ເນັ້ນ!! ບັນດາຂະແໜງການ ແລະ ທ້ອງຖິ່ນວາງທິດທາງແກ້ໄຂບັນຫາໄພພິບັດກ່ອນ ແລະ ຫຼັງນໍ້າຫຼຸດ

0
42

ລັດຖະບານໄດ້ເນັ້ນໃຫ້ຄະນະຮັບຜິດຊອບແກ້ໄຂໄພພິບັດຢູ່ແຕ່ລະແຂວງສົມທົບກັບຄະນະກຳມະການປ້ອງກັນ ແລະ ຄວບຄຸມໄພພິ ບັດແຫ່ງຊາດສືບຕໍ່ຈັດຕັ້ງຊີ້ນຳຢ່າງໃກ້ຊິດການແກ້ໄຂ ແລະ ຊ່ວຍເຫຼືອປະຊາຊົນທີ່ຍັງຢູ່ທີ່ພັກຊົ່ວຄາວ ຮັບປະກັນໃຫ້ມີເຂົ້າກິນ ນໍ້າ ດື່ມ-ນໍ້າໃຊ້ສະອາດ ບໍ່ໃຫ້ເກີດພະຍາດລະບາດ ໃຫ້ມີຄວາມສະຫງົບ ໃຫ້ມີການຈັດຕັ້ງ-ມີຫົວໜ້າຄະນະເພື່ອຊີ້ນຳຢ່າງໃກ້ຊິດ ພ້ອມນີ້ ໃຫ້ສືບຕໍ່ປຸກລະດົມທົ່ວສັງຄົມເພື່ອສືບຕໍ່ຊ່ວຍເຫລືອປະຊາຊົນທີ່ໄດ້ຮັບຜົນກະທົບ.

ທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ ໂຄສົກລັດຖະບານໄດ້ຖະແຫຼງຂ່າວກ່ຽວກັບຜົນກອງປະຊຸມລັດຖະບານເພື່ອປຶກສາຫາລືການແກ້ໄຂໄພພິບັດນໍ້າຖ້ວມໃນທົ່ວປະເທດໃນປີ 2019 ຊຶ່ງໄດ້ຈັດຂຶ້ນເມື່ອວັນທີ 16 ກັນຍາ 2019 ທີ່ສໍານັກງານນາຍົກລັດຖະມົນຕີ ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ມີບັນດາຮອງນາຍົກລັດຖະມົນຕີ ສະມາຊິກລັດຖະບານເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້ ໄດ້ຮັບຟັງການລາຍງານ ແລະ ປະກອບຄໍາເຫັນກ່ຽວກັບຜົນກະທົບຈາກໄພພິບັດທີ່ເກີດຂຶ້ນໃນທົ່ວປະເທດໃນປີ 2019 ຈາກບັນດາຂະແໜງການທີ່ກ່ຽວຂ້ອງ ຊຶ່ງກອງປະຊຸມໄດ້ຕີລາຄາວ່າ ນັບຕັ້ງແຕ່ເດືອນມັງກອນຫາກັນຍາ 2019 ໄດ້ເກີດໄພພິບັດນໍ້າຖ້ວມ ລົມພະຍຸ ຟ້າຜ່າ ດິນເຈື່ອນ ໄຟໄໝ້ ແລະ ສັດຕູພືດທໍາລາຍຜົນລະປູກຢູ່ 13 ແຂວງຊຶ່ງປະກອບມີ ຜົ້ງສາລີ ອຸ ດົມໄຊ ຫຼວງພຣະບາງ ໄຊຍະບູລີ ຫົວພັນ ຊຽງຂວາງ ບໍລິຄຳໄຊ ຄຳມ່ວນ ສະຫວັນນະເຂດ ສາລະວັນ ເຊກອງ ຈຳປາສັກ ແລະ ແຂວງອັດຕະປື ອັນໄດ້ສົ່ງຜົນກະທົບໂດຍກົງຕໍ່ປະຊາຊົນໃນ 112 ເມືອງ 2.072 ບ້ານ 179.068 ຄອບຄົວ 579.299 ຄົນ ຍິງ 56.636 ຄົນ ເສຍຊີວິດ 28 ຄົນ ແລະ ສູນຫາຍ 7 ຄົນ.

