ແຂວງຄຳມ່ວນຈັດພິທີມອບ-ຮັບສະຖານີວິທະຍຸທ້ອງຖິ່ນ

0
107

ເມື່ອວັນທີ 27 ພະຈິກຜ່ານມາທີ່ສະຖານີວິທະຍຸທ້ອງຖິ່ນເມືອງຄູນຄຳ ແຂວງຄຳມ່ວນໄດ້ຈັດພິທີມອບ-ຮັບສະຖານີວິທະຍຸທ້ອງຖິ່ນ  ໂດຍເປັນກຽດເຂົ້າຮ່ວມຂອງ ທ່ານ ຄຳສີ ອຸດທິວົງ ຮອງເຈົ້າແຂວງໆຄຳມ່ວນ, ທ່ານ ແກ້ວລັນດອນ ຈັນທະປານີ ເຈົ້າເມືອງໆຄູນຄຳ, ທ່ານ ສຸລິເດດ ເບົ້າມະນີໂຄດ ຮອງຜູ້ອຳນວຍການໃຫຍ່ບໍລິສັດໄຟຟ້າເທີນ-ຫີນບູນ ພາວເວີ ຈຳກັດ, ມີຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ມີບັນດາແຂກຖືກເຊີນ, ພາກສ່ວນກ່ຽວຂ້ອງ ແລະ ພໍ່ແມ່ປະຊາຊົນເຂົ້າຮ່ວມ.

ສະຖານີວິທະຍຸທ້ອງຖິ່ນເມືອງຄູນຄຳແມ່ນໄດ້ຮັບການສະໜັບສະໜູນທາງດ້ານທຶນຮອນຈາກບໍລິສດໄຟຟ້າເທີນ-ຫີນບູນ ພາວເວີ້ ຈຳກັດ ລວມມູນຄ່າຫຼາຍກວ່າ 270 ລ້ານກີບ ຊຶ່ງໄດ້ມອບໃຫ້ກົມສື່ມວນຊົນ ກະຊວງ ຖວທ ເປັນຜູ້ຈັດຊື້ດ້ານອຸປະກອນເຄື່ອງສົ່ງ, ໂດຍໄດ້ເລີ່ມລົງມືການຕິດຕັ້ງເຄື່ອງສົ່ງໃນເດືອນເມສາ 2019 ແລະ ສໍາເລັດການຕິດຕັ້ງໃນເດືອນມິຖຸນາ 2019 ຊຶ່ງເປັນວິທະຍຸກະຈາຍສຽງລະບົບ FM ຄື້ນຄວາມຖີ່ 97,70 MHZ ດ້ວຍກຳລັງສົ່ງ 500 W ຕັ້ງຢູ່ບ້ານພູຊາດ ເມືອງຄູນຄຳ ແຂວງຄຳມ່ວນ ຈຸດປະສົງກໍເພື່ອຮັບໃຊ້ເຂົ້າໃນວຽກງານໂຄສະນາ, ເຜີຍແຜ່ຂໍ້ມູນ-ຂ່າວສານ, ແນວທາງນະໂຍບາຍຂອງພັກ-ລັດ, ເຜີຍແຜ່ດ້ານຄວາມຮູ້, ສາລະບັນເທີງ ລວມເຖິງການປະກາດແຈ້ງການເຖິງເຫດການສຸກເສີນກ່ຽວກັບໄພພິບັດຕ່າງໆໃຫ້ກັບພໍ່ແມ່ປະຊາຊົນ ເພື່ອກຽມຄວາມພ້ອມຮັບມືໃຫ້ທັນກັບສະພາບການ.

ປັດຈຸບັນໄດ້ທົດລອງອອກອາກາດແລ້ວເລີ່ມແຕ່ເວລາ 6:30 ນາທີຫາ 19:30 ນາທີ (ທຸກວັນຈັນຫາວັນສຸກ), ອອກອາກາດ 13 ຊົ່ວໂມງຕໍ່ມື້, ສາມາດກວມເອົາ 90% ຂອງພື້ນທີ່ໃນທົ່ວເມືອງ ແລະ ພື້ນທີ່ບາງສ່ວນຂອງເມືອງຫີນບູນ, ເມືອງນາກາຍ ແລະ ເມືອງປາກກະດິງ, ຄຳເກີດ, ເມືອງວຽງທອງ ແຂວງບໍລິຄຳໄຊ. ຈາກນັ້ນ ກໍໄດ້ເຊັນບົດບັນທຶກການມອບ-ຮັບລະຫວ່າງ ທ່ານ ສຸລິເດດ ເບົ້າມະນີໂຄດ ຮອງຜູ້ອຳນວຍການໃຫຍ່ບໍລິສັດໄຟຟ້າເທີນ-ຫີນບູນ ໃນນາມຜູ້ໃຫ້ທຶນ ແລະ ທ່ານ ແກ້ວລັນດອນ ຈັນທະປານີ ເຈົ້າເມືອງໆຄູນຄຳ.

ໃນໂອກາດດັ່ງກ່າວ ທ່ານ ຄຳສີ ອຸດທິວົງ ຮອງເຈົ້າແຂວງໆຄຳມ່ວນ ຊຶ່ງຕາງໜ້າລັດຖະບານໄດ້ມອບໃບຍ້ອງຍໍຂັ້ນນາຍົກລັດຖະມົນ ຕີໃຫ້ແກ່ບໍລິສັດໄຟຟ້າເທີນ-ຫີນບູນທີ່ໄດ້ປະກອບສ່ວນດ້ານທຶນຮອນ, ເຮັດໃຫ້ສະຖານີວິທະຍຸທ້ອງຖິ່ນເມືອງຄູນຄຳໄດ້ຮັບການສ້າງຕັ້ງຂຶ້ນ ພ້ອມທັງໄດ້ຮຽກຮ້ອງໃຫ້ອຳນາດການປົກຄອງຂັ້ນເມືອງກໍຄືຂະແໜງການທີ່ກ່ຽວຂ້ອງຈົ່ງໄດ້ຄຸ້ມຄອງນຳໃຊ້ໃຫ້ເກີດປະ  ໂຫຍດສູງສຸດແກ່ສັງຄົມ ພ້ອມທັງມີການບົວລະບັດຮັກສາໃຫ້ນຳໃຊ້ໄດ້ຢ່າງຍາວນານ.

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.