ເຕືອນສະຕິ! ສິ່ງໃດຄວນໂພສ ແລະ ສິ່ງທີ່ບໍ່ຄວນຮຽນແບບໃນໂລກອອນລາຍ

0
9151

ທຸກວັນນີ້ເຮົາຈະເຫັນຫຼາຍໆຄົນໂພສ ຫຼື ແຊຣເລື່ອງລາວຕ່າງໆເທິງເຟສບຸ໊ກຂອງຕົນເອງ ເພາະຄິດວ່າມັນເປັນພື້ນທີ່ສ່ວນຕົວທີ່ເຮົາຢາກຈະຂຽນ, ຢາກຈະ​ໂພສ ຫຼື ແຊຣສິ່ງໃດລົງໄປກໍໄດ້, ແຕ່ຫຼາຍຄົນອາດລືມຄິດໄປວ່າ… ເລື່ອງບາງເລື່ອງທີ່ຢູ່ໃນເຟສບຸ໊ກຂອງເຮົາມັນອາດກັບມາສ້າງບັນຫາໃຫ້ເຮົາໃນພາຍຫຼັງ, ໂດຍສະເພາະແມ່ນເລື່ອງສ່ວນຕົວ, ເລື່ອງອາດຊະຍາກຳ,​ ເລື່ອງທີ່ກ່ຽວຂ້ອງກັບຄວາມຮຸນແຮງ, ລາມົກ-ອານາຈານ ແລະ ອື່ນໆ.

ສຳລັບຄົນທີ່ມັກຂຽນລະບາຍຄວາມທຸກ,​ ຄວາມໂສກເສົ້າ ຫຼື ຂຽນເພື່ອຕໍ່ວ່າຄົນອື່ນລົງເຟສບຸ໊ກ, ບາງຄັ້ງຄົນເຫຼົ່ານີ້ອາດຈະຮູ້ສຶກວ່ານີ້ເປັນພຽງຫົນທາງດຽວທີ່ຈະໄດ້ລະບາຍຄວາມອຶດອັດໃນໃຈອອກໄປ ແຕ່ຢາກໃຫ້ລອງຄິດທົບທວນໃຫ້ດີກ່ອນວ່າ: ຖ້າຂຽນລະບາຍກ່ຽວກັບເລື່ອງສ່ວນຕົວຂອງຕົນເອງລົງໄປແລ້ວຈະໄດ້ຮັບສິ່ງໃດກັບຄືນມາ? ເພາະສ່ວນຫຼາຍສິ່ງທີ່ໄດ້ກັບຄືນມາກໍມີແຕ່ດ້ານລົບທີ່ບໍ່ມີປະໂຫຍດ, ມັນບໍ່ໄດ້ຊ່ວຍໃຫ້ທ່ານຮູ້ສຶກດີຂຶ້ນ ແຕ່ກົງກັນຂ້າມຄົນທີ່ຊັງທ່ານເຂົາເຈົ້າອາດລໍຖ້າຈັງຫວະຊໍ້າເຕີມທ່ານຢູ່ກໍມີ.

ສ່ວນຄົນທີ່ມັກໂອ້ອວດຄວາມຮັ່ງມີ,​ ມັກໂຊສິ່ງຂອງມີຄ່າ ຫຼື ໃຊ້ຊີວິດຫຼູຫຼາຍິ່ງຕ້ອງລະວັງໃຫ້ຫຼາຍ ແລະ ທ່ານຈົ່ງຈຳໃຫ້ຂຶ້ນໃຈວ່າໃນໂລກອອນລາຍອາດມີຄົນຫຼາກຫຼາຍຮູບແບບ (ທັງດີ ແລະ ບໍ່ດີ), ຫຼາຍໆຄັ້ງກໍປາກົດມີກໍລະນີຮ້າຍຕ່າງໆໃຫ້ເຫັນຢູ່ເລື້ອຍໆ ຍົກຕົວ ຢ່າງ:​ ໂຈນຂຶ້ນເຮືອນລັກເອົາຊັບສິນ, ​ເງິນຄຳ ເນື່ອງຈາກກຸ່ມຄົນບໍ່ດີເຫັນເຈົ້າຂອງຊັບໂພສໂອ້ອວດຄວາມຮັ່ງມີ.

