ເອົາໃບຕາດິນໄປຈຳນຳຢາບ້າເກືອບ 2.000 ເມັດ

0
493

images (13)

ເຈົ້າ​ໜ້າທີ່​ຕຳຫຼວດ​ກອງ​ສະກັດ​ກັ້ນ ແລະ ປາບ​ປາມ​ຢາ​ເສບ​ຕິດ​ເມືອງ​ປາກ​ງື່ມ ນະຄອນຫຼວງ​ວຽງ​ຈັນ ໄດ້​ສົມທົບ​ກັບ ​ປກສ ກຸ່ມ​ບ້ານ ວາງ​ແຜນ​ກັກ​ຕົວ​ເປົ້າ​ໝາຍ​ທີ່​ເຄື່ອນ​ໄຫວ​ຄ້າຂາຍ​ຢາ​ເສບ​ຕິດ ຜ່ານ​ການ​ຕິດຕາມ​ມາ​ຮອດ​ວັນ​ທີ 29 ສິງຫາ 2013 ເວລາ 16 ໂມງ ຈິ່ງ​ສາມາດ​ກັກ​ຕົວ​ທ້າວ ບຸນ​ສີ ອາຍຸ 50 ປີ ປະຊາຊົນ​ຢູ່​ບ້ານ​ຫາດ​ວຽງ​ຄຳ ເມືອງ​ປາກ​ງື່ມ ພ້ອມ​ຂອງ​ກາງ​ຢາ​ເສບ​ຕິດ​ຢາ​ບ້າ​ຈຳນວນ 1.979 ເມັດ ແລະ ກັນຊາ​ແຫ້ງ​ຈຳນວນ 3 ແທ່ງ ສົ່ງ​ໃຫ້​ກອງ​ຄະດີ​ເມືອງ ເພື່ອ​ສອບ​ສວນ​ຂະຫຍາຍ​ຜົນ ແລະ ດຳເນີນ​ຄະດີ​ຕາມ​ລະບຽບ​ກົດໝາຍ.

ເຈົ້າ​ໜ້າທີ່​ສືບສວນ-ສອບ​ສວນ​ຄະດີ​ເມືອງ​ປາກ​ງື່ມ ໃຫ້​ຮູ້​ວ່າ: ທ້າວ ບຸນ​ສີ ໄດ້​ມີ​ການເຄື່ອນໄຫວ​ຊື້​ຂາຍ​ຢາ​ບ້າ ເຊິ່ງ​ຢາ​ບ້າ​ຈຳນວນ 1.979 ເມັດ ແມ່ນ​ເປັນ​ຂອງ​ຜູ້ກ່ຽວ​ແທ້ ໂດຍ​ສັ່ງ​ຊື້​ນຳ​ທ້າວ ຄຳ​ຜາຍ ອາຍຸ 55 ປີ ຢູ່​ບ້ານ​ດອນ​ໜູນ ເມືອງ​ໄຊ​ທານີ ໃນ​ວັນ​ທີ 28 ສິງຫາ 2013 ໃນ​ລາຄາ 70.000 ບາດ ແຕ່​ທ້າວ ບຸນ​ສີ ບໍ່​ມີ​ເງິນ​ຈ່າຍ ຈິ່ງ​ນຳ​ເອົາ​ໃບ​ຕາດິນ​ຂອງ​ຜູ້ກ່ຽວ ໄປ​ຈຳນຳ​ເອົາ​ຢາ​ບ້າ​ຈຳນວນ​ດັ່ງກ່າວ ໂດຍ​ຕົກລົງ​ກັນ​ວ່າ: ພາຍຫຼັງ​ທີ່​ໄດ້​ຂາຍ​ຢາ​ບ້າ​ໝົດ​ແລ້ວ ຈະ​ເອົາ​ເງິນ​ມາ​ໄຖ່​ເອົາ​ຄືນ ສ່ວນ​ກັນຊາ​ຈຳນວນ 3 ແທ່ງ ແມ່ນ​ຊື້​ມາ​ນຳ​ຂາ​ປະຈຳ​ຢູ່​ບ້ານ​ຫາດ​ວຽງ​ຄຳ ເມືອງ​ໄຊ​ທານີ ໃນ​ລາຄາ 2.400 ບາດ.