ສະເພາະໄພພິບັດນໍ້າຖ້ວມທີ່ເກີດຂຶ້ນໃນທ້າຍເດືອນສິງຫາຫາຕົ້ນເດືອນກັນຍາ 2019 ລວມມີ 6 ແຂວງຄື ຄໍາມ່ວນ ສະຫວັນນະເຂດ ສາລະວັນ ເຊກອງ ຈໍາປາສັກ ແລະ ແຂວງອັດຕະປື ສົ່ງຜົນກະທົບໂດຍກົງຕໍ່ປະຊາຊົນໃນ 47 ເມືອງ 1.655 ບ້ານ 169.916 ຄອບຄົວ 546.099 ຄົນ ຍິງ 39.310 ຄົນ ເສຍຊີວິດ 18 ຄົນ (ແຂວງສະຫວັນນະເຂດ 3 ລາຍ ສາລະວັນ 3 ລາຍ  ອັດຕະປື 4 ລາຍ ແລະ ແຂວງຈໍາປາສັກ 8 ລາຍ ສູນຫາຍ 1 ຄົນ ແຂວງຈໍາປາສັກ) ປະຊາຊົນທີ່ຖືກຍົກຍ້າຍມີ 10.163 ຄອບຄົວ 39.506 ຄົນ ຍິງ 10.920 ຄົນ ຜົນກະທົບຈາກໄພນໍ້າຖ້ວມໃນປີ 2019 ມີສະພາບໜັກໜ່ວງ ໂດຍສະເພາະແມ່ນຢູ່ບັນດາແຂວງພາກກາງ ແລະ ພາກໃຕ້ຖ້ວມໜັກໃນຮອບ 40 ກວ່າປີ ຊຶ່ງເຮັດໃຫ້ມີຜົນກະທົບເປັນບໍລິເວນກວ້າງ ແລະ ເສຍຫາຍ ທາງດ້ານຊິວິດ ຊັບສິນ ພື້ນຖານໂຄງລ່າງ ແລະ ພື້ນຖານການຜະລິດຢ່າງໜັກໜ່ວງ ຕໍ່ໜ້າສະພາບການດັ່ງກ່າວລັດຖະບານກໍໄດ້ເອົາໃຈໃສ່ຊີ້ນໍາຢ່າງໃກ້ຊິດ ແລະ ບັນດາກະຊວງທີ່ກ່ຽວຂ້ອງ ກຳລັງ ປກຊ-ປກສ ບັນດາແຂວງ ແລະ ອົງການຊ່ວຍເຫຼືອສັງຄົມຫຼາຍພາກສ່ວນກໍໄດ້ສຸມທຸກກຳລັງແຮງ ພາຫະນະ ແລະ ວັດຖຸອຸປະກອນເຂົ້າໄປຊ່ວຍເຫຼືອປະຊາຊົນທີ່ໄດ້ຮັບຜົນກະທົບຢ່າງທັນການ ຊຶ່ງສາມາດຫຼຸດຜ່ອນຄວາມເສຍຫາຍທາງດ້ານຊີວິດ ແລະ ຊັບສິນໄດ້ດີສົມຄວນ ແຕ່ກໍຍັງມີອຸປະສັກຕ່າງໆນາໆກີດຂວາງອີກຫຼາຍປະ ການ.

