ເມືອງໝື່ນຝຶກອົບຮົມວຽກງານບຳບັດ ແລະ ປິ່ນປົວຜູ້ຕິດຝິ່ນດ້ວຍຄວາມສະໝັກໃຈ

0
30

ກອງປະຊຸມຝຶກອົບຮົມວຽກງາານບຳບັດ ແລະ ປິ່ນປົວຜູ້ຕິດຝິ່ນດ້ວຍຄວາມສະໝັກໃຈໃຫ້ອາສາສະໝັກບ້ານ (ອສບ) 6 ບ້ານເປົ້າ ໝາຍ ຈັດຂຶ້ນໃນຕອນເຊົ້າຂອງວັນທີ 20 ສິງຫາ 2019 ຢູ່ທີ່ຫ້ອງປະຊຸມຫ້ອງການສາທາລະນະສຸກເມືອງໝື່ນ ພາຍໃຕ້ການເປັນປະທານຂອງ ທ່ານ ດຣ ຊົ່ວທ່າວ ເຍ້ຍຕູ້ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງໝື່ນ ໂດຍການໃຫ້ກຽດເຂົ້າຮ່ວມຂອງ ທ່ານ ພັທ ແອັງ ວົງພະໄທ ຫົວໜ້າພະແນກກວດກາ ແລະ ຄວບຄຸມຢາເສບຕິດ ປກສ ເເຂວງວຽງຈັນ ທ່ານ ດຣ ຄຳພຽນ ວັນມະນີ ຮອງຫົວໜ້າພະເເນກສາທາລະນະສຸກແຂວງວຽງຈັນ ມີບັນຄູຝືກຈາກແຂວງ ອົງການປົກຄອງ 6 ບ້ານ ແລະ ອສບ ບ້ານເຂົ້າຮ່ວມ.

ກອງປະຊຸມໄດ້ຜ່ານບົດເເນະນຳກ່ຽວກັບການປິ່ນປົວຜູ້ຕິດຢາເສບຕິດ (ຝິ່ນ) ດ້ວຍຢາທີໂອເມັດ ຜ່ານເອກະສານຂໍ້ແນະນຳກ່ຽວ ກັບຫຼັກການປິ່ນປິ່ວຜູ້ຕິດຝິ່ນຕາມຕາຕະລາງການປິ່ນປົວ ແລະ ຫຼັກການໃຫ້ຢາທີໂອເມັດແກ່ຜູ້ປ່ວຍ ຜ່ານບັນດາຂໍ້ຫ້າມ ແລະ ຕຳເຕື່ອນພາຍຫຼັງຜູ້ຕິດຝິ່ນ ເຂົ້າຮັບການປິ່ນປົວດ້ວຍຢາທີໂອເມັດ ພ້ອມກັນນັ້ນ ກອງປະຊຸມຍັງໄດ້ມີການສົນທະນາແລກປ່ຽນຫຼາຍບັນຫາທີ່ສຳຄັນ ພ້ອມທັງປະກອບຄຳຄິດຄຳເຫັນທີ່ກົງໄປກົງມາຕໍ່ກອງປະຊຸມດ້ວຍຄວາມເປັນເຈົ້າການ.

ປັດຈຸບັນເມືອງໝື່ນມີຜູ້ຕິດຝິ່ນສະເໜີລາຍຊື່ເຂົ້າຮັບການປິ່ນປົ່ວແລ້ວ 29 ຄົນ ໃນນີ້ ນອນຢູ່ໃນ 6 ບ້ານຄື ບ້ານໂນນຕ້ອງ ບ້ານນາປ່າໄຜ່ ບ້ານໂນນໄຮ ບ້ານໂພນງາມ ບ້ານນ້ຳຮອນ ແລະ ບ້ານນ້ຳແພດ ພາຍຫຼັງຝຶກອົບຮົມໃນຄັ້ງນີ້ສຳເລັດທາງຫ້ອງການສາທາ ລະນະສຸກເມືອງ ອົງການປົກຄອງບ້ານ ແລະ ອສບ ບ້ານ ຈະໄດ້ນຳເອົາຈຳນວນດັ່ງກ່າວນີ້ເຂົ້າຮັບການປິ່ນປົວດ້ວຍຄວາມສະໝັກໃຈເປັນຊຸດທຳອິດຂອງເມືອງໝື່ນ ແລະ ຈະສືບຕໍ່ຂະຫຍາຍໄປຍັງບ້ານອື່ນໆພາຍໃນເມືອງ ເພື່ອນຳເອົາບັນດາຜູ້ປ່ວຍຕິດຝິ່ນເຂົ້າຮັບການປິ່ນປົວຕື່ມອີກ.

ຂະນະທີ່ ທ່ານ ດຣ ຊົ່ວທ່າວ ເຍ້ຍຕູ້ ກໍໄດ້ໂອ້ລົມຕໍ່ກອງປະຊຸມ ພ້ອມທັງຮຽກຮ້ອງມາຍັງອົງການປົກຄອງບ້ານ ແລະ ອສບ ບ້ານຈົ່ງພ້ອມກັນເປັນເຈົ້າການນຳເອົາວຽກງານດັ່ງກ່າວນີ້ລົງໄປຈັດຕັ້ງປະຕິບັດ ແລະ ປຸກລະດົມປະຊາຊົນພາຍໃນບ້ານຜູ້ທີ່ຕິດຝິ່ນໃຫ້ພ້ອມໃຈກັນເຂົ້າຮັບການປິ່ນປົວດ້ວຍຄວາມສະໝັກໃຈ ແລະ ບໍ່ໄດ້ເສຍຄ່າປິ່ນປົວ ທັງປຸກລະດົມຄອບຄົວຍາດພີ້ນ້ອງຂອງຜູ້ປ່ວຍຕິດຝິ່ນໃຫ້ເປັນເຈົ້ານຳເອົາສະມາຊິກໃນຄອບຄົວຂອງຕົນເຂົ້າຮັບການປິ່ນປົວໂດຍໄວ ເພື່ອເຮັດໃຫ້ຄອບຄົວສາມາດຫຼຸດຜົ້ນຈາກຄວາມທຸກຍາກ ແລະ ເພື່ອໃຫ້ຜູ້ປ່ວຍສາມາດໃຊ້ຊີວິດຄືກັບຄົນປົກກະຕິທົ່ວໄປ ຫຼັງຈາກນັ້ນ ຕອນບ່າຍຂອງວັນດຽວກັນທາງຄະນະຮັບຜິດຊອບຍັງໄດ້ລົງເຄື່ອນໄຫວພົບປະຜູ້ປ່ວຍຢູ່ຕາມບ້ານເປົ້າໝາຍຕື່ມອີກ.

 

 

 

ໂດຍ: ແຫວນຄຳ (ນັກຂ່າວຈາກແຂວງວຽງຈັນ)

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.