ແກ້ງຄ້າຢາເສບຕິດເມັກຊິໂກສັງຫານພົນລະເຮືອນອາເມຣິກາ 9 ສົບ!!

0
4386

ແກ້ງຄ້າຢາເສບຕິດຊາວເມັກຊິໂກດັກຊຸ້ມໂຈມຕີລົດເກ໋ງເອສຢູວີ 3 ຄັນທີ່ແລ່ນຜ່ານຖະໜົນສາຍທາງຫຼວງ, ສົ່ງຜົນໃຫ້ມີເດັກ 6 ຄົນ ແລະ ແມ່ຍິງ 3 ຄົນເສຍຊີວິດ ໂດຍທັງໝົດເປັນຊາວອາເມຣິກາທີ່ອາໄສຢູ່ທາງເໜືອຂອງເມັກຊິໂກ, ຄາດວ່າກຸ່ມໂຈນອາດເຂົ້າໃຈຜິດວ່າເປັນແກ້ງຄ້າຢາຄູ່ກໍລະນີຂອງຕົນເອງ.

ສຳນັກຂ່າວເອພີລາຍງານເມື່ອວັນທີ 6 ພະຈິກຜ່ານມາທີ່ນະຄອນເມັກຊີໂກຊີຕີ້ວ່າ: ລັດຖະມົນຕີຄວາມໝັ້ນຄົງຂອງເມັກຊີໂກເປີດ ເຜີຍວ່າມືປືນຂອງແກ້ງຄ້າຢາເສບຕິດໃນເມັກຊີໂກໄດ້ດັກຊຸ່ມໂຈມຕີລົດເກ໋ງ 3 ຄັນຂະນະເດີນທາງຢູ່ເທິງຖະໜົນທີ່ມຸ່ງໜ້າໄປຍັງເມືອງປານໂຊ ວິລລາໃນລັດຊີວາຊີວາທາງເໜືອຂອງເມັກຊີໂກ, ທັງນີ້ ແມ່ນເປັນຄວາມເຂົ້າໃຈຜິດຂອງແກ້ງດັ່ງກ່າວວ່າລົດເກ໋ງ 3 ຄັນເປັນຄູ່ກໍລະນີຂອງຕົນ, ເຫດການດັ່ງກ່າວເຮັດໃຫ້ລົດເກ໋ງທັງ 3 ຄັນຖືກໂຈມຕີ ແລະ ມີຜູ້ເສຍຊີວິດເຖິງ 9 ລາຍ, ໃນນັ້ນ ແຍກເປັນເດັກ 6 ລາຍ, ເດັກອ່ອນຝາແຝດອາຍຸ 8 ເດືອນ, ເດັກອາຍຸ 2 ປີເຄິ່ງ, ອາຍຸ 10-12 ປີ ແລະ ອີກ 3 ລາຍເປັນແມ່ຍິງ.

ນອກຈາກນີ້ ຍັງມີຄົນໜຸ່ມສາວອີກ 5 ຄົນໄດ້ຮັບບາດເຈັບຈາກລູກປືນ, ທັງໝົດເປັນຊາວອາເມຣິກາທີ່ອາໄສຢູ່ໃນໝູ່ບ້ານລາໂມຣາ ລັດໂຊໂນຣາ ຫ່າງຈາກເມືອງດັກກລາສຂອງລັດແອຣິໂຊນາຂອງອາເມຣິກາໄປທາງໃຕ້ປະມານ 110 ກີໂລແມັດ. ຢ່າງໃດກໍຕາມ ຜູ້ເສຍຊີວິດທັງໝົດເປັນສະມາຊິກໃນຄອບຄົວເລີບານອນ, ຊຶ່ງອາໄສຢູ່ໃນເຂດຫາກິນທີ່ກໍ່ຕັ້ງໂດຍຜູ້ປົກຄອງສາສະໜາແຫ່ງໜຶ່ງ ແລະ ຄອບຄົວນີ້ກໍເຄີຍມີເລື່ອງຜິດຖຽງກັບແກ້ງຄ້າຢາເສບຕິດທີ່ແກ່ຍາວມາຫຼາຍປີ ແລະ ເມື່ອຫຼາຍປີຜ່ານມາສະມາຊິກຄົນໜຶ່ງໃນຄອບຄົວເລີບານອນຖືກຂ້າຫຼັງຈາກທີ່ໄປກ່າວຫາແກ້ງຄ້າຢາເສບຕິດ.

ສ່ວນປະທານາທິບໍດີ ໂດນັລ ທຣັມ ໄດ້ກ່າວຂໍຮ້ອງໃຫ້ທາງການເມັກຊີໂກຊ່ວຍເຮັດສົງຄາມກັບແກ້ງຄ້າຢາເສບຕິດ ແລະ ກຳຈັດກຸ່ມ ຄົນດັ່ງກ່າວໃຫ້ໝົດໄປຈາກໂລກ, ແຕ່ປະທານາທິບໍດີ ອັງເດຣສ ມານູເອລ ໂລເປຊ ໂອບຣາດໍຣ ຂອງເມັກຊີໂກໄດ້ກ່າວປະຕິເສດຂໍ້ແນະນຳດັ່ງກ່າວ, ໂດຍບອກວ່າ: ປະທານາທິບໍດີເມັກຊີໂກຄົນກ່ອນເຄີຍເຮັດສົງຄາມກັບແກ້ງຄ້າຢາເສບຕິດມາແລ້ວແຕ່ບໍ່ໄດ້ຜົນ ຫຼື ບໍ່ສາມາດທຳລາຍລ້າງເຂົາເຈົ້າໄດ້.

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.