ເກີດອຸບັດເຫດເຮລິຄ໋ອບແຕຂອງກອງທັບຝຣັ່ງຕຳກັນກາງອາກາດ?

0
3371

ເຮລິຄ໋ອບແຕ 2 ລຳຂອງກອງທັບຝຣັ່ງຕຳກັນເອງກາງອາກາດຂະນະທີ່ປະຕິບັດການກວດລ້າງກຸ່ມກໍ່ການຮ້າຍໃນປະເທດມາລີ ທາງພາກຕາເວັນຕົກສຽງເໜືອຂອງທະວີບອາຟຣິກາ, ເຫດການດັ່ງກ່າວເກີດຂຶ້ນໃນຄໍ່າຄືນຂອງວັນທີ 25 ພະຈິກຜ່ານມາ.

ສຳນັກຂ່າວຕ່າງປະເທດລາຍງານເມື່ອວັນທີ 26 ພະຈິກຜ່ານມາວ່າ: ອຸບັດເຫດດັ່ງກ່າວເກີດຂຶ້ນໃນຄໍ່າຄືນຂອງວັນທີ 25 ພະຈິກ ເມື່ອເຮລິຄ໋ອບແຕໂຈມຕີລຸ້ນໄທເກີ້ ແລະ ເຮລິຄ໋ອບແຕຂົນສົ່ງລຸ້ນຄູກາຣຂອງກອງທັບຝຣັ່ງຕຳກັນກາງອາກາດໃນລະດັບຕໍ່າຂະນະບິນ ໃຫ້ການສະໜັບສະໜູນການປະຕິບັດການຂອງທະຫານຝຣັ່ງພາກພື້ນດິນທີ່ກຳລັງກວດລ້າງ ແລະ ໄລ່ລ່າກຸ່ມກໍ່ການຮ້າຍທີ່ຫຼົບ ໜີຕາມພາກພື້ນດິນໃນເຂດລິບຕາໂກທາງພາກເໜືອຂອງປະເທດມາລີ, ໃກ້ເຂດແດນບູກິນາຟາໂຊ ແລະ ໄນເຈີຣ. ເຫດການດັ່ງກ່າວເຮັດໃຫ້ເຮລິຄ໋ອບແຕທັງ 2 ລຳຕົກລົງກະແທກພື້ນດິນ, ເຮັດໃຫ້ທະຫານຂອງກອງທັບຝຣັ່ງເສຍຊີວິດ 13 ລາຍ.

ຝຣັ່ງເລີ່ມສົ່ງທະຫານເຂົ້າແຊກແຊງໃນມາລີເມື່ອປີ 2012 ເພື່ອຊ່ວຍເຫຼືອໜ່ວຍຄວາມໝັ້ນຄົງທ້ອງຖິ່ນຕໍ່ສູ້ກັບກຸ່ມກໍ່ການຮ້າຍ, ແນວຮ່ວມຂອງກຸ່ມ “ອັລ-ກໍອິດະ” ແລະ ກຸ່ມ “ໄອເອສ”, ປັດຈຸບັນ “ກອງກຳລັງບາຣເຄນ” ຂອງຝຣັ່ງມີທະຫານ 4.500 ຄົນທີ່ຊ່ວຍຕໍ່ສູ້ກັບກຸ່ມກໍ່ການຮ້າຍທົ່ວພູມີພາກຊາເຮລ ຊຶ່ງຄວບຄຸມພື້ນທີ່ເບື້ອງເທິງທັງໝົດຂອງທະວີບອາຟຣິກາ.

ທັງນີ້, ນັບແຕ່ປີ 2012 ທະຫານຝຣັ່ງເສຍຊີວິດຈາກປະຕິບັດການໃນພູມີພາກຊາເຮລແລ້ວຢ່າງໜ້ອຍ 44 ລາຍ.

 

ຮຽບຮຽງ: ເພັງສະຫວັນ

ຮູບພາບ: dailynews

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.