ເບິ່ງດວງປະຈຳອາທິດ, ນັບຕັ້ງແຕ່ວັນທີ 11-17 ກຸມພາ 2019

0
465

ຣາສີມັງກອນ (ຄົນເກີດໃນລະຫວ່າງວັນທີ 16 ມັງກອນ – 12 ກຸມພາ)

ການງານ ຄົນທີ່ກຳລັງຊອກວຽກເຮັດແມ່ນມີໂອກາດໄດ້ວຽກເຮັດຕາມທີ່ຫວັງໄວ້ ສຳລັບຄົນທີ່ເຮັດວຽກຫ້ອງການຂໍໃຫ້ທ່ານຕັ້ງໃຈເຮັດໜ້າທີ່ຂອງຕົນເອງໃຫ້ດີລະພໍ ຢ່າໄປສົນໃຈກັບເລື່ອງອື່ນຫຼາຍ.

ການເງິນ ທ່ານຕ້ອງດຸໝັ່ນໃນການຊອກຫາເງິນຂຶ້ນຕື່ມທ່ານຈິ່ງຈະຢູ່ລອດ ເພາະລາຍຈ່າຍຂອງທ່ານຊ່ວງນີ້ຄ່ອນຂ້າງຫຼາຍກວ່າໄລຍະຜ່ານມາ ເລື່ອງໂຊກລາບອາດມີເຂົ້າມາເລັກໆນ້ອຍໆ.

ຄວາມຮັກ ຄູ່ຮັກອາດເກີດຄວາມຂັດແຍ້ງກັນຂຶ້ນໂດຍເຫດເກີດຈາກເລື່ອງເງິນຄຳ ສະນັ້ນ, ເພື່ອຫຼີກລ່ຽງບັນຫາດັ່ງກ່າວຄວນສື່ສັດ ແລະ ເປີດເຜີຍຕໍ່ກັນແມ່ນດີທີ່ສຸດ.

ຣາສີກຸມ (ຄົນເກີດໃນລະຫວ່າງວັນທີ 13 ກຸມພາ – 13 ມີນາ)

ການງານ ສຳລັບເຈົ້າຂອງທຸລະກິດ ຫຼື ຜູ້ບໍລິຫານ ຄວນລະວັງລູກນ້ອງ ບໍລິວານໂດຍສະເພາະທີ່ເປັນຊາວຕ່າງຊາດ ອາດກໍ່ເລື່ອງເຮັດໃຫ້ທ່ານເກີດຄວາມເດືອດຮ້ອນໄດ້.

ການເງິນ ທ່ານອາດຜິດຫວັງເລື່ອງການນັດໝາຍກ່ຽວກັບເງິນ ຫຼື ການຂໍກູ້ຢືມເງິນ ແມ່ນແຕ່ການທວງໜີ້ສິນກໍ່ຕາມ ໂດຍສະເພາະກັບມິດສະຫາຍພວກເຂົາຈະປະຕິເສດໃຫ້ຄວາມຊ່ວຍເຫຼືອກັບທ່ານ.

ຄວາມຮັກ ເປັນອາທິດທີ່ຄວນຫຼີກລ່ຽງການຂັດແຍ້ງ, ການໂຕ້ຖຽງ ຫຼື ມີບັນຫາກັບເພດກົງກັນຂ້າມ ສຳລັບຄົນໂສດກໍ່ໃຫ້ລະວັງເພດກົງກັນຂ້າມທີ່ເຂົ້າມາພົວພັນໃນຊ່ວງນີ້ໃຫ້ດີ ເພາະມີໂອກາດສູງທີ່ທ່ານຈະຖືກຫຼອກລວງ.

ຣາສີມິນ (ຄົນທີ່ເກີດໃນລະຫວ່າງວັນທີ 14 ມີນາ – 12 ເມສາ)

ການງານ ເປັນອາທິດທີ່ເໝາະສົມໃນການແກ້ໄຂບັນຫາ ຫຼື ສະສາງວຽກທີ່ຄົງຄ້າງໃຫ້ສຳເລັດ ແຕ່ລະວັງການຂັດແຍ້ງກັບມິດສະຫາຍໃນສາຍງານດຽວກັນ ເພາະອາດສ້າງສັດຕູຂຶ້ນໄດ້.