ລັດຖະບານຍັງໄດ້ເນັ້ນໃຫ້ສຸມທຸກກຳລັງໂດຍສະເພາະທະຫານ ຕຳຫຼວດ ແລະ ທຸກພາກສ່ວນລວມທັງ ພາຫະນະ ລົດດັບເພີງ ເຮືອ ແລະ ອື່ນໆ ພ້ອມທັງມີການຈັດຕັ້ງຊີ້ນຳລະອຽດເພື່ອສຸມໃສ່ຊ່ວຍເຫຼືອປະຊາຊົນໃນການຍົກຍ້າຍຈາກທີ່ພັກຊົ່ວຄາວກັບຄືນໄປບ້ານ ເຮືອນຂອງຕົນ ພ້ອມທັງເອົາເຄື່ອງຂອງຊ່ວຍເຫຼືອທີ່ໄດ້ຮັບບໍລິຈາກໃຫ້ໄປຮອດໄປເຖິງປະຊາຊົນຢ່າງແທ້ຈິງ ພ້ອມດຽວກັນນີ້ ໃຫ້ແຕ່ລະຂະແໜງການ ແລະ ທ້ອງຖິ່ນສຸມໃສ່ວຽກງານແກ້ໄຂໄພພິບັດເປັນວຽກຈຸດໜັກ ສຳຄັນມີການວາງແຜນ ແລະ ມີຜູ້ຊີິ້ນຳໃນການຈັດຕັ້ງປະຕິບັດຕົວຈິງ ໃຫ້ຂະແໜງການ ແລະ ທ້ອງຖິ່ນກະກຽມຟື້ນຟູການຜະລິດພາຍຫຼັງນໍ້າລົງ ເພື່ອເຮັດໃຫ້ການຜະລິດເຂົ້າສູ່ສະພາບປົກກະຕິ ແນໃສ່ຮັບປະກັນດ້ານສະບຽງອາຫານ ໂດຍສະເພາະການຈັດສັນແນວພັນ ປັດໄຈການຜະລິດ ພາຫະນະການຜະລິດ ແລະ ອື່ນໆໃຫ້ທັນການ ໃຫ້ເອົາໃຈໃສ່ປັບປຸງພື້ນຖານໂຄງລ່າງ ໂດຍສະເພາະສ້ອມແປງເສັ້ນທາງໃຫ້ສາມາດໄປ-ມາໄດ້ ສ້ອມ ແປງໂຮງຮຽນ ໂຮງໝໍ ສຸກສາລາ ໃຫ້ສາມາດເປີດນຳໃຊ້ໄດ້ ໃຫ້ກະຊວງການເງິນຮີບຮ້ອນຄົ້ນຄວ້າ ແລະ ກະກຽມດ້ານງົບປະມານ ເພື່ອແກ້ໄຂໄພພິບັດດັ່ງກ່າວດ້ວຍການນຳໃຊ້ເງິນທີ່ມີ (ເງິນແຮ ເງິນສະສົມ ເງິນບໍລິຈາກ ແລະ ເງິນກອງທຶນຕ່າງໆຢູ່ກະຊວງແຮງ ງານ ແລະ ສະຫວັດດີການສັງຄົມ) ລວມທັງຄັງແຮເຂົ້າ ຄັງແຮນໍ້າມັນ ແລ້ວສະເໜີລັດຖະບານພິຈາລະນາຕົກລົງໂດຍໄວ ພ້ອມນີ້ ໃຫ້ປຸກລະດົມທົ່ວສັງຄົມປະກອບສ່ວນຊ່ວຍເຫຼືອຜູ້ປະສົບໄພຕື່ມ.