ອີງ​ຕາມ​ແຫຼ່ງ​ຂ່າວ​ໜັງສືພິມ​ຄວາມ​ສະຫງົບ ໃຫ້​ຮູ້​ວ່າ: ມາ​ຮອດ​ວັນ​ທີ 29 ສິງຫາ 2013 ທ້າວ ບຸນ​ສີ ຈິ່ງ​ໄດ້​ເອົາ​ຢາ​ບ້າ ແລະ ກັນຊາ​ແຫ້ງ​ຈຳນວນ​ດັ່ງກ່າວ ໃສ່​ຖົງ​ເປ້​ສີດຳ ແລ້ວ​ຂັບ​ຂີ່​ລົດຈັກ​ໂຄ​ລາວ​ບໍ່​ມີ​ປ້າຍ ເຊິ່ງ​ເປັນ​ລົດ​ຂອງ​ຜູ້ກ່ຽວ​ເອງ ເພື່ອ​ຈະ​ເອົາ​ໄປ​ສົ່ງ​ໃຫ້​ໄວ​ລຸ້ນ​ຢູ່​ບ້ານ​ໂນນ​ຊາຍ ເມືອງ​ປາກ​ງື່ມ ພໍ​ຂີ່​ລົດຈັກ​ໄປ​ຮອດ​ລະຫວ່າງ​ບ້ານ​ໂນນ​ສູງ​ຫາ​ບ້ານ​ໝາກ​ນາວ ຈິ່ງ​ພົບ​ເຫັນ​ເຈົ້າ​ໜ້າທີ່​ຕຳຫຼວດ ຈາກ​ນັ້ນ ທ້າວ​ບຸນ​ສີ ຈິ່ງ​ປະ​ຖິ້ມ​ຖົງ​ຢາ ແລະ ລົດຈັກ​ແລ່ນ​ໜີ​ເຂົ້າ​ປ່າ ເຈົ້າ​ໜ້າທີ່​ໄດ້​ນຳ​ກຳລັງ ​ປກສ ກຸ່ມ 2 ກຸ່ມ 3 ກຸ່ມ 4 ແລະ ກຸ່ມ 5 ປິດ​ລ້ອມ​ປ່າ ແລະ ຊອກ​ຫາ ຈິ່ງ​ສາມາດ​ຈັບ​ຕົວ​ໄດ້​ພ້ອມ​ຂອງ​ກາງ ແລ້ວ​ນຳ​ຕົວ​ສົ່ງ​ໃຫ້​ກອງ​ຄະດີ​ເມືອງ​ດຳເນີນ​ຄະດີ.

