ເຕືອນ!! ໂລກຮ້ອນເຮັດໃຫ້ມະຫາສະໝຸດຂາດອົກຊີແຊນ

0
266

ນັກວິໄຈເປີດເຜີຍປະລິມານອົກຊີແຊນໃນທະເລຊຶ່ງຫຼຸດຕໍ່າລົງຍ້ອນການປ່ຽນແປງສະພາບພູມີອາກາດ, ບັນຫານີ້ກຳລັງເກີດຂຶ້ນກັບມະຫາສະໝຸດເມື່ອອົກຊີແຊນໃນທະເລກຳລັງຫຼຸດລົງເລື້ອຍໆ.

ຈາກເຫດພາວະໂລກຮ້ອນ ແລະ ການປົນເປື້ອນສານເຄມີຈາກພາກກະສິກຳ ແລະ ອຸດສາຫະກຳເນື່ອງຈາກກິດຈະກຳຂອງມະນຸດກຳລັງເຮັດໃຫ້ອົກຊີແຊນຫາຍໄປຈາກມະຫາສະໝຸດ ແລະ ຄຸກຄາມຊີວິດຂອງສັດທະເລຫຼາຍຊະນິດ ໂດຍສະເພາະສັດນໍ້າຂະໜາດໃຫຍ່ຊຶ່ງກຳລັງຂາດອາກາດຫາຍໃຈ.

ປັດຈຸບັນ ພື້ນທີ່ມະຫາສະໝຸດປະມານ 700 ແຫ່ງມີະລິມານອົກຊີແຊນຢູ່ໃນລະດັບຕໍ່າທີ່ເປັນອັນຕະລາຍເມື່ອທຽບກັບອີກ 45 ແຫ່ງໃນຊ່ວງທົດສະວັດ 1960 ຊຶ່ງນັກວິໄຈລະບຸວ່າ: ການສູນເສຍອົກຊີແຊນໃນທະເລຖືເປັນໄພຄຸກຄາມຕໍ່ສັດທະເລຫຼາຍສາຍພັນ, ໂດຍສະເພາະສັດທະເລຂະໜາດໃຫຍ່ເຊັ່ນ: ສະຫຼາມ, ປາທູນ້າ, ປາວານ ແລະ ອື່ນ.

ຂະນະທີ່ຮັກສາການຜູ້ອຳນວຍການຂອງສະຫະພາບລະຫວ່າງປະເທດເພື່ອການອະນຸຮັກທຳມະຊາດ (The International Union for the Conservation of Nature – IUCN) ຊຶ່ງໄດ້ກ່າວໃນກອງປະຊຸມ COP25 ວ່າ: ສຸຂະພາບຂອງມະຫາ ສະໝຸດຄວນເປັນຂໍ້ພິຈາລະນາທີ່ສຳຄັນໃນການປະຊຸມຄັ້ງນີ້, ເພາະວ່າອຸນຫະພູມນໍ້າທະເລທີ່ສູງຂຶ້ນເຮັດໃຫ້ອົກຊີແຊນຂາດແຄນຢ່າງໜັກ, ທັງຍັງສົ່ງຜົນໃຫ້ຄວາມສົມດຸນຂອງສັດນໍ້າເກີດຄວາມສັບສົນ.

ພາວະໂລກຮ້ອນເຮັດໃຫ້ອຸນຫະພູມຂອງນໍ້າທະເລສູງຂຶ້ນ ສົ່ງຜົນໃຫ້ປະລິມານອົກຊີແຊນ ຕໍ່າລົງ, ຊຶ່ງປັດຈຸບັນມະຫາສະໝຸດຈະສູນເສຍປະລິມານອົກຊີແຊນໄປອີກ 3-4% ພາຍໃນປີ 2100 ຫຼື ອີກປະມານ 81 ປີຂ້າງໜ້າ ແລະ ຈະເກີດຜົນກະທົບຕໍ່ລະດັບນໍ້າທະເລທີ່ 1.000 ແມັດຈາກຜິວໜ້ານໍ້າ, ຊຶ່ງເປັນລະດັບທີ່ມີຄວາມຫຼາກຫຼາຍທາງຊີວະພາບສູງສຸດ.

ທັງນີ້ ລະດັບອົກຊີແຊນທີ່ຫຼຸດຕໍ່າລົງຍັງເຮັດໃຫ້ປາຫຼາຍຊະນິດຕ້ອງອົບພະຍົບໄປຍັງຜິວນໍ້າ ແລະ ພື້ນທີ່ທະເລລະດັບຕື້ນ ຊຶ່ງຍິ່ງເພີ່ມຄວາມສ່ຽງຕໍ່ການຖືກລ່າ. ຂະນະດຽວກັນບາງພື້ນທີ່ຊຶ່ງມີລະດັບອົກຊີແຊນຕໍ່າກວ່າຈຸດອື່ນຢູ່ແລ້ວແຕ່ເມື່ອອົກຊີແຊນຫຼຸດລົງກໍອາດ ຈະເພີ່ມຄວາມເສຍຫາຍໃຫ້ເກີດຂຶ້ນກັບພື້ນທີ່ດັ່ງກ່າວໜັກກວ່າເກົ່າ.

ຕາມຂໍ້ມູນຂອງຄະນະກຳມະການລະຫວ່າງລັດບານວ່າດ້ວຍການປ່ຽນແປງສະພາບພູມີອາກາດ (Intergovernmental Panel on Climate Change – IPCC) ຊຶ່ງໄດ້ລາຍງານວ່າ: ທັງການເຮັດປະມົງເກີນຂະໜາດ, ຂີ້ເຫຍື້ອພລາສຕິກໃນທະເລຕ່າງກໍເປັນບັນຫາໃຫຍ່ສຳລັບມະຫາສະໝຸດທົ່ວໂລກ, ທັງນີ້ ທະເລມີສະພາບເປັນກົດຫຼາຍກວ່າໃນຊ່ວງກ່ອນຍຸກອຸດສາຫະກຳປະມານ 26% ເນື່ອງຈາກຖືກດຶດຊຶມແກ໊ສກາກບອນສ່ວນເກີນໃນຊັ້ນບັນຍາກາດ.

ຢ່າງໃດກໍດີ ເພື່ອຢຸດຢັ້ງການຂະຫຍາຍຕົວຂອງພື້ນທີ່ຊຶ່ງຂາດແຄນອົກຊີແຊນ, ເຮົາໆທ່ານໆຕ້ອງຄວບຄຸມການປ່ອຍແກ໊ສເຮືອນແກ້ວໃຫ້ເດັດຂາດເຊ່ັນດຽວກັບການຄວບຄຸມມົນລະພິດຈາກທາດອາຫານ (Nutrient pollution) ທີ່ມາຈາກການເຮັດກະສິກຳ ແລະ ແຫຼ່ງອື່ນໆ.

 

 

ຮຽບຮຽງ: ເພັງສະຫວັນ

ຮູບພາບ: mgronline

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.