ຄິດໃຫ້ດີກ່ອນລົງມື… ເພາະເມຍໃຫຍ່ອາດໄດ້ຮັບໂທດໜັກກວ່າເມຍນ້ອຍ ແລະ ອາດເຖິງຂັ້ນເສຍຜົວ

0
2962

ຈາກກໍລະນີທີ່ມີການເຜີຍແຜ່ຄລິບວິດິໂອເມຍໃຫຍ່ຕົບເມຍນ້ອຍ ພ້ອມແກ້ເຄື່ອງເມຍນ້ອຍລແ້ວຖ່າຍຄລິບປະຈານທີ່ເປັນຂ່າວໂດ່ງດັງສະນັ່ນໂຊຊຽວເມື່ອອາທິດທີ່ຜ່ານ, ໃນສັງຄົມບ້ານເຮົາເມື່ອກ່ອນບໍ່ເຄີຍພົບເຫັນພຶດຕິກຳທີ່ເມຍໃຫຍ່ຕົບຕີ ແລະ ທຳຮ້າຍເມຍນ້ອຍແລ້ວຖ່າຍຄລິບປະຈານເຜີຍແຜ່ໃນພື້ນທີ່ສາທາລະນະ, ແຕ່ອາດເປັນຍ້ອນຄວາມທັນສະໄໝຂອງເຕັກໂນໂລຊີທີ່ມີສັງຄົມອອນລາຍເກີດຂຶ້ນ ຊຶ່ງມັນກໍມີທັງຜົນດີແລະຜົນເສຍເພາະຈະເຮັດໃຫ້ຄົນເກີດມີແນວຄິດຜ່ານການໄດ້ເຫັນ, ໄດ້ຍິນຈົນກາຍເປັນພຶດຕິກຳຮຽນແບບ, ບາງກຸ່ມຄົນແມ່ນຈະຮຽນແບບມາຈາກລະຄອນສູ່ຊີວິດຈິງ ຫຼື ໃນຄລິບວິດີໂອເຊັ່ນ: ການທຳຮ້າຍຮ່າງກາຍ, ການຍາດຜົວຍາດເມຍ ແລະ ການປະຈານ ຊຶ່ງພຶດຕິກຳເຫຼົ່າມັນເປັນສິ່ງທີ່ບໍ່ເໝາະສົມທີ່ຈະນຳມາເຜີຍແຜ່ ເພາະທ່ານຮູ້ບໍ່ວ່າ ຜົນກະທົບຈາກກໍລະນີເມຍໃຫຍ່ຕົບເມຍນ້ອຍ ພ້ອມແກ້ເຄື່ອງເມຍນ້ອຍຖ່າຍຄລິບປະຈານນີ້ມີຜົນກະທົບ ຫຼື ຄວາມຜິດແນວໃດແນ່?.

ຜົນກະທົບດ້ານລົບຕໍ່ຜູ້ເປັນເມຍໃຫຍ່ມີຄື: ໄດ້ປະຈານຄອບຄົວຕົວເອງລວມເຖິງການປະຈານຕົວເອງ, ສ້າງຫຼັກຖານ ແລະ ພະ ຍານໃຫ້ເມຍນ້ອຍສາມາດເອົາຜິດກັບຕົວເອງໄດ້, ສ້າງແບບຢ່າງໃຫ້ກັບລູກ-ຫຼານຂອງຕົນເອງຮຽນແບບພຶດຕິກຳໃນອtນາຄົດ. ສິ່ງທີ່ເມຍໃຫຍ່ໄດ້ຄື: ຄວາມສະໃຈໃນເບື້ອງຕົ້ນ ແຕ່ເດືອດຮ້ອນພາຍຫຼັງເພາະມີຫຼັກຖານທຳຮ້າຍຮ່າງກາຍ ແລະ ປະຈານຜູ້ອື່ນດ້ວຍເຈຕະນາ ແລະ ເຮັດໃຫ້ຄອບຄົວອັບອາຍ ໂດຍສະເພາະລູກ-ຫຼານ, ຍາດພີ່ນ້ອງ ລວມເຖິງຕົນເອງອາດຖືກຄົນອື່ນເບິ່ງໃນທາງບໍ່ດີ.

ຜົນກະທົບດ້ານລົບຕໍ່ຜູ້ເປັນເມຍນ້ອຍ: ປະຈານເມຍນ້ອຍໃຫ້ອັບອາຍ, ເຊື່ອມເສຍກຽດສື່ສຽງ ຈົນກະທົບຕໍ່ວົງຕະກູນເປັນທີ່ກ່າວຂວັນໃນສັງຄົມ, ສ້າງຫຼັກຖານໃນການເອົາຜິດຕໍ່ຜູ້ເປັນຜົວ ແລະ ຜູ້ເປັນເມຍນ້ອຍໃນເລື່ອງຊູ້ສາວ. ສິ່ງທີ່ເມຍນ້ອຍໄດ້ຄື: ຮູ້ສຶກອັບສາຍຕໍ່ສັງຄົມ, ມີຫຼັກຖານເອົາຜິດເມຍໃຫຍ່ໃນຖານທຳຮ້າຍຮ່າງກາຍ ແລະ ເຮັດອານາຈານ ແຕ່ກໍໜີບໍ່ພົ້ນໃນຖານຄົບຊູ້ຜົວເຂົາ.

