ຮ້ານຄ້າຊື່ດັງໃນອາເມຣິກາຍົກເລີກຂາຍລູກປືນ

0
102

ວອລມາດຮ້ານຄ້າຂາຍຍ່ອຍຍັກໃຫຍ່ໃນອາເມຣິກາອອກມາປະກາດຍົກເລີກຈຳໜ່າຍລູກປືນແບບພົກພາ ແລະ ປືນໄຣເຟິລລຳກ້ອງສັ້ນຢ່າງເປັນທາງການເນື່ອງຈາກເກີດກໍລະນີຄາຕະກຳໃນອາເມຣິກາຫຼາຍຄັ້ງ ຊຶ່ງລວມທັງວອລມາດໃນລັດເທັກຊັສຊຶ່ງມີຜູ້ເສຍຊີວິດເຖິງ 22 ລາຍ.

ຂະນະທີ່ CEO ຂອງວອລມາດກ່າວໃນຖະແຫຼງການທີ່ສົ່ງເຖິງພະນັກງານຂອງບໍລິສັດ ລວມທັງໄດ້ຖືກເຜີຍແຜ່ຜ່ານທາງເວັບໄຊຂອງບໍລິສັດໂດຍມີເນື້ອໃນລະບຸຊັດເຈນວ່າ ສະພາບທີ່ເປັນຢູ່ໃນປັດຈຸບັນຂອງອາວຸດປືນເປັນສິ່ງທີ່ຮັບບໍ່ໄດ້ ດັ່ງນັ້ນ ວອລມາດຈະຢຸດຕິຈຳໜ່າຍລູກປືນແບບພົກພາ ແລະ ປືນລຸ້ນໄຣເຟິລລຳກ້ອງສັ້ນ ຊຶ່ງນິຍົມນຳໃຊ້ໃນການລ່າສັດແຕ່ມີລັກສະນະຄ້າຍຄືປືນຂອງທະ ຫານ ພ້ອມນີ້ ກໍຈະຢຸດຂາຍປືນພົກພາໃນສາຂາຢູ່ລັດອາລາສກາຊຶ່ງເປັນລັດດຽວໃນອາເມຣິກາທີ່ວອລມາດຍັງຂາຍປືນຊະນິດນີ້ (ແຕ່ຍັງຈະຈຳໜ່າຍປືນໄຣເຟິລລຳກ້ອງຍາວທີ່ໃຊ້ລ່າກວາງ ແລະ ປືນລູກຊອງ ລວມເຖິງລູກປືນສຳລັບປືນຊະນິດດັ່ງກ່າວ) ຂະນະທີ່ບໍລິສັດຈະເນັ້ນລູກຄ້າທີ່ຕ້ອງການປືນສຳລັບລ່າສັດ ແລະ ການຍິງປືນເພື່ອກີລາ.

ພ້ອມນີ້ ທາງາບໍລິສັດກໍໄດ້ຮຽກຮ້ອງໃຫ້ລູກຄ້າທີ່ມາໃຊ້ບໍລິການໃນວອລມາດ ແລະ ແຊມຄລັບໃຫ້ຢຸດພົກພາປືນແບບເປີດເຜີຍ ເຖິງແມ່ນວ່າຈະເປັນລັດທີ່ມີກົດໝາຍອະນຸຍາດໃຫ້ພົກພາປືນໄດ້ກໍຕາມ ເນື່ອງຈາກການກະທຳໃນລັກສະນະນີ້ຈະເຮັດໃຫ້ເກີດຄວາມວິຕົກກັງວົນ ຄວາມຢ້ານ ແລະ ອາດເຖິງຂັ້ນຕ້ອງອົບພະຍົບລູກຄ້າ.

ການຈຳກັດການຈຳໜ່າຍລູກປືນຂອງບໍລິສັດຈະເຮັດໃຫ້ສ່ວນແບ່ງການຕະຫຼາດລູກປືນຂອງ ວອລມາດຈາກເດີມຢູ່ທີ່ປະມານ 20% ຫຼຸດລົງເຫຼືອ 6-9% ພ້ອມນີ້ ກໍໄດ້ຮຽກຮ້ອງຕໍ່ສານຄອງເກຣສໃຫ້ຜ່ານກົດໝາຍຄວບຄຸມອາວຸດຕ່າງໆຢ່າງເຂັ້ມງວດ ຂະນະທີ່ເມື່ອເດືອນສິງຫາຜ່ານມາໄດ້ເກີດເຫດຍິງທີ່ຫ້າງວອລມາດໃນເມືອງເອລປາໂຊ ລັດເທັກຊັສ ມີຜູ້ເສຍຊີວິດ 22 ລາຍ ແລະ ອະດີດພະນັກງານວອລມາດກໍເກີດເຫດພະນັກງານໃຊ້ອາວຸດປືນຍິງກັນເສຍຊີວິດ 2 ລາຍໃນລັດມິສຊິສຊິບປີ.

 

 

 

ຮຽບຮຽງ: ພ.ສະຫວັນ

ຮູບພາບ: thaipost

ອອກ​ຈາກ REPLY ເປັນ

Please enter your comment!
Please enter your name here

This site uses Akismet to reduce spam. Learn how your comment data is processed.