ເກີດແຜ່ນດິນໄຫວລະດັບ 5,4 ຢູ່ເຂດພາກໃຕ້ຂອງຝຣັ່ງ..

0
43

ສຳນັກງານເຝົ້າລະວັງແຜ່ນດິນໄຫວແຫ່ງຊາດຝຣັ່ງ (ReNaSS) ລະບຸວ່າ: ເກີດເຫດແຜ່ນດິນໄຫວຮຸນແຮງໃນພາກໃຕ້ຂອງຝຣັ່ງ, ສ້າງຄວາມເສຍຫາຍໃຫ້ອາຄານບ້ານເຮືອນຫຼາຍແຫ່ງເສຍຫາຍ, ມີຄົນໄດ້ຮັບບາດເຈັບຢ່າງໜ້ອຍ 4 ຄົນ ແລະ 1 ໃນນັ້ນອາການສາຫັດ. ໂດຍແຮງສັ່ນສະເທື່ອນທີ່ວັດແທກໄດ້ຢູ່ໃນລະດັບ 5,4 ແມັກນີຈູດ, ເຫດການດັ່ງກ່າວເກີດຂຶ້ນໃນຊ່ວງເວລາປະ ມານ 11:51 ໂມງ (ຕາມເວລາທ້ອງຖິ່ນ) ຂອງວັນທີ 11 ພະຈິກຜ່ານມາ. ໂດຍຈຸດສູນກາງຂອງແຜ່ນດິນໄຫວເລິກພຽງ 2 ກີໂລແມັດໃກ້ກັບເມືອງມົງເຕລິມາຣໃນແຂວງໂດຣມ, ທັງນີ້ ແຮງສັນສະເທືອນຢູ່ໃນໄລຍະ 10 ວິນາທີ.

ຂະນະທີ່ເມືອງມົງເຕລິມາຣແຜ່ນດິນໄຫວເຮັດໃຫ້ຄົນງານລາຍໜຶ່ງໄດ້ຮັບບາດເຈັບສາຫັດ, ສ່ວນຢູ່ເມືອງເຕລ ແຂວງອາຣແດຊ ຊຶ່ງຢູ່ໃກ້ກັນກໍໄດ້ຮັບຜົນກະທົບໜັກສົມຄວນ, ໃນນັ້ນ ຫໍລະຄັງຂອງໂບດ 2 ແຫ່ງຢູ່ໃນສະພາບສ່ຽງພັງຖະຫຼົ່ມ, ອາຄານບ້ານເຮືອນຫຼາຍກວ່າ 200 ຫຼັງໄດ້ຮັບຄວາມເສຍຫາຍໜັກ, ສົ່ງຜົນໃຫ້ທາງການສັ່ງອົບພະຍົບປະຊາຊົນເພື່ອກວດສອບຄວາມປອດໄພຢ່າງຮີບດ່ວນ.

ສ່ວນເຈົ້າໜ້າທີ່ກໍໄດ້ລະບຸວ່າ: ໂຊກຍັງດີທີ່ໂຮງໄຟຟ້ານິວເຄລຍທຣິຄາສແຕງຊຶ່ງຕັ້ງຢູ່ຫ່າງຈາກເມືອງມົງເຕລິມາຣປະມານ 30 ກີ ໂລແມັດບໍ່ໄດ້ຮັບຄວາມເສຍຫາຍຈາກເຫດແຜ່ນດິນໄຫວໃນຄັ້ງນີ້. ທັງນີ້ ແຜ່ນດິນໄຫວແມ່ນເກີດຂຶ້ນເປັນປົກກະຕິໃນພູມີພາກດັ່ງກ່າວຂອງຝຣັ່ງ ແຕ່ຄັ້ງເຫດການຄັ້ງຫຼ້າສຸດນີ້ຖືວ່າເປັນແຜ່ນດິນໄຫວທີ່ມີຄວາມຮຸນແຮງທີ່ບໍ່ນອກເໜືອຈາກການຄາດຄະເນຂອງສຳນັກສຳຫຼວດທໍລະນີວິທະຍາແຫ່ງຊາດຂອງອາເມຣິກາ (USGS)  ທີ່ເຄີຍລະບຸໄວ້ກ່ອນໜ້ານີ້ວ່າ: ຄວາມຮຸນແຮງຂອງແຜ່ນດິນ ໄຫວໃນຄັ້ງນີ້ແມ່ນຢູ່ທີ່ລະດັບ 4,8.

 

ຮຽບຮຽງ: ເພັງສະຫວັນ

ຮູບພາບ: thairath

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.