ເບິ່ງດວງປະຈຳອາທິດ, ນັບຕັ້ງແຕ່ວັນທີ 01 -07 ມັງກອນ 2019

0
776

 

ຣາສີມັງກອນ (ຄົນເກີດໃນລະຫວ່າງວັນທີ 16 ມັງກອນ – 12 ກຸມພາ)

ການງານ ທ່ານຄວນຫຼີກລ້ຽງການຂັດແຍ່ງ ຄັດຄ້ານ ຕໍ່ຕ້ານຄວາມຄິດຂອງຜູ້ອື່ນ ເພາະມີເກນສູງທີ່ທ່ານຈະມີສັດຕູ ສະນັ້ນ, ໃນບາງເລື່ອງທ່ານກໍ່ຄວນເຫັນດີເຫັນພ້ອມໄປກັບທີມງານກໍແລ້ວ.

ການເງິນ ໂດຍສະເພາະຄົນທີ່ເຮັດກ່ຽວກັບການຄ້າຂາຍ ຕ້ອງລະວັງໄພເລື່ອງການເດີນທາງ ຫຼື ຍາດພີ່ນ້ອງ ມິດສະຫາຍ ອາດເຮັດໃຫ້ທ່ານເສຍເງິນແບບບໍ່ຄາດຄິດ.

ຄວາມຮັກ ຄົນມີຄູ່ແລ້ວຄວນຟັງຄຳຄິດເຫັນຂອງຄົນຮັກໃຫ້ຫຼາຍຂຶ້ນ ຈິ່ງຈະເຮັດໃຫ້ຄວາມສຳພັນຂອງທ່ານໝັ້ນຄົງ ສວ່ນຄົນໂສດອາດໄດ້ພົບຮັກຍ້ອນເພື່ອນມິດສະຫາຍແນະນຳໃຫ້ຮູ້ຈັກໃຜຄົນໜຶ່ງ.

ຣາສີກຸມ (ຄົນເກີດໃນລະຫວ່າງວັນທີ 13 ກຸມພາ – 13 ມີນາ)

ການງານ ຫາກຕອນນີ້ທ່ານມີຄວາມຄິດຈະເຮັດສິ່ງໃດທ່ານບໍ່ຄວນບອກໃຫ້ໃຜຮູ້ ເພາະມີເກນວ່າທ່ານຈະຖືກຄົນອື່ນລັກເອົາແນວຄວາມຄິດຂອງທ່ານໄປເຮັດ ໂດຍສະເພາະແມ່ນຄົນໃກ້ຕົວທ່ານເອງ ສຳລັບຄົນທີ່ຈະລົງທຶນຮ່ວມກັບມິດສະຫາຍແມ່ນໃຫ້ພິຈາລະນາຢ່າງຮອບຄອບກ່ອນ.

ການເງິນ ຫາກທ່ານໝັ່ນຫາເງິນໄດ້ເລື່ອຍໆ ຂໍໃຫ້ທ່ານລະວັງການໃຊ້ຈ່າຍແບບຟຸມເຟືອຍ ເພາະທ່ານຈະເດືອດຮ້ອນພາຍຫຼັງ ຫາກທ່ານຄິດຈະປ່ອຍເງິນໃຫ້ຄົນອື່ນຢືມ ແມ່ນເຊົາຄິດກ່ອນ ເພາະມີເກນໄດ້ເງິນຄືນຍາກ.

ຄວາມຮັກ ລະວັງຜິດໃຈກັບຄົນຮັກຍ້ອນເລື່ອງເງິນຄຳ ແລະ ເລື່ອງຄຳເວົ້າກໍ່ສຳຄັນເພາະອາດເຮັດໃຫ້ຄົນຮັກບໍ່ໄວ້ວາງໃຈທ່ານໄດ້ ສຳລັບຄົນໂສດລະວັງເພດກົງກັນຂ້າມທີ່ເພື່ອນທ່ານແນະນຳໃຫ້ຮູ້ຈັກ ເພາະມີເກນສູງວ່າຈະກຸ້ມໃຈຫຼາຍກວ່າສຸກໃຈ.

ຣາສີມິນ (ຄົນທີ່ເກີດໃນລະຫວ່າງວັນທີ 14 ມີນາ – 12 ເມສາ)

ການງານ ຄົນທີ່ເຮັດທຸລະກິດ ຫຼື ວຽກທີ່ກ່ຽວກັບການຕິດຕໍ່ສື່ສານ ຈະຢູ່ໃນເກນທີ່ດີຢ່າງຕໍ່ເນື່ອງ ຈະສາມາດຂະຫຍາຍວຽກງານຕ່າງໆໄດ້ຢ່າງໝັ້ນຄົງ.

