ເຫຍື່ອຄ້າມະນຸດຄົນລາວເປີດເຜີຍເສັ້ນທາງ “ຄຸມຂັງ” ຈາກເຮືອປະມົງໄທສູ່ເກາະອິນໂດເນເຊຍກວ່າ 17 ປີ

0
26464

ໄລຍະເວລາເກືອບ 20 ປີທີ່ເດັກຊາຍຈາກແຂວງສະຫວັນນະເຂດ ສປປ ລາວ ໄດ້ເດີນທາງຈາກບ້ານເກີດຂ້າມຊາຍແດນມາເຮັດວຽກຢູ່ທີ່ຣາຊະອານາຈັກໄທ, ໂດຍມີນາຍໜ້າຄົນລາວພາມາສົ່ງໃຫ້ນາຍໜ້າຄົນໄທ ແຫຼ້ (ຊາຍໜຸ່ມຈາກແຂວງສະຫວັນນະເຂດ) ເລົ່າໃຫ້ຮູ້ວ່າ: ຕອນນັ້ນເຂົາເດີນທາງຂ້າມປະເທດໂດຍບໍ່ມີເອກະສານທີ່ຖືກຕ້ອງຕາມກົດໝາຍ (ແຮງງານເຖື່ອນ).

ໂດຍມູນນິທິເຄືອຂ່າຍສົ່ງເສີມຄຸນນະພາບຊີວິດແຮງງານ (LPN) ໄດ້ພົບກັບ ທ້າວ ແຫຼ້ ສີອາໄພ ອາຍຸ 31 ປີ ຕອນເດີນທາງໄປສຳຫຼວດຫາລູກເຮືອປະມົງທີ່ຕິດຄ້າງຢູ່ເທິງເກາະຕວນຂອງອິນໂດເນເຊຍເມື່ອສາມປີກ່ອນ ແລະ ໄດ້ຊ່ວຍເຫຼືອຕິດຕໍ່ກັບທາງລັດຖະ ບານລາວໃຫ້ຮັບຕົວ ທ້າວ ແຫຼ້ ກັບປະເທດ. ຫຼ້າສຸດ ເມື່ອເດືອນຕຸລາທີ່ຜ່ານມາ ເຈົ້າໜ້າທີ່ຂອງມູນນິທິແອລພີເອັນ ແລະ ເຈົ້າ ໜ້າທີ່ຝ່າຍລັດຖະບານລາວໄດ້ເດີນທາງໄປທີ່ເກາະຕວນອີກຄັ້ງເພື່ອດຳເນີນເລື່ອງ ແລະ ມີຄວາມເປັນໄປໄດ້ວ່າ ທ້າວ ແຫຼ້ ຈະໄດ້ກັບບ້ານເກີດເມືອງນອນໃນໄວໆນີ້.

ທ່າວ ແຫຼ້ ໄດ້ເລົ່າປະສົບການຂອງຕົວເອງວ່າ: ລາວຖືກສົ່ງໄປເຮັດວຽກຮັບຈ້າງເກັບໝາກພ້າວທີ່ພູເກັດປະມານ 2 ປີໂດຍບໍ່ໄດ້ຮັບຄ່າຈ້າງເພາະຕ້ອງຖືກຫັກຄ່ານາຍໜ້າຈາກຄົນທີ່ພາມາ, ນັ້ນເປັນສາເຫດທີ່ເຮັດໃຫ້ ທ້າວ ແຫຼ້ ຕັດສິນໃຈຂຶ້ນລົດໂດຍສານໄປກຸງ ເທບເພື່ອຫາທາງກັບບ້ານເກີດທີ່ປະເທດລາວ ໂດຍບໍ່ມີເງິນຕິດຕົວ. ເມື່ອມາຮອດກຸງເທບກໍນອນຢູ່ຂ້າງຖະໜົນ, ຮູ້ເມື່ອຕອນ 2-3 ໂມງເຊົ້າກໍມີຄົນມາເອີ້ນໃຫ້ຂຶ້ນລົດແທັກຊີ ແລະ ຖາມວ່າຈະໄປເຮັດວຽກນຳບໍ່? ລາວບໍ່ມີເງິນກັບບ້ານຈຶ່ງຕັດສິນໃຈຂຶ້ນລົດແທັກຊີນັ້ນໄປ.

