ຂໍ້ມູນໃນລາຍງານເບື້ອງຕົ້ນຈະຖືກນຳສະເໜີໂດຍລະອຽດອີກຄັ້ງໃນກອງປະຊຸມ COP 25 ຊຶ່ງຜູ້ແທນຈາກເກືອບ 20 ປະເທດທົ່ວໂລກຈະເຂົ້າຮ່ວມຫາລືກັນໃນປະເດັນການປ່ຽນແປງຂອງສະພາບພູມີອາກາດທີ່ນະຄອນມາດຣິດ ປະເທດແອັດສະ ປາຍ ໃນຕົ້ນເດືອນທັນວາ 2019 ນີ້.

 

ຮຽບຮຽງ: ເພັງສະຫວັນ

ຮູບພາບ: bbc.com/thai

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.