ການເງິນ ການສະແຫວງລາຍຮັບເພີ່ມຢູ່ໃນເກນທີ່ດີ ແຕ່ອາດໄດ້ຊ້າກວ່າທີ່ຄິດໄວ້ ຫຼື ບໍ່ໄດ້ເຕັມຈຳນວນທີ່ຄາດໄວ້ ສະນັ້ນ ທ່ານຕ້ອງອົດທົນໄປກ່ອນ ຢ່າໃຈຮ້ອນກ່ຽວກັບເລື່ອງເງິນເດັດຂາດ.

ຄວາມຮັກ ຄົນໂສດທີ່ກຳລັງຢາກມີຄົນຮັກໃຫ້ລະວັງຮັກແບບອອນລາຍນ໌ ເພາະອາດຖືກເຂົາຫຼອກໃຫ້ຊ້ຳໃຈໄດ້ ສ່ວນຄົນມີຄູ່ຄອງແລ້ວ ຢ່າຫູເບົາໄປກັບຄຳຂອງຄົນອື່ນຫຼາຍຈົນເກີນໄປ ເພາະຈະນຳບັນຫາມາສູ່ຄອບຄົວ.

ຣາສີເມກ (ຄົນທີ່ເກີດໃນລະຫວ່າງວັນທີ 13 ເມສາ – 13 ພຶດສະພາ)

ການງານ ທ່ານຄວນກຽມພ້ອມຢ່າປະໝາດເດັດຂາດທັງເລື່ອງເວລາ ແລະ ເອກະສານ ໂດຍສະເພາະຄົນທີ່ກຳລັງຈະເດີນທາງໄກໄປຕ່າງປະເທດ ຕ່າງແຂວງ ຫຼື ມີນັດປະຊຸມ ເພາະອາດມີການຊັກຊ້າ ແລະ ມີຂໍ້ບົກຜ່ອງໃນໜ້າທີ່ໄດ້.

ການເງິນ ຕົນເພິ່ງຕົນເທົ່ານັ້ນ ຫາກທ່ານຂະຫຍັນທ່ານຈະພົບກັບຊ່ອງທາງຫາເງິນໄດ້ຫຼາຍຂຶ້ນ ແຕ່ສ່ວນຫຼາຍທ່ານເສຍເງິນໄປກັບການຮັກສາສຸຂະພາບເປັນສ່ວນໃຫຍ່.

ຄວາມຮັກ ຄົນໂສດເພື່ອນຮ່ວມງານກຳລັງສົນໃຈຢູ່ ແຕ່ອາດຜິດຫວັງເພາະເຂົາບໍ່ສົນໃຈທ່ານ ສຳລັບຄົນມີຄູ່ຄອງຄວາມຮັກມີຄວາມສຸກດີ ບໍ່ມີບັນຫາໃດໆມາລົບກວນ.

ຣາສີພຶກສົບ (ຄົນເກີດໃນລະຫວ່າງວັນທີ 14 ພຶດສະພາ – 13 ມິຖຸນາ)

ການງານ ມີງານເຂົ້າມາຫຼາຍຈົນທ່ານບໍ່ມີເວລາເບິ່ງແຍງຕົວເອງ ເປັນອາທິດທີ່ຕ້ອງມີການຕັດສິນໃຈເລື່ອງຕ່າງໆເຕັມໄປໝົດ ບາງຄົນອາດມີຄວາມຮູ້ສຶກເມື່ອຍຈົນຢາກລາພັກ.

ການເງິນ ລາຍຮັບຢູ່ໃນເກນປົກກະຕິ ແຕ່ສຳລັບຄົນເດີນທາງໄກແມ່່ນຕ້ອງໃຊ້ຈ່າຍເງິນຫຼາຍ ສະນັ້ນ ຄວນພິຈາລະນາໃຫ້ດີກ່ອນຕັດສິນໃຈອອກເດີນທາງ.