ນອກຈາກນີ້ ໃຫ້ສູນບັນຊາການແກ້ໄຂໄພພິບັດຢູ່ຂັ້ນສູນກາງ ແລະ ທ້ອງຖິ່ນ ມີການປະສານງານກັນວ່ອງໄວ ຄ່ອງຕົວ ສາມາດແກ້ໄຂບັນຫາໄດ້ຢ່າງທັນການ ໃຫ້ກຳລັງປ້ອງກັນຊາດ-ປ້ອງກັນຄວາມສະຫງົບສືບຕໍ່ເປັນກຳລັງຕົ້ນຕໍໃນການຊ່ວຍເຫຼືອປະຊາຊົນທີ່ໄດ້ຮັບຜົນກະທົບ ສຳລັບງົບປະມານໃນການເຄື່ອນໄຫວໃຫ້ຄົ້ນຄວ້າຂຶ້ນແຜນສະເໜີລັດຖະບານເພື່ອພິຈາລະນາຕົກລົງ ພ້ອມທັງໃຫ້ເອົາໃຈໃສ່ຄຸ້ມຄອງລາຄາສິນຄ້າ ອັດຕາແລກປ່ຽນ ອັດຕາເງິນເຟີ້ ແລະ ຕ້ອງເຮັດຢ່າງແທດຕົວຈິງ ໂດຍມີການລົງໄປຕິດຕາມກວດກາຕົວຈິງຢູ່ທ້ອງຖິ່ນຕ່າງໆ ໃຫ້ພາກສ່ວນກ່ຽວຂ້ອງຄົ້ນຄວ້າລະອຽດກ່ຽວກັບການຍົກເວັ້ນພາສີ-ອາກອນ ຫຼຸດອັດຕາຄ່າໄຟ ຟ້າ ນະໂຍບາຍດ້ານສິນເຊື່ອ ປັດໄຈການຜະລິດ ແລະ ອື່ນໆແລ້ວສະເໜີລັດຖະບານພິຈາລະນາຕົກລົງ ໃຫ້ກະຊວງຖະແຫຼງຂ່າວວັດທະນະທຳ ແລະ ທ່ອງທ່ຽວເອົາໃຈໃສ່ລົງຕິດຕາມ ແລະ ລາຍງານສະພາບຕົວຈິງ ການແກ້ໄຂບັນຫາໄພພິບັດໃນຄັ້ງນີ້ເພື່ອໃຫ້ສັງຄົມໄດ້ຮັບຊາບຂໍ້ມູນທີ່ຖືກຕ້ອງຢ່າງລະອຽດ ຈະແຈ້ງ ແລະ ທັນການ ທັງເປັນການປຸກລະດົມ ເຕົ້າໂຮມຄວາມສາມັກຄີທົ່ວສັງ ຄົມ ແລະ ສຶກສາອົບຮົມການເມືອງແນວຄິດໃຫ້ປະຊາຊົນ ພ້ອມກັນນັ້ນ ໃຫ້ເອົາໃຈໃສ່ຕິດຕາມ ແລະ ແກ້ໄຂການອອກຂ່າວທີ່ບໍ່ມີມູນຄວາມຈິງ ໃສ່ຮ້າຍປ້າຍສີ ແລະ ອື່ນໆຂອງບຸກຄົນ ສື່ສັງ ຄົມອອນລາຍຈຳນວນໜຶ່ງຢ່າງທັນການ ໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມສືບຕໍ່ຕິດຕາມ ແລະ ແຈ້ງເຕືອນສະພາບດິນຟ້າອາກາດໃນແຕ່ລະວັນ ພ້ອມທັງແນະນຳ ແລະ ໃຫ້ຄວາມຮູ້ແກ່ປະຊາຊົນເພື່ອກະກຽມ ແລະ ປ້ອງກັນ ໃຫ້ຄະ ນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດສົມທົບກັບຂະແໜງການ ແລະ ທ້ອງຖິ່ນເພື່ອແກ້ໄຂໄພພິບັດທົ່ວປະເທດ ໃນປີ 2019 ນີ້ໃຫ້ກັບຄືນສູ່ສະພາບປົກກະຕິໂດຍໄວ ສຳລັບຄະນະກຳມະການສະເພາະກິດແກ້ໄຂໄພພິບັດລະດັບຊາດແມ່ນໃຫ້ສຸມໃສ່ແກ້ໄຂບັນຫາຜົນກະທົບໄພພິບັດຢູ່ເມືອງສະໜາມໄຊ ແຂວງອັດ ຕະປື ສືບຕໍ່ຮຽກຮ້ອງທຸກພາກສ່ວນທົ່ວສັງຄົມໃຫ້ຮ່ວມແຮງ-ຮ່ວມໃຈກັນ ປຸກລະດົມການຊ່ວຍເຫຼືອ ການຮ່ວມມືທັງຈາກພາຍໃນ ແລະ ຕ່າງປະເທດ.

ໂອກາດດຽວກັນນີ້  ທ່ານ ນາງ ໃບຄຳ ຂັດຕິຍະ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນຜູ້ຕາ ໜ້າຄະນະກຳມະການຄຸ້ມຄອງໄພພິບັດໄດ້ກ່າວວ່າ ທາງຄະນະກຳມະການພວກເຮົາຈະໄດ້ແຕ່ງຕັ້ງທິມປະເມີນຜົນຄວາມຕ້ອງການຮີບດ່ວນເພື່ອເລັ່ງແກ້ໄຂໄພພິບັດໃນໄລຍະກາງ ແລະ ໄລຍະຍາວ ໃນໂອກາດນີ້ຂໍຮຽກຮ້ອງໃຫ້ປະຊາຊົນເອົາໃສ່ຕິດຕາມຂ່າວພະຍາ ກອນອາດຢ່າງເປັນປົກກະຕິ ເພື່ອຮັບກັນຄວາມປອດໄພທາງດ້ານຊີວິດ ແລະ ຊັບສິນ ນອກຈາກນີ້ ໃຫ້ມີສະຕິລະວັງຕົວໃນການຮັບຂໍ້ມູນ-ຂ່າວສານໂດຍເນັ້ນໃສ່ຂໍ້ມູນຈາກສື່ທາງການ.

 

 

 

ໂດຍ: ອິດສະຫຼະ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.