ເປີດນຳໃຊ້ ອີວີຊ່າ ອອນລາຍ (eVisa) ຢ່າງເປັນທາງການໃນ ສປປ ລາວ

0
235

ເມື່ອວັນທີ 9 ກໍລະກົດຜ່ານມາທີ່ສະໜາມບິນສາກົນວັດໄຕ ນະຄອນຫຼວງວຽງຈັນ ກະຊວງການຕ່າງປະເທດໂດຍສົມທົບກັບບັນດາພາກສ່ວນກ່ຽວຂ້ອງໄດ້ຈັດພິທີເປີດການນຳໃຊ້ອີວີຊ່າ ອອນລາຍ (eVisa) ຢ່າງເປັນທາງການ ໃຫ້ກຽດເຂົ້າຮ່ວມໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ມີບັນດາຮອງ​ລັດ​ຖະ​ມົນ​ຕີ ​ທູ​ຕາ​ນຸ​ທູດ ​ແລະ ຜູ້​ຕາງ​ໜ້າຈາກ​ອົງ​ການ​ຈັດ​ຕັ້​ງ​ສາ​ກົນປະ​ຈຳ ສ​ປ​ປ ລາວ ເຂົ້າຮ່ວມ.

ໂອກາດດັ່ງກ່າວ ທ່ານ ສະເຫຼີມໄຊ ໄດ້ກ່າວວ່າ ເມື່ອບໍ່ດົນມານີ້ລັດ​ຖະ​ບານແຫ່ງ ສປປ ​ລາວ ໄດ້ຕົກລົງໃຫ້ມີການພັດທະນາລະບົບອອກວີຊ່າ ອອນລາຍ (eVisa) ເພື່ອເປັນທາງເລືອກໃໝ່ໜຶ່ງອີກໃຫ້ແກ່ຊາວຕ່າງປະເທດ ໂດຍແນໃສ່ຊຸກຍູ້ສົ່ງເສີມການພົວພັນຮ່ວມມືໃນດ້ານຕ່າງໆໃຫ້ມີການຂະຫຍາຍຕົວຍິ່ງຂຶ້ນ.

ລະບົບດັ່ງກ່າວແມ່ນຈະໄດ້ນຳໃຊ້ໄປຄຽງຄູ່ກັບລະບົບທີ່ປະຕິບັດຢູ່ໃນປັດຈຸບັນ ສໍາລັບລະ​ບົບອອກວີ​ຊ່າ​ ອອນ​ລາຍ ​ໄດ້​ອອກ​ແບບໃຫ້ມີ​ລັກ​ສະ​ນະ​ໃຊ້ງ່າຍ ແລະ ສະດວກສະບາຍ ບໍ່​ສັບ​ສົນ-​ເຂົ້າ​ໃຈ​ງ່າຍ ວ່ອງ​ໄວ ​ແລະ ມີ​ຄວາມ​ປອດ​ໄພສຳລັບ​ຜູ້​ຊົມ​ໃຊ້ ຊຶ່ງ​ທຸກ​ຄົນສາ​ມາດສະ​ເໜີ​ຂໍວີ​ຊ່າ​ເຂົ້າ ສ​ປ​ປ ລາວ ​ທາງອອນ​ລາຍ​ໄດ້​ທຸກ​ເວ​ລາ ແລະ ທຸກ​ສະ​ຖານ​ທີ່ທີ່ມີສັນຍານອິນ​ເຕີ​ເນັດ ທັງນີ້ ຍັງເປັນ​ການ​ປະຢັດ​ຄ່າ​ໃຊ້​ຈ່າຍຖ້າ​ທຽບ​ໃສ່​ການໄປ​ເອົາ​ຢູ່​ບັນ​ດາສະ​ຖານ​ທູດ ສະ​ຖານ​ກົງ​ສຸນໃຫຍ່ ຫ້ອງ​ການ​ກົງ​ສຸນ​ຂອງ​ລາວປະຈຳຕ່າງ​ປະ​ເທດ ລວມ​ທັງເອົາ​ຢູ່​ກັບ​ດ່ານ​ສາ​ກົນ​ຕ່າງໆ.