ຄວາມຮັກ ຄົນມີຄູ່ແລ້ວຄວນແບ່ງເວລາໃຫ້ຄົນຮັກແນ່ກໍ່ດີ ເພາະຄົນຮັກກໍ່ຕ້ອງການມີເວລາຫວານຊຶ້ງກັບທ່ານ ອາດພາກັນໄປທ່ຽວນອກສະຖານທີ່ເພື່ອປ່ຽນບັນຍາກາດຊີວິດ ສ່ວນຄົນໂສດຍັງເຫງົາໃຈເພາະຍັງບໍ່ມີໃຜເທື່ອ.

ຣາສີເມຖຸນ (ຄົນເກີດໃນລະຫວ່າງວັນ 14 ມິຖຸນາ – 14 ກໍລະກົດ)

ການງານ ທ່ານຈະມີໂອກາດສຳເລັດໃນໜ້າທີ່ການງານ ທ່ານຈະໄດ້ຮັບການສະໜັບສະໜູນຈາກຫົວໜ້າ ແຕ່ກໍ່ຄວນລະວັງ ເພາະໂດດເດັ່ນເກີນໄປກໍ່ຈະເຮັດໃຫ້ເພື່ອນຮ່ວມງານອິດສາ.

ການເງິນ ລາຍຮັບລາຍຈ່າຍໝູນວຽນປົກກະຕິ ແຕ່ທ່ານມີແນວໂນ້ມຈະຖືກຫຼອກໃຫ້ຊື້ສິນຄ້າລາຄາແພງເກີນຈິງ ຫຼື ມີເກນເສຍເງິນກ້ອນໃຫຍ່.

ຄວາມຮັກ ຄົນມີຄູ່ແລ້ວອາດເກີດບັນຫາເລື່ອງເງິນຄຳ ຍ້ອນມີໜີ້ສິນເຮັດໃຫ້ຄວາມຮັກຂອງທ່ານບໍ່ມີຄວາມສຸກຄືເມື່ອກ່ອນ ຄົນໂສດຈະໄດ້ພົບຄົນທີ່ຖືກໃຈເມື່ອເວລາໄປອອກງານສັງຄົມຕ່າງໆ.

ຣາສິກໍລະກົດ (ຄົນເກີດລະຫວ່າງວັນທີ 15 ກໍລະກົດ – 16 ສິງຫາ)

ການງານ ເປັນອາທິດທີ່ທ່ານຕ້ອງມີການພິຈາລະນາຢ່າງຮອບຄອບ ບໍ່ວ່າຈະເປັນຄົນທີ່ເຮັດທຸລະກິດ ຫຼື ວຽກງານໃນຫ້ອງການກໍ່ຕາມ ໂດຍສະເພາະວຽກງານທີ່ກ່ຽວກັບເອກະສານທີ່ທ່ານຕ້ອງເອົາໃຈໃສ່ເປັນພິເສດ

ການເງິນ ຮັບມາຫຼາຍ ກໍ່ຈ່າຍອອກໄປຫຼາຍຄືກັນ ລະວັງຈະມີຄົນບໍ່ຫວັງດີມາຕົວະຢັວະທ່ານ, ສໍ້ໂກງທ່ານ ເຮັດໃຫ້ທ່ານເສຍເງິນກ້ອນໃຫຍ່ ແລະ ເສຍໃຈໜັກ

ຄວາມຮັກ ຈະເກີດຄວາມຂັດແຍ້ງຕໍ່ກັນ ເນື່ອງຈາກວ່າຕ່າງຝ່າຍກໍ່ຕ່າງຢາກເອົາຊະນະ ສະນັ້ນ,​ທັງສອງຝ່າຍຄວນໃຈເຢັນ ແລະ ຖອຍຫຼັງຕັ້ງຫຼັກກັນຄົນລະກ້າວກ່ອນແມ່ນດີທີ່ສຸດ

ຣາສີສິງ (ຄົນເກີດໃນລະຫວ່າງວັນທີ 17 ສິງຫາ – 16 ກັນຍາ)

ການງານ ທ່ານຕ້ອງເອົາໃຈໃສ່ກັບວຽກຂອງທ່ານໃຫ້ຫຼາຍຂຶ້ນກວ່ານີ້ ຍອມຮັບຟັງຄຳຄິດເຫັນຂອງຄົນອື່ນແນ່ໃນບາງເລື່ອງ ໂດຍສະເພາະເພື່ອນຮ່ວມງານໃນກຸ່ມດຽວກັນ ຈິ່ງເຮັດໃຫ້ວຽກງານບໍ່ເກີດບັນຫາ ແລະ ເຮັດສຳເລັດໄດ້ງ່າຍຂຶ້ນ