ການເງິນ ຫາຫຼາຍໄດ້ຫຼາຍ ແຕ່ອາທິດນີ້ທ່ານບໍ່ຄວນໃຈອ່ອນໄປຊ່ວຍໃຜເລື່ອງເງິນ ເພາະທ່ານອາດຖືກຫຼອກລວງ ມີແນວໂນ້ມຈະເສຍເງິນຈຳນວນຫຼາຍ.

ຄວາມຮັກ ຂໍໃຫ້ທ່ານໃຈເຢັນລົງກວ່ານີ້ ຄວນຫຼີກລ່ຽງການຜິດຖຽງກັນຕໍ່ໜ້າຄົນອື່ນ ສຳລັບຄົນໂສດທ່ານຈະໄດ້ພົບເນື້ອຄູ່ ຈາກການເດີນທາງໄກ.

 

ຣາສີເມກ (ຄົນທີ່ເກີດໃນລະຫວ່າງວັນທີ 13 ເມສາ – 13 ພຶດສະພາ)

ການງານ ຄົນທີ່ກຳລັງຊອກຫາງານ ຫຼື ສຳພາດ ອາດຜິດຫວັງ ສ່ວນຄົນທີ່ມີວຽກເຮັດອາດເກີດຄວາມຂັດແຍ້ງດ້ານຄວາມຄິດກັບເພື່ອນຮ່ວມງານ.

ການເງິນ ລາຍຮັບຍັງຄືເກົ່າ ແຕ່ຂໍໃຫ້ລະວັງທ່ານຈະເສຍເງິນໄປກັບການປິ່ນປົວສຸຂະພາບທັງຂອງຕົວເອງ ແລະ ຄົນໃນຄອບຄົວ

ຄວາມຮັກ ລະວັງຈະເກີດການຜິດຖຽງກັນກັບຄົນຮັກຍ້ອນເລື່ອງຂອງຄົນໃນຄອບຄົວ ສ່ວນຄົນໂສດຍັງໂສດຕໍ່ໄປເພາະຍັງບໍ່ມີໃຜເຂົ້າມາສົນໃຈທ່ານເທື່ອ.

ຣາສີພຶກ (ຄົນເກີດໃນລະຫວ່າງວັນທີ 14 ພຶດສະພາ – 13 ມິຖຸນາ)

ການງານ ຮູ້ເອົາຕົວລອດເປັນຍອດຄົນ ທ່ານບໍ່ຄວນເຂົ້າໄປຫຍຸ້ງກັບບັນຫາຂອງຄົນອື່ນ ເຮັດວຽກຂອງຕົນໃຫ້ດີທີ່ສຸດລະພໍ ແລະ ທ່ານບໍ່ຄວນເຊື່ອຄຳເວົ້າຂອງໃຜຫຼາຍເກີນໄປ ເພາະທ່ານຈະຜິດຫວັງໄດ້.

ການເງິນ ທ່ານຈະໄດ້ເງິນເພີ່ມຈາກງານປະຈຳ ແລະ ງານພິເສດ ແຕ່ທ່ານບໍ່ຄວນໃຫ້ໃຜຢືມເງິນ ໂດຍສະເພາະກັບມິດສະຫາຍເພາະອາດບໍ່ໄດ້ຄືນ.

ຄວາມຮັກ ທ່ານຈະມີໂຊກລາບຈາກຄວາມສະເໜ່ຫາຈາກຄົນຮັກ ສ່ວນຄົນໂສດທີ່ຕ້ອງການມີຄວາມຮັກແມ່ນຕ້ອງໝັ່ນເຂົ້າຮ່ວມກິດຈະກຳທາງສັງຄົມ ທ່ານຈິ່ງມີໂອກາດໄດ້ພົບຄົນທີ່ຖືກໃຈ.

ຣາສີເມຖຸນ (ຄົນເກີດໃນລະຫວ່າງວັນ 14 ມິຖຸນາ – 14 ກໍລະກົດ)

ການງານ ຈະມີອຸປະສັກເຂົ້າມາເລື້ອຍໆເຖິງຈະເປັນເລື່ອງນ້ອຍໆແຕ່ເຂົ້າມາຕະຫຼອດກໍ່ເຮັດໃຫ້ທ່ານເບື່ອໄດ້ ທ່ານຕ້ອງຕັ້ງໃຈເຮັດວຽກແບບຈິງຈັງຈິ່ງບໍ່ເກີດຜົນເສຍ.