ທ້າວ ແຫຼ້ ໄດ້ບອກກັບບີບີຊີໄທຜ່ານການສຳພາດທາງໂທລະສັບວ່າ: ຕອນນັ້ນລາວຍັງເປັນເດັກນ້ອຍ “ໄປເຮັດວຽກຫຍັງກໍບໍ່ຮູ້, ເຂົາບໍ່ບອກ ສຸດທ້າຍເຂົາຈັບລາວຂັງໄວ້ໃນເຮືອນປະມານສາມເດືອນປາຍແລ້ວກໍໄປລົງເຮືອ, ມີຄົນຖືກຂັງເປັນຈຳນວນຫຼາຍ ແລະ ໃນນັ້ນກໍມີຄົນໄທລວມຢູ່ນຳ”.

ທ້າວ ແຫຼ້ ບອກອີກວ່າ: ເຖິງແມ່ນວ່າເຮືອນຫຼັງນັ້ນມີເຂົ້າໃຫ້ກິນ, ມີໂທລະພາບໃຫ້ເບິ່ງ ແຕ່ປະຕູກໍຖືກປິດລ໊ອກ, ໃສ່ກຸນແຈ ເຮັດໃຫ້ອອກໄປໃສບໍ່ໄດ້ ນັ້ນເຮັດໃຫ້ເຂົາປຽບຕົວເອງຄືຖືກ “ຂັງ” ໄວ້, ຕອນນັ້ນລາວກໍຄິດວ່າຂັງລາວໄວ້ເຮັດຫຍັງ? ລາວໄດ້ຖາມໝູ່ຄົນອື່ນໆ ແລະ ໝູ່ທີ່ຖືກຂັງນຳກັນກໍບອກວ່າ: “ພວກເຮົາຖືກຫຼອກ”.

ປະສົບການໃນທີ່ຄຸມຂັງຄັ້ງທຳອິດຂອງ ທ້າວ ແຫຼ້ ບໍ່ໂຫດຮ້າຍເທົ່າກັບສິ່ງທີ່ເຂົາຕ້ອງຜະເຊີນໜ້າຫຼັງຈາກນັນ!! ຊຶ່ງຫຼັງຈາກທີ່ລາວຖືກຂັງຢູ່ທີ່ເຮືອນຫຼັງນັ້ນສາມເດືອນລາວກໍຖືກສົ່ງຕົວໄປໃຫ້ລົງເຮືອຫາປາທີ່ອິນໂດເນຍເຊຍ, ຕາມເສັ້ນທາງຄ້າຂາຍເຄື່ອງເທດທີ່ມີຊື່ສຽງໃນອະດີດ. ທ້າວ ແຫຼ້ ໄດ້ບອກກັບສຳນັກຂ່າວ ບີບີຊີ ໄທວ່າ: ເຮືອປະມົງທີ່ໄປເຮັດວຽກເປັນເຮືອປະມົງໄທ, ມີເຈົ້າຂອງເປັນຄົນໄທ ແລະ ເດີນເຮືອອອກຈາກປະເທດໄທ.

ທ່ານ ນາງ ປະຕິມາ ຕັ້ງປຣັດຢາກຸນ ຜູ້ຈັດການມູນນິທິແອລພີເອັນກ່າວກັບບີບີຊີໄທວ່າ: ລູກເຮືອປະມົງຄົນອື່ນໆທີ່ໄດ້ພົບເລົ່າວ່າ ໃນຂະນະທີ່ຢູ່ເທິງເຮືອຕ້ອງໄດ້ເຮັດວຽກຢ່າງໜັກ,  ມີຫຼາຍກໍລະນີທີ່ເຮືອປະມົງໄປຈັບປາແລ້ວກໍສົ່ງຕໍ່ແຮງງານໃຫ້ກັບເຮືອລຳອື່ນອີກ ບາງເທື່ອກໍຖືກຖິ້ມໄວ້ບໍ່ໃຫ້ເດີນທາງກັບໄທ, ເຮັດໃຫ້ເຂົາເຈົ້າຕ້ອງຜະເຊີນຊະຕາກຳໃນບ້ານເມືອງທີ່ບໍ່ມີໃຜຮູ້ຈັກ ແລະ ບໍ່ສາມາດສື່ສານກັນໄດ້ເນື່ອງຈາກບໍ່ຮູ້ພາສາ.

