ເລັ່ງຊຸກຍູ້ສົ່ງເສີມການຜະລິດພືດຜັກໃຫ້ເປັນສິນຄ້າ ແລະ ສາມາດເຂົ້າເຖິງຕະຫຼາດທີ່ແນ່ນອນ

0
204

ລັດຖະບານກໍຄືກະຊວງກະສິກໍາ ແລະ ປ່າໄມ້ ກຳລັງເລັ່ງສ້າງກົນໄກ ແລະ ເງື່ອນໄຂຕ່າງໆເພື່ອເຮັດໃຫ້ຜູ້ຜະລິດພືດຜັກ ແລະ ພໍ່ຄ້າ-ແມ່ຄ້າຄົນກາງຢູ່ເມືອງຫາດຊາຍຟອງ ນະຄອນຫຼວງວຽງຈັນໄດ້ຈັບຄູ່ກັນ, ເພື່ອໃຫ້ສາມາດແກ້ໄຂບັນຫາການຜະລິດ-ຈຳໜ່າຍກໍຄືການຊຸກຍູ້ສົ່ງເສີມການຜະລິດພືດຜັກໃຫ້ເປັນສິນຄ້າ, ທັງເຂົ້າເຖິງຕະຫຼາດທີ່ແນ່ນອນ, ເຂົ້າເຖິງສິນຄ້າທີ່ໄດ້ຄຸນນະພາບ ແລະ ມາດ ຕະຖານຂອງຕະຫຼາດ ລວມທັງຫຼຸດຜ່ອນບັນຫາການຂາດແຄນສິນຄ້ານຳອີກ.

ໂດຍທ່ານ ພວງປາຣີສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ລົງພົບປະສົນທະນາ ແລະ ປຶກສາຫາລື ລະ ຫວ່າງຜູ້ຜະລິດພືດຜັກ ແລະ ພໍ່ຄ້າ-ແມ່ຄ້າຄົນກາງໃນວັນທີ 4 ພະຈິກຜ່ານມາ. ໃນການມາພົບປະສົນທະນາຄັ້ງນີ້ ແມ່ນກ່ຽວ ກັບບັນຫາຕ່າງໆທີ່ກຳລັງຜະເຊີນໃນການປູກພືດ, ການເຂົ້າເຖິງຕະຫຼາດ, ການກຳນົດມາດຕະຖານ, ເງື່ອນໄຂສິນຄ້າ, ການກຳນົດລາຄາ ແລະ ສິ່ງທ້າທາຍອື່ນໆຂອງຊາວກະສິກອນ ແລະ ພໍ່ຄ້າ-ແມ່ຄ້າຄົນກາງ.

ສຳລັບຈຸດປະສົງຂອງການເຕົ້າໂຮມຄັ້ງນີ້ ແມ່ນຢາກໃຫ້ຜູ້ຜະລິດ ແລະ ຜູ້ຊື້ໄດ້ຈັບຄູ່ກັນ ແລະ ເຂົ້າເຖິງກັນ ແລະ ກັນ ເພາະໃນໄລຍະຜ່ານມາແມ່ນຕ່າງຝ່າຍຕ່າງຢູ່, ເຮັດໃຫ້ການເຂົ້າເຖິງຕະຫຼາດ ແລະ ສິນຄ້າມີຄວາມຫຍຸ້ງຍາກ, ພາຍຫຼັງມີການຈັບຄູ່ກັນແລ້ວກໍຈະເຮັດໃຫ້ຊາວກະສິກອນມີຕະຫຼາດຮອງຮັບທີ່ແນ່ນອນ ແລະ ພຽງພໍ, ບໍ່ຖືກເອົາປຽບດ້ານລາຄາ ແລະ ເຂົ້າໃຈກ່ຽວກັບມາດຕະຖານຂອງສິນຄ້າ. ສິ່ງສຳຄັນແມ່ນເປັນການສົ່ງເສີມການປູກພືດໃຫ້ເປັນສິນຄ້າທີ່ສະອາດ, ມີຄວາມແຂງແຮງ, ຍືນຍົງ ແລະ ເປັນຂະ ບວນຟົດຟື້ນ, ແນໃສ່ຫຼຸດຜ່ອນການນຳເຂົ້າຈາກປະເທດເພື່ອນບ້ານ. ເນື່ອງຈາກ ສປປ ລາວເຮົາກໍມີທ່າແຮງ ແລະ ເງື່ອນໄຂຫຼາຍ ຢ່າງ ລວມທັງຄວາມອຸດົມສົມບູນຂອງດິນໃນການປູກພືດຜັກ.