ການເງິນ ຈະມີລາຍຈ່າຍເຂົ້າມາຫຼາຍກວ່າລາຍຮັບ ດັ່ງນັ້ນກ່ອນໃຊ້ຈ່າຍເງິນຕ້ອງຄິດໃຫ້ຮອບຄອບກ່ອນຈິ່ງຈ່າຍທຸກຄັ້ງ.

ຄວາມຮັກ ຄົນໂສດມີແນວໂນ້ມວ່າທ່ານຈະໄດ້ພົບຄົນທີ່ໜ້າຮັກ ສ່ວນທ່ານທີ່ມີແຟນແລ້ວຈະເກີດເລື່ອງກັງວົນໃຈຍ້ອນຄຳເວົ້າຂອງຄົນອ້ອມຂ້າງ.

ຣາສິກໍລະກົດ (ຄົນເກີດລະຫວ່າງວັນທີ 15 ກໍລະກົດ – 16 ສິງຫາ)

ການງານ ທ່ານຄວນຈັດຄວາມສຳຄັນຂອງວຽກໃຫ້ດີຈິ່ງບໍ່ເກີດຄວາມຜິດພາດ ສຳລັບຄົນທີ່ວ່າງງານ ແລະ ລໍຖ້າຄຳຕອບເລື່ອງວຽກຈະໄດ້ຮັບຂ່າວດີພາຍໃນອາທິດນີ້.

ການເງິນ ຢາກໄດ້ເງິນຕ້ອງຂະຫຍັນຫາ ຢ່າຫວັງຈາກການສ່ຽງໂຊກຫຼື ເພິ່ງພາໃຜ ການໃຊ້ຈ່າຍຕ້ອງຮອບຄອບຢ່າໃຊ້ເງິນເກີນຕົວ.

ຄວາມຮັກ ຄົນມີຄູ່ແລ້ວຈະໄດ້ຂອງຂວັນຈາກຄົນຮັກ ສ່ວນຄົນໂສດເນື້ອຄູ່ຂອງທ່ານຈະເຂົ້າມາແບບບໍ່ຄາດຄິດ.

ຣາສີສິງ (ຄົນເກີດໃນລະຫວ່າງວັນທີ 17 ສິງຫາ – 16 ກັນຍາ)

ການງານ ທ່ານຈະໄດ້ຮັບມອບໝາຍໄປຕິດຕໍ່ວຽກກັບຜູ້ໃຫຍ່ ແລະ ອາດຈະມີເຫດການບາງຢ່າງທີ່ເຮັດໃຫ້ທ່ານຕ້ອງໄດ້ຍ້າຍໄປຮັບຜິດຊອບວຽກດ້ານອື່ນ.

ການເງິນ ຄົນທີ່ລໍຄອຍເງິນອາດບໍ່ໄດ້ຕາມກຳນົດເວລາ ແລະ ຈະມີເຫດໃຫ້ທ່ານຕ້ອງຈ່າຍເງິນຫຼາຍ.

ຄວາມຮັກ ຄົນໂສດຮັກແທ້ຍັງຢູ່ໄກ ຊ່ວງນີ້ໃຫ້ຕັ້ງໃຈເຮັດວຽກ ຫຼື ຮຽນໄປກ່ອນ ສ່ວນຄົນມີຄູ່ອາດມີເລື່ອງເຂົ້າມາໃຫ້ທ່ານຄິດ ອາດເຮັດໃຫ້ເກີດຄວາມລະແວງກັນ ແລະ ກັນ.

ຣາສິກັນ (ຄົນເກີດລະຫວ່າງວັນທີ 17 ກັນຍາ – 16 ຕຸລາ)

ການງານ ທ່ານຕ້ອງລະວັງການຜິດໃຈກັບເພື່ອນຮ່ວມງານ ລະວັງຄຳເວົ້າໄວ້ແນ່ກໍ່ດີ ແລະ ຊ່ວງນີ້ທ່ານຈະຮູ້ສຶກເບື່ອວຽກທີ່ທ່ານເຮັດຢູ່.

