ເກີດເຫດໄຟໄໝ້ປ່າອາເມຊອນໃນບຣາຊິນຄັ້ງຮ້າຍແຮງ

0
39

ສະຖາບັນວິໄຈອະວະກາດແຫ່ງຊາດຂອງບຣາຊິນ (INPE) ເປີດເຜີຍໂຕເລກທີ່ໜ້າຕົກໃຈວ່າ ນັບແຕ່ເດືອນມັງກອນ-ສິງຫາເກີດເຫດໄຟປ່າໃນແຖບອາເມຊອນຫຼາຍກວ່າ 72.843 ຄັ້ງ ເພີ່ມຂຶ້ນ 83% ຈາກໄລຍະດຽວກັນຂອງປີ 2018 ນັບວ່າເປັນໂຕເລກທີ່ສູງທີ່ສຸດນັບແຕ່ມີການບັນທຶກສະຖິຕິເມື່ອ 6 ປີກ່ອນ.

ຂະນະທີ່ພາບຖ່າຍທາງດາວທຽມຂອງອົງການນາຊາເຜີຍໃຫ້ເຫັນກຸ່ມຄວັນໄຟຂະໜາດໃຫຍ່ປົກຄຸມລັດໂຣໄຣມາ ທາງຕອນເໜືອສຸດຂອງບຣາຊິນ ພ້ອມນີ້ ກະແສລົມກໍໄດ້ພັດຄວັນໄຟປ່າຈາກລັດອາມາໂຊນາສ ແລະ ຣອນໂດເນຍ ມາຮອດເມືອງເຊົາເປົາໂລ ຊຶ່ງຢູ່ຫ່າງປະມານ 2.700 ກີໂລແມັດ ເຮັດໃຫ້ທ້ອງຟ້າໃນເຂດເມືອງເຊົາເປົາໂລຖືກປົກຄຸມດ້ວຍຄວັນໄຟປ່າເປັນເວລາ 1 ຊົ່ວໂມງ ຈົນເກີດກະແສແຮັສແທັກ (#PrayforAmazonia) ຕິດອັນດັບຍອດນິຍົມໃນໂຊຊຽວມີເດຍ.

ເບື້ອງຕົ້ນທາງການບຣາຊິນຍັງບໍ່ຮູ້ເຖິງຕົ້ນເຫດຂອງໄຟປ່າໃນຄັ້ງນີ້ ຂະນະທີ່ປະທານາທິບໍດີ ຊາອີຣ ໂບລໂຊນາຣູ ອ້າງວ່າເກີດຈາກການເຜົາປ່າເພື່ອເຮັດໄຮ່ ທັງນີ້ ການເພີ່ມຂຶ້ນຂອງໄຟປ່າອາເມຊອນເກີດຂຶ້ນທ່າມກາງການວິພາກວິຈານນະກ່ຽວກັບນະໂຍບາຍດ້ານສິ່ງແວດລ້ອມຂອງປະທານາທິບໍດີ ໂບລໂຊນາຣູ ໂດຍນັກວິທະຍາສາດກ່າວວ່າ ພື້ນທີ່ປ່າອາເມຊອນຫາຍໄປຢ່າງໄວວານັບແຕ່ ໂບລໂຊນາຣູ ຂຶ້ນຮັບຕຳແໜ່ງເມື່ອຕົ້ນປີຜ່ານມາ ເນື່ອງຈາກຜູ້ນຳຄົນປັດຈຸບັນເນັ້ນນະໂຍບາຍການພັດທະນາຫຼາຍກວ່າການອະນຸຮັກສິ່ງແວດລ້ອມ ທັງຍັງສະໜັບສະໜູນໃຫ້ຊາວກະສິກຳຕັດໄມ້ທຳລາຍປ່າເພື່ອເຮັດໄຮ່ ຊຶ່ງຜູ້ນຳກ່ອນໜ້ານີ້ພະຍາຍາມຫຼຸດການຕັດໄມ້ທຳລາຍປ່າໂດຍການຮ່ວມມືກັບເຈົ້າໜ້າທີ່ທ້ອງຖິ່ນ ແລະ ການປັບໄໝຜູ້ທີ່ລະເມີດຄຳສັ່ງ.

ມະນຸດເຮັດໃຫ້ໄຟປ່າທະວີຄວາມຮຸນແຮງຂຶ້ນໃນລະບົບນິເວດທົ່ວໄປ ຂະນະທີ່ໄຟປ່າກໍຖືເປັນເຫດການທຳມະຊາດ ແລະ ຈຳເປັນສຳ ລັບປ່າ ບໍ່ວ່າຈະເປັນການຊ່ວຍກຳຈັດກິ່ງໄມ້ທີ່ຕາຍແລ້ວ ການຄືນສານອາຫານລົງສູ່ດິນ ຫຼື ຊ່ວຍໃຫ້ພືດພັນແຕກໜໍ່ອອກແໜງ ແຕ່ໃນຊ່ວງໄລຍະບໍ່ເທົ່າໃດປີຜ່ານມານີ້ມະນຸດເຮັດໃຫ້ຄວາມເສຍຫາຍຈາກໄຟປ່າຮຸນແຮງຂຶ້ນ ການຢຸດຢັ້ງໄຟປ່າເຮັດໃຫ້ກິ່ງໄມ້ໃບຫຍ້າແຫ້ງຕາຍສະສົມເພີ່ມຂຶ້ນ ກິດຈະກຳຕ່າງໆຂອງມະນຸດເຮັດໃຫ້ສະພາບອາກາດປ່ຽນແປງ ສົ່ງຜົນໃຫ້ພືໜທີ່ປ່າສະສົມຄວາມຮ້ອນ ແລະ ແຫ້ງແລ້ງຂຶ້ນເລື້ອຍໆຊຶ່ງທັງໝົດນີ້ລ້ວນເປັນເຊື້ອເພີງທີ່ດີທີ່ສຸດ.

ປັດຈຸບັນ ປ່າໄມ້ໃນບຣາຊິນຫາຍໄປແລ້ວປະມານ 15% ແລະ ນັກວິທະຍາສາດຍັງວິຕົກກັງວົນວ່າ ຫາກປ່າຫາຍໄປເຖິງ 25% ປ່າຝົນທີ່ໃຫຍ່ທີ່ສຸດຂອງໂລກຜືນນີ້ຈະບໍ່ມີປ່າໄມ້ສ້າງວັດທະຈັກຂອງນ້ຳ ແລະ ໃນທີ່ສຸດປ່າທີ່ເຄີຍໜາແໜ້ນກໍຈະກາຍເປັນທົ່ງຫຍ້າສະວັນສາຮ້ອນໆ ແລະ ການປ່ຽນແປງນີ້ຈະສົ່ງຜົນກະທົບໄປທົ່ວໂລກ ເນື່ອງຈາກປ່າອະເມຊອນເປັນແຫຼ່ງຜະລິດແກ໊ສອົກຊີແຊນແຫຼ່ງໃຫຍ່ ທັງຍັງຊ່ວຍດູດຊຶມ ແລະ ເກັບກັກແກ໊ສກາກບອນຊຶ່ງເປັນແກ໊ສເຮືອນແກ້ວໜຶ່ງໃນໂຕການຂອງພາວະໂລກຮ້ອນ.

 

 

 

ຮຽບຮຽງ: ພ.ສະຫວັນ

ຮູບພາບ: posttoday

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.