ເຜີຍ​ແຜ່​ຜົນສຳ​ເລັດ​ “ໜຶ່ງ​ແລວ ໜຶ່ງ​ເສັ້ນທາງ” ​ເພື່ອ​ການ​ຮ່ວມ​ມືສາກົນ

0
101

ເມື່ອ​​ວັນ​ທີ 07 ຕຸລາຜ່ານມາ ​ກະຊວງການຕ່າງປະເທດຮ່ວມກັບແຂວງສະຫວັນນະເຂດໄດ້​ຈັດກອງ​ປະຊຸມ​ສຳມະນາ​ເຜີຍ​ແຜ່​ຜົນສຳ​ເລັດ​ຂອງ​ກອງ​ປະຊຸມ “ໜຶ່ງ​ແລວ ໜຶ່ງ​ເສັ້ນທາງ” ​ເພື່ອ​ການ​ຮ່ວມ​ມືສາກົນ ຄັ້ງທີ 2 ​ແລະ ຄວາມ​ຄືບໜ້າການຈັດຕັ້ງປະຕິບັດ​ວຽກ ງານ​ການ​ເຊື່ຶອມ​ໂຍງ​ເສດຖະກິດກັບ​ພາກພື້ນ ​ແລະ ສາກົນຂອງ ສປປ ລາວ ທີ່ຫ້ອງວ່າການ​ແຂວງ​ສະຫວັນ​ນະ​ເຂດ ພາຍໃຕ້ການເປັນ​ປະທານ​ຮ່ວມຂອງ ທ່ານ ທອງ​ຜານ ສະຫວັນ​ເພັດ ຮອງລັດຖະມົນຕີກະຊວງ​ການ​ຕ່າງປະ​ເທດ ແລະ ທ່ານ ທອນແກ້ວ ພຸດທະໄກຍະລາດ ຮອງ​ເຈົ້າແຂວງສະຫວັນ​ນະ​ເຂດ ມີຜູ້ຕາງໜ້າຈາກ​ບັນດາຂະ​ແໜງ​ການ​ຂອງ​ສູນ​ກາງ ແລະ ຈາກບັນດາ​ແຂວງ​ພາກກາງ ແລະ ພາກ​ໃຕ້ເຂົ້າຮ່ວມ.

ໃນກອງປະຊຸມ​ສຳ​ມະ​ນາຄັ້ງນີ້ຜູ້ເຂົ້າຮ່ວມ​ໄດ້ຮັບຟັງການເຜີຍແຜ່​​ຜົນສຳເລັດຂອງການເຄື່ອນໄຫວວຽກງານເຊື່ອມໂຍງເສດຖະກິດກັບພາກພື້ນ ແລະ ສາກົນຂອງ ສປປ ລາວ ໂດຍສະເພາະແມ່ນຄວາມ​ຄືບໜ້າການຈັດຕັ້ງປະຕິບັດ​ຂອບການຮ່ວມມື ໜຶ່ງແລວ ໜຶ່ງເສັ້ນທາງ​ ​ແລະ ຜົນສຳ​ເລັດ​ຂອງ​ກອງ​ປະຊຸມ ໜຶ່ງ​ແລວ ໜຶ່ງ​ເສັ້ນທາງ​ ເພື່ອ​ການ​ຮ່ວມ​ມື​ສາກົນ ຄັ້ງທີ 2 ​ປັດຈຸ​ບັນ​ ​ຂໍ້​ລິ​ເລີ່​ມດັ່ງກ່າວ​ໄດ້ຮັບ​ການສະໜັບສະໜູນຈາກ 150 ປະເທດ ລວມເຖິງບັນດາອົງການຈັດຕັ້ງສາກົນ.