ການເງິນ ຢູ່ໃນເກນທີ່ດີ ນອກຈາກມີລາຍຮັບຈາກງານປະຈຳແລ້ວ ທ່ານຍັງຈະມີລາຍຮັບຈາກວຽກເສີມອີກດ້ວຍ ແຕ່ທ່ານຕ້ອງເອົາໃຈໃສ່ເລື່ອງການຕິດຕໍ່ພົວພັນຢ່າໃຊ້ອາລົມຕັດສິນເດັດຂາດ ເພາະທ່ານຈະເສຍທັງເງິນ ແລະ ໂອກາດ

ຄວາມຮັກ ສຳລັບຄົນໂສດຍັງມີໂອກາດໄດ້ພົບຮັກ ໄດ້ພົບເນື້ອຄູ່ຈາກສາຍງານທີ່ເຮັດ ສ່ວນຄົນມີຄູ່ແລ້ວ ອາລົມຊ່ວງນີ້ໃຈຮ້າຍງ່າຍໃຫ້ລະວັງເລື່ອງການໃຊ້ຄຳເວົ້າ ເພາະອາດເຖິງຂັ້ນແຕກຫັກກັນໄດ້.

ຣາສິກັນ (ຄົນເກີດລະຫວ່າງວັນທີ 17 ກັນຍາ – 16 ຕຸລາ)

ການງານ ການກະທຳຂອງທ່ານໃນອາທິດນີ້ແມ່ນໃຫ້ລະວັງ ແລະ ໃຫ້ຢູ່ໃນຄວາມພໍດີ ບໍ່ວ່າທ່ານຄິດຈະເຮັດຫຍັງກໍ່ຕາມພະຍາຍາມຢ່າໄປລ້ຳເສັ້ນຄົນອື່ນ ຫຼື ໄປຂັດຜົນປະໂຫຍດຂອງຄົນອື່ນ.

ການເງິນ ທ່ານຈະຕ້ອງຈ່າຍເງິນກ້ອນໃຫຍ່ແບບບໍ່ຄາດຄິດ ອາດເປັນເລື່ອງການປິ່ນປົວສຸຂະພາບ ຫຼື ບໍ່ດັ່ງນັ້ນກໍ່ຍ້ອນລູກ-ຫຼານໄປກໍ່ເລື່ອງມາໃຫ້ທ່ານຕ້ອງເສຍເງິນ

ຄວາມຮັກ ທ່ານຈະໄດ້ຂອງຂວັນຈາກຄົນຮັກ ຄວາມຮັກຂອງທ່ານມີຄວາມສຸກສົດໃສດີທຸກປະການ ສຳລັບຄົນໂສດ ອາດຈະໄດ້ພົບຄົນທີ່ຖືກໃຈແຕ່ຄວນກວດສອບປະຫວັດເຂົາໃຫ້ດີກ່ອນວ່າຄົນນັ້ນໂສດແທ້ ຫຼື ບໍ່

ຣາສີຕຸນ (ຄົນເກີດໃນລະຫວ່າງວັນທີ 17 ຕຸລາ – 16 ພະຈິກ)

ການງານ ການຕິດຕໍ່ພົວພັນວຽກ ຫຼື ການສຳພາດວຽກໃໝ່ມີຄວາມຫວັງວ່າຈະສຳເລັດ ແຕ່ບໍ່ວ່າທ່ານຈະເຮັດຫຍັງກໍ່ຕາມບໍ່ຄວາມສະແດງຄວາມຄິດເຫັນທີ່ໂດດເດັ່ນເກີນໄປໂດຍສະເພາະກັບຫົວໜ້າສາຍງານ ເພາະຈະເຮັດໃຫ້ພວກເຂົາບໍ່ພໍໃຈໃນຕົວທ່ານ.