ທ່ານ ພວງປາຣີສັກ ປຣະວົງວຽງຄຳ ກ່າວຕື່ມວ່າ: ໃນເບື້ອງຕົ້ນແມ່ນຈະແກ້ໄຂບັນຫາການຈັບຄູ່ລະຫວ່າງຜູ້ຜະລິດ ແລະ ຜູ້ຊື້ຈັບຄູ່ກັນກ່ອນຈຶ່ງກ້າວໄປສູ່ບັນຫາອື່ນໆທີ່ຈະຕາມມາ. ຖ້າຫາກຈັບຄູ່ກັນແລ້ວກໍຈະມີການຜະລິດ, ມີລາຄາ ແລະ ຕະຫຼາດທີ່ແນ່ນອນ, ຖ້າຊາວກະສິກອນຕ້ອງການຂະຫຍາຍພື້ນທີ່ການຜະລິດແຕ່ຂາດທຶນຮອນ, ພາກລັດພ້ອມຈະໃຫ້ຄວາມຮ່ວມມືໃນການແກ້ບັນຫາການເຂົ້າເຖິງແຫຼ່ງທຶນໄປເປັນລຳດັບ ຫຼື ບັນຫາອື່ນໆທີ່ທັງສອງຝ່າຍຕ້ອງການ.

ຂະນະທີ່ ທ່ານ ສີສຸພັນ ທອງບຸນມາ ຮອງນາຍບ້ານຫາດກັນຊາ, ຫົວໜ້າກຸ່ມປູກຜັກສະອາດບ້ານຫາດກັນຊາກ່່່າວວ່າ: ຜ່ານມາຊາວກະສິກອນແມ່ນມີຄວາມເສຍປຽບຫຼາຍດ້ານ, ເປັນຕົ້ນແມ່ນເລື່ອງຕາຊິງຄື: 16-18 ກີໂລກຣາມແມ່ນຄິດໄລ່ເປັນ 1 ໝື່ນ (ປົກກະຕິ 1 ໝື່ນແມ່ນ 12 ກີໂລກຣາມ), ລາຄາແມ່ນຂຶ້ນກັບພໍ່ຄ້າ-ແມ່ຄ້າຄົນກາງ, ສ່ວນບັນຫາການນຳເຂົ້າທີ່ບໍ່ຖືກຕ້ອງໄດ້ເຮັດໃຫ້ລາຄາສິນຄ້າພາຍໃນຕົກຕ່ຳ ແລະ ບັນຫາອື່ນໆ.

ດັ່ງນັ້ນ ການພົບປະຄັ້ງນີ້ແມ່ນເປັນວິທີການໜຶ່ງທີ່ຈະເຮັດໃຫ້ຊາວກະສິກອນທັງຫຼາຍມີຄວາມຊື່ນໃຈ ແລະ ມີຄວາມຫວັງທີ່ຈະສາ ມາດເຂົ້າເຖິງຕະຫຼາດຜັກທີ່ແນ່ນອນ ແລະ ບໍ່ຖືກເອົາປຽບດ້ານລາຄາ, ທັງຈະສາມາດຜະລິດພືດຜັກໄດ້ຕາມມາດຕະຖານ ແລະ ຄຸນນະພາບອີກດ້ວຍ.

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.