ສ່ວນຜົນກະທົບຕໍ່ຜູ້ເປັນຜົວ: ຄອບຄົວມີບັນຫາ, ​ຖືກດຳນີນຄະດີໃນສະຖານທຳມິດສະຈານ, ລູກ-ຫຼານຂາດຄວາມນັບຖື, ເປັນທີ່ກ່າວຂັວນໃນວົງສັງຄົມ.

ຈາກເຫດການດັ່ງກ່າວທີມຂ່າວຂອງລາວໂພສໄດ້ສອບຖາມໄປທີ່ເພສກົດໝາຍລາວ “Law of Laos” ຊຶ່ງເປັນຜູ້ຮູ້ທາງດ້ານການໝາຍໃນກໍລະນີນີ້ຖືວ່າຜິດທັງສອງຝ່າຍ, ແຕ່ຕ້ອງແຍກກັນຄົນລະປະເດັນ, ແຍກຄົນລະການກະທຳຜິດ ຊຶ່ງເມຍນ້ອຍມີສິດເອົາຜິດກັບເມຍໃຫຍ່ໄດ້ ແລະ ເມຍໃຫຍ່ເອງກໍມີສິດເອົາຜິດກັບເມຍນ້ອຍ ແລະ ຜົວໄດ້ຄືກັນ. ສ່ວນເມຍນ້ອຍ ຫຼື ຍິງຊູ້ ມີຄວາມຜິດ ໃນສະຖານທໍາມິດສະຈານ ມາດຕາ 247 ມີໂທດຈໍາຄຸກແຕ່ 3 ເດືອນຫາ 1 ປີ ແລະ ປັບໄໝ 1-10 ລ້ານກີບ, ສ່ວນຝ່າຍຊາຍ ຫຼື ຜູ້ເປັນຜົວກໍໄດ້ຮັບຄວາມຜິດຄືກັນກັບເມຍນ້ອຍ.

ເມຍໃຫຍ່ມີຄວາມຜິດ 2 ກະທົງຄື: 1. ການທໍາຮ້າຍຮ່າງກາຍ ມາດຕາ 194 ມີໂທດຈໍາຄຸກ 6 ເດືອນຫາ 3 ປີ, ປັບໄໝ 3-10 ລ້ານກີບ, 2. ມີຄວາມຜິດໂທດຖານການທໍາອານາຈານ ມາດຕາ 259 ມີໂທດຈໍາຄຸກ 3 ເດືອນຫາ 2 ປີ ແລະ ປັບໄໝ 3-10 ລ້ານກີບ ແລະ ບຸກຄົນທີ່ໄປນໍາເມຍໃຫຍ່ (ສົມຮູ້ຮ່ວມຄິດ) ກໍມີຄວາມຜິດຄືກັນກັບເມຍໃຫຍ່.

ສິ່ງທີ່ກ່າວມາຂ້າງເທິງ, ຜູ້ຂຽນຢາກເຕືອນສະຕິທັງຜູ້ທີ່ເຜີຍແຜ່ຄລິບ ແລະ ຜູ້ຊົມ, ຜູ້ແຊຣ ລວມໄປເຖິງຜູ້ທີ່ມີຄວາມຄິດຈະຮຽນແບບພຶດຕິກຳ, ທັງນີ້ ທີມງານເຮົາບໍ່ມີເຈຕະນາກ່າວຫາວ່າຝ່າຍໃດຜິດ-ຝ່າຍໃດຖືກ? ແຕ່ການນຳເລື່ອງພາຍໃນຄອບຄົວໄປເຜີຍ ແຜ່ຕໍ່ສາທາລະນະບາງເລື່ອງມັນກໍບໍ່ເກີດຜົນດີຕໍ່ຕົວເອງ ແລະ ພຶດຕິກຳແບບນີ້ກໍບໍ່ເໝາະສົມ ເພາະມັນຜິດຮີດຄອງປະເພນີ ແລະ ສ້າງຄວາມແຕກແຍກໃຫ້ກັບສະຖາບັນຄອບຄົວ ທັງເຮັດໃຫ້ລູກມີປົມດ້ອຍ ແລະ ພ້ອມຂາດຄວາມອົບອຸ່ນ.

 

ບົດໂດຍ: ພຸດສະດີ
ຂໍ້ມູນກົດໝາຍ: ກົດໝາຍລາວ Law of Laos

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.