ສຳລັບກໍລະນີຂອງ ທ້າວ ແຫຼ້, ລາວໃຫ້ລາຍລະອຽດວ່າ: ລາວຖືກສົ່ງໄປເຮັດວຽກຢູ່ໃນເຮືອຕັ້ງແຕ່ອາຍຸ 14 ປີ, ປັດຈຸບັນ ທ້າວ ແຫຼ້ ອາຍຸ 31 ປີຊຶ່ງກໍໝາຍຄວາມວ່າລາວຕິດຢູ່ທີ່ເກາະຕວນເປັນເວລາກວ່າ 17 ປີ. ທ້າວ ແຫຼ້ ເຄີຍມີປະສົບການໜີອອກຈາກເຮືອໄປພ້ອມກັບໝູ່ຄົນໄທສອງຄົນ, ເຂົາເຈົ້າໜີໄປນອນໃນປ່າ, ບໍ່ມີຂອງກິນປະມານສອງມື້ບໍ່ໄດ້ກິນເຂົ້າ ແລະ ດື່ມນໍ້າ ຫຼັງຈາກນັ້ນເຂົາເຈົ້າໄດ້ໄປຂໍຄວາມຊ່ວຍເຫຼືອຈາກຊາວບ້ານ ແລະ ຮັບຈ້າງເຮັດວຽກທຸກຢ່າງນັບຕັ້ງແຕ່ຕັດຫຍ້າໄປຈົນເຖິງຂຸດບໍ່ນໍ້າ.

ຕະຫຼອດໄລຍະເວລາກວ່າ 17 ປີ ທີ່ຢູ່ເທິງເກາະຕວນລາວຮູ້ສຶກຄືກັບຖືກຂັງທັງຮ່າງກາຍ ແລະ ຈິດໃຈ, ເວົ້າພາສາເຂົາກໍບໍ່ໄດ້, ຈະກັບບ້ານກໍກັບບໍ່ໄດ້, ຫັນໜ້າໄປທາງໃດກໍມີແຕ່ທະເລ, ຈະໄປສະຖານທູດລາວກໍໄປບໍ່ເປັນ. ທັງນີ້ ທ້າວ ແຫຼ້ ເຄີຍຄິດວ່າສຸດທ້າຍລາວຄົງຕ້ອງຈົບຊີວິດລົງທີ່ເກາະແຫ່ງນີ້ ແລະ ຄົງຈະບໍ່ມີໂອກາດກັບເມືອບ້ານເກີດເມືອງນອນອີກແລ້ວ, ຈົນມູນນິທິແອລພີເອັນ ສາມາດຕິດຕໍ່ກັບຄອບຄົວຂອງລາວໄດ້ໃນປີນີ້, ລາວຈຶ່ງໄດ້ຮັບຂ່າວຄາວຂອງຄອບຄົວເປັນຄັ້ງທຳອິກ “ພໍ່ ແລະ ອ້າຍກໍຕາຍປະແລ້ວ, ຖ້າໄດ້ກັບເມືອບ້ານຈະໃຊ້ຊີວິດຢູ່ກັບແມ່, ເຮັດໄຮ່ເຮັດນາ ແລະ ບໍ່ໄປໃສອີກ, ຄິດຮອດ ແລະ ເປັນຫ່ວງແມ່ຫຼາຍ”.

ຮຽບຮຽງຂ່າວ:​ພຸດສະດີ ລາວລີ
ແຫຼ່ງຂໍ້ມູນ: www.bbc.com

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.