ທັງນີ້ ລັດຖະບານ​ໄດ້​ອະນຸຍາດ​ໃຫ້​ນໍາ​ໃຊ້ບັດດັ່ງກ່າວຢູ່ໃນ 7 ດ່ານຄື ສະ​ໜາມ​ບິນ​ສາ​ກົນ​ວັດ​ໄຕ ຂົວ​ມິດ​ຕະ​ພາບ ລາວ-ໄທ ແຫ່ງທີ 1 ​ຂົວ​ມິດ​ຕະ​ພາບ ລາວ-ໄທ ແຫ່ງທີ 2 ຂົວ​ມິດ​ຕະ​ພາບ ລາວ-ໄທ ແຫ່ງທີ 4 ສະ​ໜາມ​ບິນ​ສາກົນຫຼວງ​ພຣະ​ບາງ ສະ​ໜາມ​ບິນ​ສາກົນປາກ​ເຊ ແລະ ດ່ານ​ບໍ່​ເຕັນ ​ເພື່ອ​ເປັນ​ດ່ານ​ໃນ​ການ​ຮອງ​ຮັບ ​ແລະ ບໍລິການ​ສຳລັບ​ຄົນ​ຕ່າງປະ​ເທດ​ທີ່​ນຳ​ໃຊ້​ວີ​ຊ່າ ອອນລາຍ ​ເຂົ້າ​ມາໃນ ສປປ ລາວ.

ຢ່າງໃດກໍດີ ​ໃນ​ໄລຍະ​​ເລີ່​ມຕົ້ນ​ແມ່ນຈະ​ເລີ່​ມ​ໃຫ້​ບໍລິການຢູ່ 2 ດ່ານ​ຄື ສະໜາມ​ບິນ​ສາກົນວັດ​ໄຕ ​ແລະ ຂົວ​ມິດຕະພາບ ລາວ-ໄທ ແຫ່ງທີ່ 1 ຊຶ່ງ​​ປັດຈຸ​ບັນຜູ້​ທີ່​​ໃຊ້​ວີ​ຊ່າ ອອນ​ລາຍ ສາມາດ​ເຂົ້າມາ ສປປ ລາວ ​ໄດ້ ໂດຍຜ່ານ 2 ດ່ານ​ ຕາມ Website: www.laoevisa.gov.la​ ຫຼັງ​ຈາກ​ນັ້ນ​ໃນ​ໄລຍະ​ມໍ່ໆນີ້ກໍຈະ​ຂະຫຍາຍລະບົບ​ໄປ​ສູ່​ດ່ານ​ອື່ນ​ໆທີ່​ຍັງ​ເຫຼືອຈົນ​ກວ່າ​ສໍາ​ເລັດທັງ​ໝົດ 7 ດ່ານ ສ່ວນ​ໄລຍະ​ທີ 2 ຈະ​ໄດ້​ມີ​ການ​ຄົ້ນຄວ້າ ​ແລະ ສະ​ເໜີຂໍອະນຸມັດຈາກ​ລັດຖະບານ​ໃນ​ການສືບ​ຕໍ່​ພັດທະນາຢູ່​ດ່ານ​ສາກົນ​ອື່ນໃນ​ຂອບ​ເຂດ​ທົ່ວ​ປະ​ເທດ ​ໂດຍ​ອີງ​ໃສ່​​ເງື່ອນ​ໄຂ ​ແລະ ​ຄວາມ​ຈໍາ​ເປັນຕົວ​ຈິງໃນ​ອະນາຄົດ.

ການ​ຈັດ​ຕັ້ງ​ປະຕິບັດ​ລະບົບອອກວີ​ຊ່າ​ ອອນ​ລາຍ ຈະ​ເປັນກາຍເປັນສິ່ງທີ່ຊ່ວຍກະຕຸ້ນ​ການ​ພົວ​ພັນ​ຮ່ວມ​ມື​ໃນ​ດ້ານ​ຕ່າງໆ​ລະ​ຫວ່າງ​ລັດ​ຖະ​ບານກໍ​ຄື​ອົງ​ການ​ຈັດ​ຕັ້ງ​ຕ່າງໆຂອງ ສ​ປ​ປ ລາວ ກັບບັນດາປະ​ເທດ​ຕ່າງໆທີ່​ບໍ່​ມີສັນ​ຍາ​ຍົກ​ເວັ້ນ​ວີ​ຊ່າກັບ ສປ​ປ​ ລາວ ​ໃຫ້​ມີ​ການ​ຂະ​ຫຍາຍ​ຕົວຮອບດ້ານ ໂດຍ​ສະ​ເພາະ​ໃນ​ດ້ານ​ການ​ທ່ອງ​ທ່ຽວຊຶ່ງຈະກາຍ​ເປັນ​ການ​ປະ​ກອບ​ສ່ວນອັນ​ສຳ​ຄັນ​ເຂົ້າ​ໃນ​ການ​ພັດ​ທະ​ນາ​ເສດ​ຖະ​ກິດ-​ສັງ​ຄົມຂອງ ສ​ປປ ລາວ ນັບຈາກນີ້ ແລະ ໃນອະນາຄົດ.

 

 

 

ໂດຍ: ສະຫະລັດ ວອນທິວົງໄຊ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.