ເຈົ້າຊາຍແຮຣີ-ເມແກນ ປະກາດຫັນຫຼັງໃຫ້ຣາຊະວົງຊັ້ນສູງຂອງອັງກິດ!!

0
3739

ຈາກກໍລະນີທີ່ເຈົ້າຊາຍແຮຣີ ແລະ ເມແກນ ດະຢຸກ ແລະ ດັຊເຊສແຫ່ງຊັສເຊັກສ ຊົງປະກາດຖອນຕົວຈາກການເປັນສະມາຊິກຊັ້ນສູງຂອງຣາຊະວົງ, ໂດຍເຈົ້າຊາຍຈະເຮັດວຽກຫາລ້ຽງພຣະອົງເອງເພື່ອໃຫ້ມີອິດສະຫຼະພາບທາງການເງິນ ແລະ ຊົງຕັ້ງໃຈຈະແບ່ງເວ ລາຢູ່ໃນອັງກິດ ແລະ ອາເມຣິກາເໜືອ, ຂະນະທີ່ພຣະຣາຊະວັງບັກກິງແຮມກໍສະແດງທ່າທີບໍ່ເຫັນດີ ແລະ ເບິ່ງວ່າເລື່ອງນີ້ຍັງເປັນເລື່ອງທີ່ຊັບຊ້ອນ.

ຢ່າງໃດກໍຕາມ ກ່ຽວກັບປະເດັນດັ່ງກ່າວເວັບໄຊຂ່າວເດລີເມລໄດ້ເປີດເຜີຍໃນວັນທີ 8 ມັງກອນ 2020 ວ່າ: ຫຼັງຈາກນີ້ເມື່ອດະຢຸກ ແລະ ດັຊເຊສແຫ່ງຊັສເຊັກສຊົງປະກາດຖອນຕົວຈາກການເປັນສະມາຊິກຊັ້ນສູງຂອງຣາຊະວົງ, ທັງສອງພຣະອົງຈະບໍ່ຫຍຸ້ງກ່ຽວກັບກອງທຶນ (ເງິນອຸປະຖຳ) ຂອງຣາຊະວົງໃນສ່ວນຂອງພຣະອົງຊຶ່ງມີປະມານ 5,5 ລ້ານປອນ.

ທັງນີ້ ເຈົ້າຊາຍແຮຣີ ແລະ ເມແກນ ຈະຍັງຄົງຢູ່ໃນພຣະຕຳໜັກຟຣ໋ອກມໍຣ ຄອຕເທຈ(Frogmore Cottage)  ໃກ້ກັບພຣະຣາຊະວັງວິນເຊີຣ ຊຶ່ງສົມເດັດພຣະຣາຊິນີນາດເອລິຊາເບດທີ 2 ພຣະຣາຊະທານໃຫ້ເຈົ້າຊາຍແຮຣີ ແລະ ພຣະຊາຍາເປັນຂອງຂວັນ ແລະ ຈະຍັງຄົງເປັນຊັບສິນຂອງທັງສອງພຣະອົງຕໍ່ໄປ, ໂດຍລາຍງານຂອງບີບີຊີເປີດເຜີຍອີກວ່າ: ພຣະຕຳໜັກແຫ່ງນີ້ໄດ້ໃຊ້ເງິນພາສີຈາກປະຊາຊົນປະມານ 2,4 ລ້ານປອນໃນການປັບປຸງ ພຣະຕຳໜັກເມື່ອປີຜ່ານມາ, ກ່ອນທີ່ທັງສອງພຣະອົງຈະຍ້າຍເຂົ້າມາເມື່ອປະມານເດືອນເມສາ 2019.

ນອກຈາກນີ້ ລາຍງານຂ່າວຍັງລະບຸອີກວ່າ: ເຖິງແມ່ນວ່າເຈົ້າຊາຍແຮຣີ ແລະ ເມແກນຈະຍັງມີຄວາມປາຖະໜາທີ່ຈະແບ່ງເວລາລະ ຫວ່າງຢູ່ໃນອັງກິດ ແລະ ອາເມຣິກາເໜືອ ແຕ່ທັງສອງພຣະອົງກໍຍັງຊົງມີສິດຢູ່ໃນການຄຸ້ມຄອງຄວາມປອດໄພຂອງອັງກິດ, ໂດຍດະຢຸກ ແລະ ດັຊເຊສແຫ່ງຊັສເຊັກສຊົງໄດ້ຮັບການຄຸ້ມຄອງໃນລະດັບສາກົນ ລວມທັງໄດ້ຮັບການຄຸ້ມຄອງໂດຍເຈົ້າໜ້າທີ່ຕຳຫຼວດນະ ຄອນບານລອນດອນທີ່ຊາວອັງກິດຕ້ອງຈ່າຍພາສີໃຫ້ສ່ວນນີ້ປີລະ 600.000 ປອນ.

ສຳລັບເຈົ້າຊາຍແຮຣີ ແລະ ເມແກນ ຊົງມີມູນຄ່າຊັບສິນລວມກັນຢູ່ທີ່ປະມານ 34 ລ້ານປອນ, ສ່ວນຂອງເຈົ້າຊາຍແຮຣີ 30 ລ້ານປອນ ແລະ ຂອງເມແກນ 4 ລ້ານປອນ, ໂດຍເງິນທີ່ເຈົ້າຊາຍແຮຣີໄດ້ຮັບພຣະຣາຊະທານຈາກສົມເດັດພຣະຣາຊິນີນາດຈຳນວນ 2 ລ້ານປອນ. ນອກຈາກນີ້ ສົມເດັດພຣະຣາຊິນີນາດຍັງຊົງຈ່າຍເງິນໃຫ້ເຈົ້າຊາຍແຮຣີ ແລະ ເຈົ້າຊາຍວິລລຽມຮ່ວມກັນ 5 ລ້ານປອນ, ຊຶ່ງມາຈາກເງິນປີສ່ວນພຣະມະຫາກະສັດ(Sovereign Grant)  ທີ່ເປັນພາສີຈາກປະຊາຊົນມອບໃຫ້ສະມາຊິກຊັ້ນສູງຂອງຣາຊະວົງປະມານປີລະ 82 ລ້ານປອນ.

ຢ່າງໃດກໍຕາມ ເມື່ອດະຢຸກ ແລະ ດັຊເຊສແຫ່ງຊັສເຊັກສຊົງປະກາດຖອນຕົວຈາກການເປັນສະມາຊິກຊັ້ນສູງຂອງຣາຊະວົງ, ທັງ ສອງພຣະອົງກໍຈະບໍ່ໄດ້ຮັບເງິນໃນສ່ວນດັ່ງກ່າວ ຊຶ່ງສະເລ່ຍ 5% ຂອງຄ່າໃຊ້ຈ່າຍທັງໝົດຂອງທັງສອງພຣະອົງ ຊຶ່ງຈະໃຊ້ສະເພາະໃນການປະກອບພຣະຣາຊະກໍລະນີຍະກິດເປັນທາງການຂອງຣາຊະວົງເທົ່ານັ້ນ.

 

ຮຽບຮຽງ: ເພັງສະຫວັນ

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.