ການເງິນ ຈະມີໂຊກທາງດ້ານເງິນ ບາງຄັ້ງເປັນໂຊກແບບບໍ່ຄາດຝັນ ການເງິນຈະມີແນວໂນ້ມດີຂຶ້ນກວ່າໄລຍະຜ່ານມາ.

ຄວາມຮັກ ທ່ານຍັງບໍ່ຄິດເລື່ອງແຟນ ເພາະຍັງຢາກຢູ່ແບບເປັນໂສດ ສ່ວນຄົນມີຄູ່ແລ້ວອາດມີເລື່ອງເຮັດໃຫ້ທ່ານກັບຄົນຮັກເວົ້າບໍ່ເຂົ້າຄໍກັນ.

ຣາສີຕຸນ (ຄົນເກີດໃນລະຫວ່າງວັນທີ 17 ຕຸລາ – 16 ພະຈິກ)

ການງານ ວຽກງານໄປໄດ້ດີບໍ່ມີບັນຫາໃດໆມາກວນໃຈທ່ານຍັງມີຜູ້ໃຫຍ່ສະໜັບສະໜູນທ່ານຢູ່.

ການເງິນ ດ້ານການເງິນຢ່າໃຊ້ຈົນເກີນຕົວ ແລະ ຢ່າໃຫ້ໃຜຢືມເງິນເດັດຂາດເພາະມີແນວໂນ້ມຈະບໍ່ໄດ້ເງິນຄືນ.

ຄວາມຮັກ ຄົນໂສດກຳລັງມີສະເໜ່ແຮງຫຼາຍໄປທາງໃດກໍ່ມີແຕ່ຄົນມາສົນໃຈ ຄົນທີ່ມີຄູ່ແລ້ວຈະເກີດເຫດໃຫ້ຜິດໃຈກັນຢູ່ເລື້ອຍໆຍ້ອນເລື່ອງບໍ່ເປັນເລື່ອງ.

ຣາສີພິຈິກ (ຄົນເກີດລະຫວ່າງວັນ 17 ພະຈິກ – 15 ທັນວາ)

ການງານ ທ່ານຈະໄດ້ຮັບການສະໜັບສະໜູນ ແລະ ໂອກາດດີໆໃນບ່ອນເຮັດວຽກ ຄົນທີ່ເຮັດວຽກກ່ຽວກັບຕົວເລກບັນຊີແມ່ນໃຫ້ທ່ານເພີ່ມຄວາມຮອບຄອບຂຶ້ນກວ່ານີ້ອີກ.

ການເງິນ ເງິນຫາມາໄດ້ກໍ່ເກັບບໍ່ຢູ່ ຈະໝົດໄປກັບການຊື້ເຄື່ອງເຂົ້າເຮືອນ ຫຼື ສ້ອມແປງລົດເປັນຕົ້ນ.

ຄວາມຮັກ ຄວາມຮັກມີຄວາມສຸກ ຄົນຮັກໃຫ້ການຊ່ວຍເຫຼືອທ່ານເປັນຢ່າງດີ ສ່ວນຄົນໂສດຕອນນີ້ກຳລັງເຫງົາໃຈເພາະຢາກມີຄູ່ຄືຄົນອື່ນ.

ຣາສີທະນູ (ຄົນເກີດໃນລະຫວ່າງວັນທີ 16 ທັນວາ – 15 ມັງກອນ)

ການງານ ທ່ານຈະໄດ້ເຮັດວຽກທີ່ທ້າທາຍຄວາມສາມາດຂອງທ່ານ ແລະ ຍັງໄດ້ເຮັດວຽກກັບຄົນເກັ່ງອີກດ້ວຍ ໃຫ້ທ່ານລະວັງການມີບັນຫາຂັດແຍ້ງກັບເພື່ອນຮ່ວມງານ ຫຼື ຫຸ້ນສ່ວນ.

ການເງິນ ທ່ານມີໂອກາດໄດ້ເງິນຈາກງານພິເສດ ດວງການເງິນຍັງດີຢູ່ບໍ່ເຖິງຂັ້ນຕ້ອງໄປຢືມເງິນຄົນອື່ນມາໃຊ້.

ຄວາມຮັກ ຄົນຮັກທີ່ເຄີຍເລີກກັນໄປອາດຈະໄດ້ກັບມາຄົບກັນຄືນ ຊ່ວງນີ້ທ່ານກຳລັງມີສະເໜ່ແຮງ ບໍ່ວ່າຈະໄປທາງໃດກໍ່ຈະມີຄົນມາຈີບທ່ານ.

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.