ສ່ວນກໍລະນີຄົນທີ່ໂພສກ່ຽວກັບເລື່ອງຄວາມຮຸນແຮງຕີກັນ-ຂ້າກັນ ຫຼື ປະຈານ, ການວິຈານ ແລະ ບາງຄົນອາດໂພສຂໍ້ຄວາມທີ່ກ່ຽວຂ້ອງກັບການໝິ່ນປະໝາດ, ທຳລາຍຄວາມໝັ້ນຄົງຂອງຊາດ. ບຸກຄົນໃດທີ່ໂພສ ຫຼື ຂຽນກ່ຽວກັບຫົວຂໍ້ປະເພດນີ້ແມ່ນຕ້ອງລະວັງໃຫ້ດີເພາະທ່ານອາດໄດ້ຮັບໂທດທາງກົດໝາຍ.

ດັ່ງນັ້ນ ​ກ່ອນທີ່ທ່ານຈະໂພສ ຫຼື ຂຽນສິ່ງໃດລົງໃນໂລກອອນລາຍກໍຕ້ອງມີສະຕິ, ຄິດທົບທວນໃຫ້ດີ ບໍ່ວ່າຈະເປັນເລື່ອງສ່ວນຕົວ, ເລື່ອງຄອບຄົວ, ເລື່ອງຄວາມຮັກ, ເລື່ອງຊູ້ສາວ, ຜິດຖຽງກັນ ແລະ ອື່ນໆທີ່ຈະສ້າງຄວາມແຕກແຍກ ແລະ ສ້າງຄວາມເສື່ອມເສຍທັງຕໍ່ຕົນເອງ, ຄອບຄົວ,​ ບຸກຄົນອື່ນ, ປະເທດຊາດ ແລະ ອື່ນໆ.

ນີ້ແມ່ນໜຶ່ງກໍລະນີທີ່ເກີດຂຶ້ນໃນສັງຄົມທົ່ວໂລກ, ຍົກຕົວຢ່າງກໍລະນີຜົວໄປມີເມຍນ້ອຍກໍຕ້ອງດຳເນີນໄປຕາມຂັ້ນຕອນຕາມລະ ບຽບກົດໝາຍ, ທ່ານບໍ່ຄວນໃຫ້ອາລົມຢູ່ເໜືອເຫດຜົນແລ້ວໄປທຳຮ້າຍຮ່າງກາຍ ແລະ ຖ່າຍຄລິບປະຈານຄູ່ກໍລະນີ (ຕາມທີ່ເປັນຂ່າວ) ເພາະນອກຈາກຈະບໍ່ຊ່ວຍໃຫ້ສະຖານະການດີຂຶ້ນ ມັນອາດກາຍເປັນຫຼັກຖານຮັດຕົວທີ່ສະແດງໃຫ້ຮູ້ວ່າໃຜຖືກ-ໃຜຜິດ ແລ້ວທ່ານຄິດວ່າສັງຄົມກໍຄືຄົນໃນໂລກອອນລາຍຈະຄິດວ່າທ່ານເປັນຄົນດີ ຫຼື ບໍ່?.

ສຳລັບຜູ້ທີ່ອ່ານຂ່າວ ຫຼື ເຫັນສິ່ງຕ່າງໆຜ່ານເຟສບຸ໊ກກໍຄວນຄິດ ຫຼື ກວດສອບໃຫ້ແນ່ໃຈກ່ອນວ່າສິ່ງນັ້ນຄວນເຊື່ອໄດ້ ຫຼື ບໍ່ກ່ອນທີ່ຈະແຊຣ ຫຼື ສະແດງຄວາມຄິດເຫັນ, ເພາະບາງປະເດັນມັນອາດສົ່ງຜົນກະທົບດ້ານລົບໃຫ້ທ່ານ ແລະ ບາງສິ່ງບາງຢ່າງທີ່ທ່ານໄດ້ເບິ່ງແລະ ໄດ້ອ່ານມັນອາດສົ່ງຜົນຕໍ່ແນວຄິດຈິດໃຈຂອງທ່ານຈົນເຖິງຂັ້ນເຮັດໃຫ້ເກີດພຶດຕິກຳຮຽນແບບທີ່ບໍ່ເໝາະສົມແບບທີ່ທ່ານຮູ້ຕົວ ແລະ ແບບທີ່ບໍ່ຮູ້ຕົວ.

ບົດໂດຍ:​ ພຸດສະດີ ລາວລີ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.