ການເງິນ ລາຍຮັບລາຍຈ່າຍໝູນວຽນຕາມປົກກະຕິ ແຕ່ກ່ອນຈະຈ່າຍທຸກຄັ້ງຕ້ອງມີການພິຈາລະນາຢ່າງຮອບຄອບ ໂດຍສະເພາະລາຍຈ່າຍທີ່ເປັນເງິນກ້ອນໃຫຍ່ ຫຼື ການເຊັນສັນຍາຕ່າງໆທີ່ກ່ຽວກັບເງິນແມ່ນຕ້ອງຄິດໃຫ້ດີໆກ່ອນ.

ຄວາມຮັກ ຄົນທີ່ມີແຟນແລ້ວມີໂອກາດໄດ້ແຕ່ງງານກັນ ສ່ວນຄົນໂສດໃນອາທິດນີ້ຈະມີຄົນບໍ່ຫວັງດີເຂົ້າມາພົວພັນ ເຂົາຫວັງເອົາແຕ່ເງິນທ່ານຫຼາຍກວ່າຮັກທ່ານ.

ຣາສີພິຈິກ (ຄົນເກີດລະຫວ່າງວັນ 17 ພະຈິກ – 15 ທັນວາ)

ການງານ ອາທິດນີ້ຈະມີເກນໄດ້ອອກງານສັງຄົມ ໄດ້ພົບກັບທາງເລືອກໃໝ່ໆຫຼາຍຂຶ້ນ ແຕ່ໃຫ້ລະວັງການຕິດຕໍ່ສື່ສານກັບເພື່ອນຮ່ວມງານ ເພາະທ່ານຈະຖືກເວົ້າຂວັນຫຼັບຫຼັງທ່ານໄດ້.

ການເງິນ ອາດໄດ້ລາບຜົນຫຼາຍຂຶ້ນຈາກຄອບຄົວ ຫຼື ຈາກການຊື້-ຂາຍເຮືອນ, ທີ່ດິນເປັນຕົ້ນ ແຕ່ຄວນລະວັງຄົນແປກໜ້າ ໂດຍສະເພາະຊາວຕ່າງຊາດ ອາດເຮັດໃຫ້ທ່ານເສຍເງິນ ຫຼື ຂອງມີຄ່າໄດ້.

ຄວາມຮັກ ເປັນອາທິດທີ່ຈະເກີດການຜິດຖຽງກັນຍ້ອນຄວາມເຫັນທີ່ແຕກຕ່າງ  ຄົນມີຄູ່ຄອງແລ້ວລູກ-ຫຼານຈະນຳເລື່ອງມາໃຫ້ ຈົນເຮັດໃຫ້ຄອບຄົວບໍ່ມີຄວາມສຸກ.

ຣາສີທະນູ (ຄົນເກີດໃນລະຫວ່າງວັນທີ 16 ທັນວາ – 15 ມັງກອນ)

ການງານ ສຳລັບຄົນທີ່ເປັນເຈົ້າຂອງທຸລະກິດ ຫຼື ຫົວໜ້າສາຍງານຊ່ວງນີ້ຄວນຖະໜອມນ້ຳໃຈລູກນ້ອງໄວ້ແນ່ກໍ່ດີ ສຳລັບມະນຸດເງິນເດືອນພະນັກງານທຳມະດາອາດພົບກັບການຊິງດີຊິງເດັ່ນໃນສາຍງານ.

ການເງິນ ໄດ້ເຂົ້າມາຫຼາຍກໍ່ໝົດໄປຫຼາຍຕາມການໃຊ້ຈ່າຍຂອງທ່ານເອງ ແລະ ໃຫ້ລະວັງຈະເກີດໜີ້ສິນ ຫຼື ອາດມີຄົນມາຂໍກູ້ຢືມເງິນ ເພາະນອກຈາກຈະບໍ່ໄດ້ເງິນຄືນແລ້ວ ຍັງສ້າງສັດຕູອີກດ້ວຍ.

ຄວາມຮັກ ຄົນມີຄູ່ແລ້ວຄວາມຮັກມີຄວາມສຸກດີທຸກຢ່າງ ສ່ວນຄົນໂສດກຳລັງຕາມລ່າຫາຮັກແທ້ຢູ່ຂໍໃຫ້ທ່ານອົດທົນຂຶ້ນຕື່ມ ອີກບໍ່ດົນທ່ານຈະໄດ້ພົບກັບຮັກແທ້ແນ່ນອນ.

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.