ເກີດເຫດໄຟໄໝ້ທີ່ເມືອງສຸຣັຕຂອງອິນເດຍ ມີນັກຮຽນເສຍຊີວິດ 19 ລາຍ

0
95

ມີເດັກນັກຮຽນໄວລຸ້ນເສຍຊີວິດ 19 ລາຍໃນເຫດການໄຟໄໝ້ໂຮງຮຽນສອນພິເສດຊຶ່ງເປັນອາຄານ 4 ຊັ້ນທີ່ເມືອງສຸຣັຕ ທາງຕາເວັນອອກຂອງອິນເດຍ ເຫດການດັ່ງກ່າວເກີດຂຶ້ນເມື່ອວັນທີ 25 ພຶດສະພາ 2019.

ຂະນະທີ່ເຈົ້າໜ້າທີ່ຕຳຫຼວດໃນລັດຄຸຊຣາຕໄດ້ເປີດເຜີຍວ່າ ພົບຜູ້ເສຍຊີວິດເປັນເດັກນັກຮຽນໄວລຸ້ນຈຳນວນ 19 ລາຍ ແລະ ຍັງມີຜູ້ທີ່ໄດ້ຮັບບາດເຈັບຈາກໄຟລວກ ແລະ ສູດດົມຄວັນພິດອີກຫຼາຍກວ່າ 10 ຄົນ ຊຶ່ງອາຄານດັ່ງກ່າວແມ່ນເປັນອາຄານສອນພິເສດສຳລັບນັກຮຽນທີ່ກຽມຄວາມພ້ອມກ່ອນສອບເສັງ.

ລາຍງານຂ່າວດຽວກັນລະບຸຕື່ມວ່າ ເດັກນັກຮຽນທີ່ເສຍຊີວິດສ່ວນໃຫຍ່ແມ່ນຍ້ອນຕິດຢູ່ໃນຊາກອາຄານ ແລະ ບໍ່ສາມາດໜີອອກມາໄດ້ເພາະໄຟໄໝ້ຂັ້ນໄດທາງລົງ ຂະນະທີ່ມີນັກຮຽນ 3-4 ຄົນທີ່ເສຍຊີວິດຍ້ອນໂດດລົງມາຈາກຕຶກ ທັງນີ້ ເຈົ້າໜ້າທີ່ໄດ້ໃຊ້ລົດດັບເພີງຫຼາຍກວ່າ 20 ຄັນໃນການຄວບຄຸມເພີງ ຊຶ່ງຕົ້ນເພີງແມ່ນເກີດຈາກຊັ້ນ 3 ແລະ ຊັ້ນ 4.

ສ່ວນທ່ານ ນະເຣນທຣາ ໂມດີ ນາຍົກລັດຖະມົນຕີຂອງອິນເດຍກໍໄດ້ກ່າວສະແດງຄວາມເສຍໃຈຕໍ່ກັບເຫດການທີ່ເກີດຂຶ້ນ ພ້ອມສັ່ງໃຫ້ລັດຖະບານ ແລະ ເຈົ້າໜ້າທີ່ໃຫ້ການຊ່ວຍເຫຼືອທຸກຢ່າງທີ່ຈຳເປັນຕໍ່ຜົນກະທົບທີ່ເກີດຂຶ້ນ ຊຶ່ງເຫດການໄຟໄໝ້ໃນປະເທດອິນເດຍຖືເປັນເລື່ອງປົກກະຕິທີ່ເກີດຂຶ້ນເປັນປະຈຳເນື່ອງຈາກວ່າລະບົບຮັກສາຄວາມປອດໄພຍັງບໍ່ໄດ້ມາດຕະຖານ.

 

 

ຮຽບຮຽງ: ສະຫະລັດ ວອນທິວົງໄຊ

ຮູບພາບ: AP

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.