ເສືອ ແລະ ເສືອດາວໃນປ່າສະຫງວນແຫ່ງຊາດນໍ້າແອັດ-ພູເລີຍສູນພັນແລ້ວ

0
357

ເວັບໄຊຂ່າວຕ່າງປະເທດ greatermekong.panda.org ໄດ້ເປີດລາຍງານທີ່ໜ້າເສົ້າເມື່ອວັນທີ 29 ຕຸລາຜ່ານມາວ່າ: ອົງ ການກອງທຶນອະນຸຮັກທຳມະຊາດໂລກປະຈຳລາວ ຫຼື WWF ໄດ້ເປີດເຜີຍຜົນການສຶກສາການສູນພັນຂອງເສືອ ແລະ ເສືອດາວໃນປະເທດລາວ.

ການສຶກສາໃໝ່ທີ່ມີຊື່ວ່າ: ການບັນທຶກການຕາຍຂອງເສືອ ແລະ ເສືອດາວ ແລະ ສະຖານະພາບຂອງສັດກິນຊີ້ນ ແລະ ສັດປ່າອື່ນໆ ໃນເຂດປ່າສະຫງວນທີ່ມີຄຸ່ນຄ່າທີ່ສຸດຂອງ ສປປ ລາວ, ປ່າສະຫງວນແຫ່ງຊາດນໍ້າແອດ-ພູເລີຍ ໄດ້ກ່າວວ່າ: ເສືອໂຕສຸດທ້າຍໃນປະ ເທດລາວອາດຈະຕາຍໄປແລ້ວເມື່ອປີ  2013 ຫຼື 2014.

ການສູນເສຍເສືອ ແລະ ເສືອດາວໃນເຂດປ່າສະຫງວນແຫ່ງຊາດນໍ້າແອັດ-ພູເລີຍ (NEPL) ແມ່ນຜົນຫຼັບທີ່ໜ້າຕົກໃຈ ແລະ ປວດໃຈ, ຊຶ່ງມັນເປັນວິກິດການທີ່ເກີດຂຶ້ນໃນອາຊີຕະເວັນອອກສຽງໃຕ້ ໂດຍບໍ່ມີຫຼັກຖານກ່ຽວກັບເສືອໃນປ່າສະຫງວນແຫ່ງຊາດນໍ້າແອັດ-ພູເລີຍ (NEPL) ນັບຕັ້ງແຕ່ປີ 2013 ແລະ ເສືອດາວໃນປີ 2014, ຂ່າວນີ້ເປັນຄຳເຕືອນທີ່ໜ້າເສົ້າຖ້າຫາກເຮົາບໍ່ມີຄວາມພະຍາຍາມຢ່າງພຽງພໍໃນການຈັດການກັບການລ່າສັດ, ການສູນເສຍທີ່ຢູ່ອາໄສ ແລະ ການຂົ່ມຂູ່ອື່ນໆ, ພວກເຮົາກໍ່ຈະສືບຕໍ່ພົບກັບການສູນເສຍປະຊາກອນສັດສະຫງວນທີ່ໃກ້ຈະສູນພັນ.

ການສຳຫຼວດພາກສະໜາມທີ່ດຳເນີນໃນເຂດປ່າສະຫງວນທົ່ວປະເທດລາວໃນຊຸ່ມປີທີ່ຜ່ານມາໂດຍອົງການຄົ້ນຄວ້າ ແລະ ອະນຸລັກລວມທັງ WWF ບໍ່ພົບຫຼັກຖານທີ່ໜ້າເຊື່ອຖືໃດໆກ່ຽວກັບການມີຢູ່ຂອງພວກເຂົາ ບົດຂຽນນີ້ສະແດງໃຫ້ເຫັນເຖິງການອະນຸຮັກແມວໃຫຍ່ (ເສືອ) ໃນເຂດອິນດູຈີນຂອງລຸ່ມແມ່ນໍ້າຂອງ, ເນື່ອງຈາກວ່າ NEPL ຄິດວ່າຈະມີປະຊາກອນເສືອທີ່ຍັງເຫຼືອຢູ່ໃນປະ ເທດກຳປູເຈຍ, ລາວ ແລະ ຫວຽດນາມໃນປີ 2010.

ຫາກພວກເຮົາມີຄວາມຫວັງວ່າຢາກໃຫ້ມີສັດກິນຊີ້ນຈຳນວນຫຼາຍໃນພູມິພາກກໍ່ສາມາດເຮັດໄດ້ໂດຍຜ່ານການສະແດງເຈດຈຳນົງທີ່ຊັດເຈນ, ບໍ່ວ່າຈະເປັນການສະໜັບສະໜູນຂອງປະຊາຊົນຮ່ວມກັບໜ່ວຍງານພາກລັດ, ການສະໜັບສະໜູນເພີ່ມເງິນທຶນ ແລະ ການຮັກສາວິກິດການສຸກເສີນ, ໃຫ້ມີການຈັດຕັ້ງພະນັກງານລາດຕະເວນມືອາຊີບ,​ ມີການຄຸ້ມຄອງພື້ນທີ່ປ່າເພື່ອປ້ອງກັນຢ່າງມີປະສິດທິພາບ ລວມເຖິງການຕໍ່ຕ້ານການລັກລອບຂາຍສັດປ່າ ແລະ ຕ້ອງໃຫ້ຄວາມສຳຄັນໃນການລົງໂທດຜູ້ລ້າສັດປ່າ, ຜູ້ຊື້-ຂາຍສັດປ່າທີ່ລະບຸໃນກົດໝາຍຢ່າງຈິງຈັງ ເພື່ອປົກປ້ອງສັດປ່າສາຍພັນອື່ນໆທີ່ຍັງເຫຼືອຢູ່ໃນປະເທດລາວ.

ຮຽບຮຽງຂ່າວ: ພຸດສະດີ ລາວລີ
ແຫຼ່ງຂໍ້ມູນ: greatermekong.panda.org

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.