ຜ່ານ​ການ​ສອບ​ສວນ​ຂະຫຍາຍ​ຜົນ​ໃນ​ມື້ຕໍ່ມາ ເຈົ້າ​ໜ້າທີ່​ຈິ່ງ​ວາງ​ແຜນ​ຈັບ​ຕົວ​ເຄືອ​ຂ່າຍ​ທີ່​ທ້າວ ບຸນ​ສີ ໄດ້​ຊັດ​ທອດ​ຫາ​ຄື: ທ້າວ ຄຳ​ຜາຍ ຮອດ​ເວລາ 10:00 ໂມງ​ຂອງ​ວັນ​ດຽວ​ກັນ ກໍ​ສາມາດ​ຈັບ​ກຸມ​ທ້າວ ຄຳ​ຜາຍ ໄດ້​ແຕ່​ບໍ່​ພົບ​ເຫັນ​ຂອງ​ກາງ ຈາກ​ນັ້ນ ເຈົ້າ​ໜ້າທີ່​ຈິ່ງ​ສົມທົບ​ກັບ​ອຳນາດ​ການ​ປົກຄອງ​ບ້ານ​ດອນ​ໜູນ ເພື່ອ​ເຂົ້າ​ກວດ​ຄົ້ນ​ເຮືອນ​ຂອງ​ຜູ້ກ່ຽວ ຜ່ານ​ການ​ກວດ​ຄົ້ນ ຈິ່ງ​ພົບ​ເຫັນ​ຢາ​ບ້າ​ທີ່​ຊຸກເຊື່ອງ​ໄວ້​ໃນ​ຫ້ອງ​ນອນ​ຈຳນວນ 5 ຖົງ ກັບ 9 ເມັດ ລວມ​ມີ​ຢາ​ບ້າ​ທັງ​ໝົດ 1.009 ເມັດ ຜ່ານ​ການ​ສອບ​ສວນ​ຜູ້ກ່ຽວ​ຮັບ​ສາລະພາບ​ວ່າ: ຜູ້ກ່ຽວ​ເອົາ​ຢາ​ບ້າ​ຈຳນວນ​ດັ່ງກ່າວ ກຽມ​ໄປ​ສົ່ງ​ໃຫ້​ທ້າວ ບຸນ​ສີ ເພາະ​ທ້າວ ບຸນ​ສີ ໄດ້​ໂທ​ສັ່ງ​ກ່ອນ​ໜ້າ​ນີ້ ເຊິ່ງ​ທ້າວ ຄຳ​ຜາຍ ໄດ້​ໂທ​ສັ່ງ​ຢາ​ບ້າ​ຈຳນວນ​ດັ່ງກ່າວ​ນຳ​ຂາ​ປະຈຳ ຢູ່​ບ້ານ​ດົງ​ຊຽງ​ດີ ເມືອງ​ໄຊ​ທານີ ຈຳນວນ 15 ຖົງ ໃນ​ລາຄາ 8.300 ບາດ ເພື່ອ​ຈະ​ເອົາ​ໄປ​ສົ່ງ​ຂາຍ​ຕໍ່ໃຫ້​ລູກ​ຄ້າ​ຂາ​ປະຈຳ​ທົ່ວ​ໄປ.

ເຈົ້າ​ໜ້າທີ່​ຕຳຫຼວດ​ຍັງ​ໃຫ້​ຮູ້​ຕື່ມ​ວ່າ: ຜ່ານ​ມາ​ພວກ​ກ່ຽວ​ທັງ​ສອງ ເຄີຍ​ພົວພັນ​ກັບ​ຢາ​ເສບ​ຕິດ​ມາ​ຫຼາຍ​ຄັ້ງ​ແລ້ວ ແລະ ຖືກ​ເຈົ້າ​ໜ້າທີ່​ຕຳຫຼວດ​ກັກ​ຕົວ ສົ່ງ​ໃຫ້​ໄອ​ຍະ​ການ​ປະຊາຊົນ ສັ່ງ​ຟ້ອງ​ໃຫ້​ສານ​ຕັດສິນ​ມາ​ແລ້ວ​ຄົນ​ລະ 1 ຄັ້ງ​ຄື: ທ້າວ ບຸນ​ສີ ເຄີຍ​ຖືກ​ສານ​ປະຊາຊົນ​ຕັດສິນ​ຈຳ​ຄຸກ​ມາ​ແລ້ວ 5 ປີ ໃນ​ຂໍ້​ຫາ​ຄ້າຂາຍ​ຢາ​ເສບ​ຕິດ ແລະ ທ້າວ ຄຳ​ຜາຍ ກໍ​ຖືກ​ສານ​ຕັດສິນ​ຈຳ​ຄຸກ​ມາ​ແລ້ວ 7 ປີ ໃນ​ຂໍ້​ຫາ​ຄ້າຂາຍ​ຢາ​ເສບ​ຕິດ​ເຊັ່ນ​ດຽວ​ກັນ.