​​ໃນ​ນີ້ ຜົນສຳ​ເລັດ​ອັນ​ພົ້ນ​ເດັ່ນແມ່ນ​ຜົນສຳ​ເລັດ​ລະຫວ່າງ​ ສປປ ລາວ ​ແລະ ສປ ຈີນ ​ທີ່ໄດ້ສໍາເລັດ​ການ​ເຈລະຈາ ​ແລະ ໄດ້ລົງນາມ​ເນື້ອ​ໃນ​ເອກະສານ​ທີ່​ສຳຄັນຫຼາຍ​ສະບັບ​ເປັນຕົ້ນແມ່ນແຜນແມ່ບົດການສ້າງຄູ່ຮ່ວມຊາຕາກຳ ລາວ-ຈີນ ສັນຍາສາມ​ຝ່າຍ 1 ສະບັບ ​ແລະ ສັນຍາສອງຝ່າຍອີກ 10 ສະບັບ ​ຊຶ່ງເປັນການເສີມຂະຫຍາຍສາຍພົວພັນການຮ່ວມມືລະຫວ່າງສອງປະເທດໃຫ້ນັບມື້ກ້ວາງອອກ ແລະ ເຂົ້າສູ່ລວງເລິກເທື່ອລະກ້າວ ເພື່ອໃຫ້ກາຍເປັນຄູ່ຮ່ວມມືທີ່ໃກ້ຊິດຢ່າງແທ້ຈິງ ນອກຈາກ​ນີ້ ຍັງ​ມີຄວາມ​ຄືບໜ້າການຈັດຕັ້ງປະຕິບັດ​ຂອບການຮ່ວມມືອື່ນໆ​ເຊັ່ນ ຂອບການຮ່ວມມື 4 ປະ​ເທດ​ກຳປູ​ເຈຍ-ລາວ-ມຽນມາ-ຫວຽດນາມ (CLMV) ຂອບ​ຍຸດ​ທະ​ສາດ​ການ​ຮ່ວມ​ມື​ດ້ານ​ເສດຖະກິດ​ແມ່​ນໍ້າ​ອີຣາວະ​ດີ-​ແມ່​ນໍ້າ​ເຈົ້າ​ພຣະຍາ-​ແມ່​ນໍ້າຂອງ (ACMECS) ຂອບ​ການ​ຮ່ວມື​ແມ່​ນໍ້າຂອງ​-​ແມ່​ນໍ້າ​ລ້ານ​ຊ້າງ (MLC) ແລະ ​ເວທີ​ການ​ຮ່ວມ​ມື​ອາຊີ​ຕາ​ເວັນ​ອອກ-ອາ​ເມຣິກາລາຕິນ (FEALAC).

ຈຸດປະສົງກອງປະຊຸມເພື່ອເຮັດ​ໃຫ້​ບັນດາ​ພະນັກງານ​ຈາກ​ບັນດາ​ຂະ​ແໜງ​ການ ​ແລະ ອຳນາດ​ການ​ປົກຄອງ​ທ້ອງ​ຖິ່ນໄດ້​ຮັບ​ຊາບ ກ່ຽວກັບການຈັດຕັ້ງປະຕິບັດນະໂຍບາຍການເຊື່ອມໂຍງເສດຖະກິດກັບພາກພື້ນ ແລະ ສາກົນຂອງພັກ ແລະ ລັດຖະບານ​ໃນຂອບການຮ່ວມມືຕ່າງໆ ຜູ້ເຂົ້າຮ່ວມກອງປະຊຸມສຳມະນາຍັງໄດ້​ມີການແລ​ກປ່ຽນຄຳຄິດເຫັນດ້ວຍບັນຍາກາດອັນຟົດຟື້ນ ແລະ ແບບກົງ ໄປກົງມາ​ຕໍ່ບັນດາສິ່ງທ້າທາຍ ກາລະ​​ໂອກາດ ​ແລະ ການກະກຽມຄວາມພ້ອມໃນດ້ານຕ່າງໆແນໃສ່ການ​ຍາດ​ແຍ່ງ​ຜົນ​ປະ​ໂຫຍ​ດຈາກ​ບັນດາ​ຂອບ​ການ​ຮ່ວມ​ມື​ດັ່ງກ່າວ​ເພື່ອ​ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ.

ໃນ​ໂອ​ກາ​ດກອງປະຊຸມດັ່ງກ່າວ ທ່ານ ທອງ​ຜານ ​ສະຫວັນ​ເພັດ ​ຍັງໄດ້​​ເໜັ້ນໜັກ​ເຖິງຄວາມ​ສຳຄັນຂອງການຈັດຕັ້ງປະຕິບັດແນວທາງນະໂຍບາຍການຕ່າງປະເທດຂອງ ສປປ ລາວ ​ໂດຍສະເພາະການເຊື່ອມໂຍງເສດຖະກິດກັບພາກພື້ນ ແລະ ສາກົນ​ ​ພ້ອມ​ທັງຮຽກຮ້ອງ​ໃຫ້​ບັນດາ​ຂະ​ແໜງການ​ເປັນ​ເຈົ້າ​ການເອົາ​ໃຈ​ໃສ່ ແລະ ເພີ່ມທະວີການປັບປຸງກົນໄກການຈັດຕັ້ງປະຕິບັດໃຫ້ມີປະສິດທິຜົນຫຼາຍກວ່າເກົ່າເພື່ອໃຫ້ສອດຄ່ອງກັບສະພາບຕົວຈິງຂອງແຕ່ລະໄລຍະ.

 

 

 

 

ໂດຍ: ດອກຕາເວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.